પુરપાટ ઝડપે સામેથી આવેલ ફોર વ્હીલ કારે મોટરસાઈકલને અડફેટે લઈને અકસ્માત સર્જ્યો
અકસ્માત સર્જી અજાણ્યો કાર ચાલક તુરંત નાસી છૂટ્યો હતો ત્યારે આ મામલે પોલીસ તપાસ શરૂ કરી
Upleta,તા.29
ઉપલેટા શહેરના કોલકી રોડ પર રાત્રિના નવ વાગ્યા બાદ હિટ એન્ડ રનની ઘટના બની હતી જેમાં પુરપાટ ઝડપે સામેથી આવેલ ફોર વ્હીલ કારે બાળકીઓને લઈને જઈ રહેલ વ્યક્તિના મોટરસાઈકલને અડફેટે લીધા હતા અને ધડાકા ભેર ટક્કર મારીને પિતા અને તેમની બે પુત્રીઓને ફંગોળી નાખીને અકસ્માત સર્જનાર અજાણ્યો કાર ચાલક તુરંત જોયા અને સમજ્યા વગર નાસી છૂટવામાં સફળ થયો હતો ત્યારે આ ઘટનામાં ઈજાગ્રસ્ત બે બાળકીઓને સ્થાનિકોએ ખાનગી વાહનમાં ઉપલેટામાં આવેલ ખાનગી હોસ્પિટલમાં સારવાર અર્થે ખસેડી હતી.
આ ઘટના અંગેની પ્રાપ્ત થયેલ વિગતો અને ઇજાગ્રસ્ત દ્વારા જણાવેલ માહિતીઓ અનુસાર ઇલેક્ટ્રીકનું કામ કરતા અને ઉપલેટા શહેરના કોલકી રોડ પર મનદીપ ઓઈલ મિલની સામેના વિસ્તારમાં આવેલ શાકુંતલ સોસાયટી વિસ્તારમાં રહેતો વ્યક્તિ પોતાની બે બાળકીઓ લઈને રાત્રિના નવ વાગ્યા આસપાસ ઉપલેટા તરફ આવી રહ્યા હતા ત્યારે લાભશુભ એપાર્ટમેન્ટ પાસે રસ્તો પર બનેલ સ્પીડ બેકર પાસે પહોંચતા સામેથી પુરપાટ ઝડપે કાર આવી હતી અને ધડાકાભેર સામેથી ટક્કર મારીને મોટરસાયકલમાં સવાર બે નાની બાળકીઓ અને તેમના પિતાને અડફેટે લીધા હતા અને અકસ્માત સર્જીને કાર ચાલક તુરંત ત્યાંથી નાસી છૂટ્યો હતો.
અકસ્માતમાં મોટરસાયકલ ચાલક અને બાળકીઓના પિતાને પગમાં ફ્રેકચર હોવાનું સામે આવ્યું છે જ્યારે બે બાળકીઓને પણ ઈજાઓ થઈ છે જેમાં આ બાબતની જાણ ઉપલેટા પોલીસને થતા ઉપલેટા પોલીસ પણ ખાનગી હોસ્પિટલ ખાતે દોડી આવી હતી અને ઘટના અંગે પૂછપરછ તેમજ નિવેદન અને ફરિયાદ માટેની કાર્યવાહી હાથ ધરી હતી ત્યારે ઉપલેટા પોલીસે અકસ્માત સર્જીને નાસી જનાર કાર ચાલકને શોધવા માટેના ચક્રો ગતિમાન કર્યાં છે અને આ મામલે આસપાસના સીસીટીવી ફૂટેજ પણ ચેક કરવાની અને કાર તેમજ તેમના ચાલકને શોધવાની કામગીરીઓ હાથ ધરી છે.
