વીડિયો જોઈને સોશિયલ મીડિયા પર ઐશ્વર્યાના ઘણા વખાણ થયા હતા. તેના આ પોસ્ટ પર કમેન્ટનું પૂર આવ્યું હતું
Mumbai, તા.૨૯
ઐશ્વર્યા વિશ્વ સુંદરી હોવાની સાથે પોતાનો અવાજ ઉઠાવવા માટે પણ જાણીતી છે, ખાસ કરીને જ્યારે છોકરીઓ અને સ્ત્રીઓને લગતો કોઈ મુદ્દો હોય. હવે ઐશ્વર્યાએ જાહેર રસ્તાઓ પર સ્ત્રીઓની સતામણી અંગે તેણે અવાજ ઉઠાવવાની વાત કરી છે. તાજેતરમાં લોરિઅલ પેરિસ સ્ટેન્ડ અફ ટ્રેનિંગ પ્રોગ્રામના ભાગરૂપે યોજાયેલા એક પ્રોગ્રામમાં ઐશ્વર્યાએ કહ્યું કે સતામણી પાછળના કારણો અને જવાબદારીનો ભાર મહિલાઓ પર ન આવવવો જોઈએ, કે તેના ડ્રેસ કે લિપસ્ટિક કે નિર્ણયો પર ન આવવો જોઈએ.લગભગ એક દાયકાથી ઐશ્વર્યા આ બ્રાન્ડ સાથે જોડાયેલી છે. તેના સંદર્ભે તેણે સોશિયલ મીડિયા પર એક વીડિયો પોસ્ટ કર્યો હતો, તેમાં તેણે સમસ્યાઓ વિશે ખુલીને બોલવા પર વાત કરી હતી. સામાન્ય રીતે રસ્તા પર આવી રીતે સ્ત્રીઓની સતામણી કરતા લોકોને અવગણવા અથવા તો તેમની સાથે નજર મિલાવ્યા વિના ત્યાંથી નીકળી જવાની સલાહ છોકરીઓને પરિવારમાંથી અપાતી હોય છે. તેથી ઉલટું ઐશ્વર્યાએ આ વાત અંગે અલગ દૃષ્ટિકોણથી વાત કરી છે. આ વીડિયોમાં ઐશ્વર્યાએ કહ્યું, “જાહેર રસ્તા પર થતી સતામણી. તેનો સામનો કઈ રીતે કરશો?”આગળ ઐશ્વર્યાએ કહ્યું, “આંખ ન મેળવવી-ના. સમસ્યાની આંખમાં આંખ મેળવીને જુઓ. તમારું માથું હંમેશા ઊંચું જ રાખો. સ્ત્રીત્વ અને સ્ત્રીવાદી, મારું શરીર, મારું મુલ્ય. તમારા મુલ્ય સાથે ક્યારેય સમાધાન ન કરો. તમારી જાત પર ક્યારેય શંકા ન કરો. તમારા મુલ્ય માટે અવાજ ઉઠાવો. તમારા ડ્રેસ કે તમારી લિપસ્ટિકને ક્યારેય દોષ ન આપશો, રસ્તા પર થતી સતમાણીમાં ક્યારેય તમારો દોષ હતો નથી.”આ વીડિયો જોઈને સોશિયલ મીડિયા પર ઐશ્વર્યાના ઘણા વખાણ થયા હતા. તેના આ પોસ્ટ પર કમેન્ટનું પૂર આવ્યું હતું. એક વ્યક્તિએ કમેન્ટમાં લખ્યું હતું, “જાહેરમાં સતામણી વાસ્તવિકતા છે, જેના પર બહુ ચર્ચા થતી નથી. બહુ ગમ્યું.” તો કોઈએ લખ્યું, “એક મજબુત વાત યાદ અપાવી અને દરેક શહેરની યુવતિઓ અને સ્ત્રીઓ માટે મહત્વનો સંદેશ.”
