ટ્રેક્ટર અને મોટરસાયકલ વચ્ચે સર્જાયેલા અકસ્માતમાં વૃદ્ધ વ્યક્તિનું થયું મોત
Upleta,તા.29
ઉપલેટા તાલુકાના ઢાંક અને મેરવદર ગામ વચ્ચેના રસ્તા ઉપર મોટરસાયકલ લઈને જઈ રહેલા બે સગા ભાઈઓની ટ્રેક્ટર સાથે ટક્કર થતા અકસ્માત સર્જાયો હતો જેમાં અકસ્માતે બનેલી આ ઘટનામાં બે સગા વૃધ્ધ ભાઈઓ પૈકીના એક ભાઈનું મોત થયું છે જ્યારે અન્ય એક ભાઈને ગંભીર ઈજાઓ પહોંચતા બન્નેને પ્રથમ ઉપલેટા સરકારી હોસ્પિટલ અને બાદમાં ઈજાગ્રસ્ત વૃદ્ધને ઉપલેટાની ખાનગી હોસ્પિટલ ખાતે સારવાર અર્થે ખસેડવામાં આવેલ હતા ત્યારે અકસ્માતની આ ઘટનામાં મૃતક વૃધ્ધ વ્યક્તિને પોસ્ટમોર્ટમ માટે ખસેડવાની કામગીરી હાથ ધરી હતી.
આ અંગેની પ્રાપ્ત થયેલ માહિતીઓ અનુસાર રાત્રિના અંદાજિત નવ વાગ્યા આસપાસ મોટરસાયકલ લઈને જઈ રહેલા બે સગા વૃદ્ધ ભાઈઓનો મોટરસાયકલમાં સવાર થઈને જઈ રહ્યા હતા ત્યારે મેરવદર અને ઢાંક ગામ વચ્ચે રસ્તા ઉપર ટ્રેક્ટર સાથેની થયેલ અકસ્માતમાં મોટરસાયકલ સવાર બન્ને ભાઈઓ ફંગોળાઈ ગયા હતા અને બન્નેને ઈજાઓ પહોંચતા 108 મારફત તેમજ ખાનગી વાહનમાં ઉપલેટા સરકારી હોસ્પિટલ ખાતે ખસેડવામાં આવ્યા હતા જેમાં મોટર સાયકલ ચાલક ઝીણાભાઈ હીરાભાઈ ચાવડાનું મોત થયું છે જ્યારે વિરમભાઈ હીરાભાઈ ચાવડાને પગમાં ફ્રેકચર થયું છે.
અકસ્માતની ઘટના અંગેની જાણ થતા તુરંત ઉપલેટા તાલુકા ઢાંક ગામના સરપંચ સંજયભાઈ લુણસીયા તેમજ બન્ને વૃદ્ધોના પરિવાર ઘટના સ્થળ અને ઉપલેટા સિવિલ હોસ્પિટલ ખાતે દોડી આવ્યા હતા અને આ અંગેની જાણ ભાયાવદર પોલીસને થતા ભાયાવદર પોલીસ સ્ટાફ પણ હોસ્પિટલ ખાતે દોડી આવ્યા હતા ત્યારે અકસ્માતે બનેલ આ ઘટનામાં હોસ્પિટલ ખાતે હાજર તબીબે ઝીણાભાઈ હીરાભાઈ ચાવડાને મૃત જાહેર કરતા પોલીસે પોસ્ટ મોર્ટમ માટેની કામગીરી હાથ ધરી હતી જ્યારે મૃતકના ભાઈ વિરમભાઈ હીરાભાઈ ચાવડાને પગમાં ઈજાઓ પહોંચતા ઉપલેટામાં ખાનગી હોસ્પિટલ ખાતે અને બાદમાં જામનગર ખસેડવામાં આવ્યા હતા.
