અમેરિકામાં વિદેશી નાગરિકોની વસતી ૫.૩૦ કરોડ છે અને તેમાંથી મોટાભાગના લોકો સરકારી ખર્ચ પર નભે છે. તેઓ નિષ્ફળ દેશોમાંથી અથવા જેલમાંથી આવેલા છે
Washington, તા.૨૯
વ્હાઈટ હાઉસ નજીક અફઘાની શરણાર્થીએ કરેલા આતંકવાદી હુમલા બાદ ડઘાઈ ગયેલા યુએસ પ્રમુખ ડોનાલ્ડ ટ્રમ્પે ત્રીજા વિશ્વના દેશોમાંથી આવતા લોકોનું માઈગ્રેશન કાયમી ધોરણે સંપૂર્ણ બંધ કરાવી દેવાની ચીમકી આપી છે. ‘સિક્યુરિટી રિસ્ક’ ધરાવતા દેશમાંથી અમેરિકા આવેલા વિદેશી નાગરિકોને ડીપોર્ટ કરવાની ચીમકી પણ ટ્રમ્પે આપી છે. અમેરિકાએ જોખમી દેશની યાદીમાં મૂકેલા સ્થળેથી આવતા વિદેશી નાગરિકોએ ગ્રીન કાર્ડ મેળવી લીધા હશે તો પણ તેમના ગ્રીન કાર્ડની સઘન ફેર ચકાસણી કરવાનો ઈરાદો પણ ટ્રમ્પે જાહેર કર્યો છે. અફઘાન નાગરિક રહેમાનુલ્લાહ લાકનવાલે કરેલા હુમલામાં ગંભીર રીતે ઘાયલ થયેલી યુએસ નેશનલ ગાર્ડની સ્પેશિયાલિસ્ટ સારાહ બેકસ્ટોર્મ (ઉ.વ.૨૦)નું સારવાર દરમિયાન નિધન થયું છે, જ્યારે ૨૪ વર્ષીય એર્ન્ડ્યુ વોલ્ફની હાલત હજુ ગંભીર છે. સ્થાનિક સમય પ્રમાણે ગુરુવારે ટ્રમ્પે થેન્ક્સગિવિંગ સર્વિસ મેમ્બર સાથે વાત કરી હતી, જેમાં તેમણે બેકસ્ટોર્મના નિધનની જાહેરાત કરી હતી. મહિલા ગાર્ડના નિધન પર શોક વ્યક્ત કરવાની સાથે ટ્રમ્પે અમેરિકામાં ગેરકાયદે રહેતા અને માહોલ બગાડતા લોકોની સંખ્યા ઘટાડવાનું લક્ષ્ય જાહેર કર્યુ હતું. વર્તમાન પરિસ્થિતિનો ઉકેલ માત્ર રીવર્સ માઈગ્રેશનથી આવી શકશે તેવું જણાવતા ટ્રમ્પે ઉમેર્યુ હતું કે, નફરત કરનારા, ચોરી કરનારા, હત્યા કરનારા અને અમેરિકા જેમાં માને છે તે તમામનો નાશ કરનારા લોકો સિવાય તમામને થેન્ક્સગિવિંગની શુભેચ્છા. આવા લોકો અમેરિકામાં લાંબુ રહી શકશે નહીં.હુમલાની ઘટના માટે બાઈડન સરકાર પર દોષનો ટોપલો ઢોળતા ટ્રમ્પે ટ્્રુથ સોશિયલ પર જણાવ્યુ હતું કે, ટેકનોલોજીકલી અમેરિકાએ ઘણી પ્રગતિ હાસલ કરી છે, પરંતુ ઈમિગ્રેશન પોલિસીએ તેનો લાભ થવા દીધો નથી અને ઘણાં લોકોના જીવનધોરણને સુધરવા દીધા નથી. યુએસ સીસ્ટમને સંપૂર્ણ રીકવર કરવા માટે ત્રીજા વિશ્વના દેશોમાંથી માઈગ્રેશન કાયમી ધોરણે સંપૂર્ણ બંધ કરાવી દઈશ. પૂર્વ પ્રમુખ બાઈડને ગેરકાયદે રીતે લાખો લોકોને પ્રવેશ આપ્યો હતો. અમેરિકા માટે લાભદાયી ન હોય અને આ દેશને ચાહવામાં સક્ષમ ન હોય તેવા તમામ લોકોને હાંકી કાઢવામાં આવશે. અમેરિકાના નાગરિક ન હોય તેવા તમામ લોકોને મળતા સરકારી લાભ બંધ કરી દેવામાં આવશે. પશ્ચિમી સંસ્કૃતિને સ્વીકારી ન શકે, સલામતી માટે જોખમી હોય અને જાહેરમાં ખલેલ ઊભી કરતા હોય તેવા કોઈપણ વિદેશી નાગરિકને હાંકી કાઢવામાં આવશે.યુએસ પ્રમુખ ટ્રમ્પે મહિલા સાંસદ ઈલ્હાન ઓમરની ટીકા કરતા કહ્યું હતું કે, તે હંમેશા હિજાબ પહેરેલો રાખે છે. તે પોતે પણ ગેરકાયદે અમેરિકામાં ઘૂસી હોવાની શક્યતા છે, કારણ કે પોતાના ભાઈ સાથે લગ્ન કરવાની મંજૂરી નથી હોતી. તે અમેરિકા માટે નફરતભરી ફરિયાદો અને બંધારણની ટીકા સિવાય કંઈ કરતી નથી. તે હંમેશા કહેતી ફરે છે કે, તેની સાથે ખરાબ વર્તન થઈ રહ્યું છે. આ સાથે ટ્રમ્પે અમેરિકા પહોંચવા માટે પ્લેન પર લટકેલા સેંકડો અફઘાનીઓનો ફોટોગ્રાફ શેર કર્યો હતો. ટ્રમ્પે કહ્યું હતું કે, ૨૦૨૧માં સેંકડો અફઘાની અમેરિકામાં ઘૂસી ગયા હતા અને કોઈ ચકાસણી થઈ ન હતી. હવે આ તમામની સઘન ચકાસણી થશે. અગાઉની સરકારે કરેલી ભૂલનો ભાર અમેરિકન નાગરિકોના ખભે આવશે નહીં.યુએસ સિટિઝનશિપ એન્ડ ઈમિગ્રેશન સર્વિસે ૧૯ હાઈ રિસ્ક દેશોની યાદી જાહેર કરી છે. ટ્રમ્પે ત્રીજા વિશ્વના દેશો તરીકે જે દેશોનો સંદર્ભ આપ્યો છે, તેમાં અફઘાનિસ્તાન, મ્યાનમાર, બુરાંડી, ચાડ, કોંગો, ક્યુબા, ઈક્વાટોરિટલ ગીની, એરિટ્રીઆ, હૈતી, ઈરાન, લાઓસ, લિબિયા, સીએરા લીઓન, સોમાલિયા, સુદાન, ટોગો, તુર્કમેનિસ્તાન, વેનેઝુએલા અને યમનનો સમાવેશ થાય છે.
