Moscow,તા.02
રશિયાના રાષ્ટ્રપતિ વ્લાદીમીર પુટીનની ગુરૂવારથી શરૂ થઈ રહેલી બે દિવસની ભારત યાત્રા પુર્વે મોસ્કોથી દિલ્હી સુધી જબરો ડિપ્લોમેટીક ધમધમાટ છે અને ભારત રશિયા પાસેથી સુખોઈ-57 આધુનિક જનરેશન લડાયક યુદ્ધ જહાજ જેનુ તબકકાવાર ભારતમાં જ ઉત્પાદન થાય તેવા કરાર અને દેશના અવકાશી છત્ર જેવા એસ-500 એર ડિફેન્સ સીસ્ટમ સહિતની ખરીદીના કરાર થશે જે બન્ને દેશો વચ્ચેનો સૌથી મોટો સંરક્ષણ સોદો બની રહેશે. સૌથી મહત્વનું એ છે કે આ સોદા પુર્વે પુટીન રશિયન સંસદની મંજુરી મેળવશે.
રશિયાની સંસદનું નીચલું ગૃહ આજે ભારત સાથેના એક મહત્વપૂર્ણ સંરક્ષણ સમજૂતીને મંજૂરી આપવા માટે મતદાન કરશે. આ મતદાન ભારત-રશિયા પરસ્પર લોજિસ્ટિક્સ એક્સચેન્જ (RELOS) પર થશે. આ મતદાન રશિયન રાષ્ટ્રપતિ વ્લાદિમીર પુતિનની ભારત યાત્રા પહેલાં યોજાઈ રહ્યું છે, જેની શરૂઆત ગુરુવારથી થવાની છે.
RELOS સમજૂતીનો હેતુ સંયુક્ત સૈન્ય અભ્યાસ, આપત્તિ રાહત અને અન્ય કાર્યો માટે સંકલનને સરળ બનાવવાનો છે. આ મુખ્ય સંરક્ષણ સમજૂતી પર બે વિશેષાધિકાર પ્રાપ્ત વ્યૂહાત્મક ભાગીદારો વચ્ચે સૈન્ય સહયોગ વધારવાના હેતુથી 18 ફેબ્રુઆરી, 2025 ના રોજ મોસ્કોમાં હસ્તાક્ષર કરવામાં આવ્યા હતા. આ હસ્તાક્ષર ભારતીય રાજદૂત વિનય કુમાર અને તત્કાલીન ઉપ સંરક્ષણ મંત્રી એલેક્ઝાન્ડર ફોમિન દ્વારા કરવામાં આવ્યા હતા.
રશિયન રાષ્ટ્રપતિ વડાપ્રધાન નરેન્દ્ર મોદી સાથેની વાર્ષિક શિખર વાર્તા માટે ભારતની બે દિવસીય યાત્રા કરવાના છે. આ દરમિયાન વેપાર અને સંરક્ષણ ક્ષેત્રો સહિત ઘણા મહત્વપૂર્ણ પરિણામો આવવાની આશા છે. આનાથી દ્વિપક્ષીય વ્યૂહાત્મક સંબંધો વધુ મજબૂત થશે.
રૂસમાં ભારતના રાજદૂત રહી ચૂકેલા અજય મલ્હોત્રાએ ગુરુગ્રામમાં એક ઇન્ટરવ્યૂમાં જણાવ્યું હતું કે રશિયન નેતાનો આ પ્રવાસ ભારતની સ્વતંત્ર વિદેશ નીતિનો સંકેત છે. તેમણે ઉમેર્યું હતું કે આ મુલાકાત બંને દેશોની લાંબા સમયથી ચાલી આવતી ઊંડી અને ગાઢ ભાગીદારીની પુષ્ટિ કરે છે.
