New Delhi,તા.02
ઑસ્ટ્રેલિયાના દિગ્ગજ ક્રિકેટર અને પૂર્વ ઓપનિંગ બેટ્સમેન માઇકલ સ્લેટરની મુશ્કેલીઓ ઓછી થવાનું નામ નથી લઈ રહી. ઘરેલુ હિંસાના અનેક કેસોમાં ફસાયેલા સ્લેટર પાસેથી હવે ક્રિકેટ NSW (ન્યૂ સાઉથ વેલ્સ) દ્વારા હૉલ ઑફ ફેમનો દરજ્જો અને આજીવન સભ્યપદ (Life Membership) પાછું ખેંચી લેવામાં આવ્યું છે.55 વર્ષીય માઇકલ સ્લેટર સામે વારંવાર ગંભીર ઘરેલુ હિંસાના કેસ નોંધાયા હતા. આ વર્ષની શરૂઆતમાં જ તેમને આ મામલે ચાર વર્ષની જેલની સજા સંભળાવવામાં આવી હતી. જોકે, કસ્ટડીમાં વિતાવેલા સમયને ધ્યાનમાં રાખીને સજામાં થોડો ઘટાડો કરવામાં આવ્યો હતો. સ્લેટરને ક્વીન્સલેન્ડની મારુચીડોર ડિસ્ટ્રિક્ટ કોર્ટે ગળું દબાવવું, મારપીટ, ચોરી અને એક મહિલાનો પીછો કરવા જેવા અનેક ગુનાઓ માટે દોષિત ઠેરવ્યો હતો. સજા સંભળાવનાર જજે તેમના આ વર્તનને દારૂના વ્યસન સાથે જોડ્યું હતું.
સોમવારે, 1 ડિસેમ્બરની સાંજે ક્રિકેટ NSWની જનરલ મીટિંગમાં આ મોટા પગલાની પુષ્ટિ કરવામાં આવી હતી. સભ્યો અને ડેલીગેટ્સે સ્લેટરને અગાઉ આપવામાં આવેલા તમામ સન્માન પાછા ખેંચવાના બોર્ડના પ્રસ્તાવને સમર્થન આપ્યું હતું. માઇકલ સ્લેટરને એક દાયકા પહેલાં આ સન્માન આપવામાં આવ્યું હતું, જેમાં 2015માં તેમને ક્રિકેટ NSW હૉલ ઑફ ફેમમાં સામેલ કરવામાં આવ્યા હતા અને 2016માં આજીવન સભ્યપદ આપવામાં આવ્યું હતું.
માઇકલ સ્લેટરે 1993 થી 2001 દરમિયાન ઑસ્ટ્રેલિયા માટે 74 ટેસ્ટ અને 42 વનડે ઇન્ટરનેશનલ મેચ રમી હતી, અને તેઓ NSW માટે પણ લાંબા સમય સુધી પ્રોફેશનલ ક્રિકેટમાં સક્રિય રહ્યા હતા. જોકે, 2016 પછી તેમના પર ઘણી મહિલાઓ દ્વારા ગંભીર આરોપો લગાવવામાં આવ્યા હતા, અને પાંચ મહિલાઓએ તેમની સુરક્ષા માટે પોલીસ પ્રોટેક્શનની માગણી પણ કરી હતી. ક્રિકેટ NSW દ્વારા લેવાયેલું આ પગલું, ખેલાડીઓ દ્વારા ગંભીર ગુનાહિત કૃત્યો સામે સંગઠન તરફથી કડક વલણ દર્શાવે છે.
