આરોપી લંપટ શિક્ષક મુકેશ સોલંકી ચાર્જિંગ વાયર અને પટ્ટા વડે યુવતીને માર પણ મારતો હોવાનો ઉલ્લેખ પણ ફરિયાદમાં કરાયો
Rajkot, તા.૨૯
રાજકોટમાં દુસ્કર્મ અને યુવતીની જાન પાછી કઢાયાની અજબ ઘટના સામે આવી છે. યુવતીને તેની જ શિક્ષક મિત્રએ પોતાના શિક્ષક મિત્રની પ્રેમજાળમાં ફસાવી હતી. પછી આ શિક્ષકે શરીરસબંધ બાંધી તેના ફોટા-વીડીયો બનાવી કટકે-કટકે રૂપિયા સવા ચાર લાખ પડાવ્યા હતા. ગત ૨૩ નવેમ્બરે યુવતીના લગ્નમાં જઈ ધાકધમકી આપી જાન પાછી કઢાવી હતી. આ બનાવ અંગે યુવતીએ યુનિવર્સિટી પોલીસ સ્ટેશનમાં નોંધાવલી ફરિયાદમાં આરોપી તરીકે માધાપર ચોક પાસે રહેતા મુકેશ રવજીભાઈ સોલંકી અને સાધુ વાસવાણી રોડ પર પાટીદાર ચોક પાસે રવિ એપાર્ટમેન્ટ ફ્લેટ નંબર ૨૦૧માં રહેતા પ્રીતિ ઘેટીયાના નામ આપ્યા છે.બનાવની વિગત એવી છે કે, ભોગ બનનાર યુવતીને શિક્ષિકા પ્રીતિ ઘેટીયા સાથે સંપર્ક થયો હતો. જે બાદ પ્રીતિએ શિક્ષક મુકેશ સોલંકી સાથે ઓળખાણ કરાવી હતી. પ્રીતિ અને મુકેશ બન્ને સરકારી શાળામાં શિક્ષક તરીકે ફરજ બજાવતા હતાં. આ પછી મુકેશ સાથે મિત્રતા આગળ વધતા બન્ને વચ્ચે પ્રેમ સંબંધ બંધાયો હતો. આ સમયે શિક્ષક મુકેશ સોલંકીએ પોતે અપરિણીત હોવાનું જણાવી તેની મિત્ર પ્રીતિના ઘરે અવારનવાર મુલાકાત કરી યુવતી સાથે શારીરિક સંબંધ બાંધ્યા હતા.યુવતીને લંપટ શિક્ષક સાથે મિત્રતા થયાના બે-ત્રણ મહિના પછી શિક્ષક પરિોણિત હોવાની જાણ થઇ હતી. એ પછી યુવકે યુવતીના ન્યૂડ ફોટા-વીડિયો બનાવી તેને વાઇરલ કરવા અને બદનામ કરવાની ધમકી આપી કટકે-કટકે રૂ.૪.૨૫ લાખ પડાવ્યા હતા. આરોપી લંપટ શિક્ષક મુકેશ સોલંકી ચાર્જિંગ વાયર અને પટ્ટા વડે યુવતીને માર પણ મારતો હોવાનો ઉલ્લેખ પણ ફરિયાદમાં કરાયો છે.ફરિયાદમાં જણાવ્યા મુજબ, ગત ૨૩ નવેમ્બરના રોજ યુવતીના લગ્ન હતા. દરમિયાન આરોપી મુકેશ અને પ્રીતિએ ગુનાહિત કાવતરું રચી લગ્ન સ્થળ પર પણ આ બન્ને પહોંચી પ્રથમ ભોગ બનનાર યુવતીને મળ્યા હતાં. બાદમાં તેના મંગેતર અને તેના પરિવારજનોને જાનથી મારી નાખવાની ધમકી આપી તેના લગ્ન રોકાવ્યા હતા.અંતે કંટાળી યુવતીએ આ મામલે યુનિવર્સિટી પોલીસ સ્ટેશનમાં ફરિયાદ નોંધાવતા પોલીસે બંને આરોપી મુકેશ સોલંકી અને પ્રીતિ ઘેટીયા વિરુદ્ધ ફરિયાદ નોંધી આરોપી પ્રીતિ ઘેટીયાની ધરપકડ કરી ફરાર મુખ્ય આરોપી લંપટ શિક્ષકની શોધખોળ હાથ ધરી છે.ઉલ્લેખનીય છે કે, મુકેશ સોલંકી પડધરી તાલુકાના રોહીશાળા ગામ ખાતે શિક્ષક તરીકે ફરજ બજાવે છે, જ્યારે પ્રીતિ ઘેટીયા મોરબી જિલ્લામાં સરકારી શાળામાં શિક્ષિકા તરીકે ફરજ બજાવતી હોવાનું સામે આવ્યું છે.
