Bridgetown , તા. 18
બેટિંગમાં અદ્ભુત કળા, બોલિંગમાં ફાસ્ટ અને સ્પિન બંને પર સમાન નિયંત્રણ અને મેદાનના કોઈપણ ખૂણામાં લાજવાબ ફિલ્ડિંગ. ક્રિકેટ ઇતિહાસમાં કદાચ જ કોઈ એવો ખેલાડી હોય જે આ ત્રણેય માપદંડો પર સર ગારફિલ્ડ (ગેરી) સોબર્સની બરાબરી કરી શક્યો હોય. આ જ કારણે તેમને રમતનાં સૌથી સંપૂર્ણ ઓલરાઉન્્ડર માનવામાં આવે છે.
વેસ્ટ ઈન્ડિઝના આ મહાન ક્રિકેટરનું શુક્રવારે 89 વર્ષની વયે નિધન થઈ ગયું છે. ગેરી સોબર્સનો જન્મ બંને હાથમાં એક-એક વધારાની આંગળી (કુલ 12 આંગળીઓ) સાથે થયો હતો. બાળપણમાં તેમણે પોતે જ કેટગટ (પશુના આંતરડામાંથી બનેલી દોરી) અને એક તીક્ષ્ણ છરીની મદદથી આ વધારાની આંગળીઓને કાપીને અલગ કરી દીધી હતી.
સોબર્સને વિઝડન અલ્મેનાકે 20મી સદીના પાંચ મહાન ક્રિકેટરોમાં સામેલ કર્યા હતાં. મહાનતાની આ યાદીમાં તેઓ ઓસ્ટ્રેલિયાનાં મહાન બેટ્સમેન સર ડોન બે્રડમેન પછી બીજા ક્રમે હતાં.
ખુદ બ્રેડમેને 1988માં કહ્યું હતું કે, “મને આ કહેવામાં રતીભર પણ સંકોચ નથી કે ગેરી સોબર્સ મારી જોયેલી દુનિયાનાં સૌથી મહાન ઓલરાઉન્ડર ક્રિકેટર હતા.” 23 વર્ષની ઉંમરમાં પાકિસ્તાન સામે 365 રનની અણનમ ઇનિંગ રમીને સોબર્સ ટેસ્ટ ઇતિહાસનાં સૌથી યુવા ત્રિપલ સેન્ચુરિયન બન્યાં હતાં.
આ રેકોર્ડ 36 વર્ષ સુધી કાયમ રહ્યો હતો. પોતાની સિદ્ધિઓને યાદ કરતાં સોબર્સ ઘણીવાર પોતાની કુદરતી પ્રતિભાના મહત્વને ઓછું આંકીને કહેતા હતા, “લોકો મને જીનિયસ કહે છે પણ મારું માનવું છે કે મેં જે કંઈ પણ હાંસલ કર્યું છે, તેની પાછળ સખત મહેનત હતી.”
વિશ્વ યુદ્ધનો દંશ અને ‘ડામરના દડા’ થી ક્રિકેટની શરૂઆત
બાળપણનો સંઘર્ષ
28 જુલાઈ, 1936ના રોજ બાર્બાડોસમાં જન્મેલાં સોબર્સે માત્ર પાંચ વર્ષની ઉંમરે પોતાનાં પિતાને ગુમાવી દીધાં હતાં, જેઓ મર્ચન્ટ નેવીમાં હતા અને બીજા વિશ્વ યુદ્ધ દરમિયાન તેમનું જહાજ ડૂબી ગયું હતું. માતાએ એકલાં હાથે જ તંગીમાં છ બાળકોને ઉછેર્યા હતા.
ગલી ક્રિકેટ
સોબર્સ બાળપણમાં વાડના લાકડાનું બેટ અને ડામરના ટુકડાને દડો બનાવીને શેરીઓમાં ક્રિકેટ રમતા હતાં. જ્યારે તડકામાં ડામર પીગળી જતો, ત્યારે તેઓ કપડામાં પથ્થર લપેટીને રમતા હતા.
`નાઈટહુડ’ (સર)ની ઉપાધિ
ક્રિકેટમાં તેમનાં યોગદાન બદલ 1975માં મહારાણી એલિઝાબેથ દ્વિતીયએ 50 હજાર દર્શકોની હાજરીમાં તેમને `નાઈટહુડ’ (સર)ની ઉપાધિ આપી હતી. 1998માં તેમને બાર્બાડોસના `રાષ્ટ્રીય નાયક’ જાહેર કરવામાં આવ્યાં હતાં.
16ની ઉંમરે પદાર્પણ
રેડિયો પર ક્રિકેટ કોમેન્ટ્રી સાંભળીને મોટા થયેલાં સોબર્સે માત્ર 16 વર્ષની ઉંમરે પ્રથમ શ્રેણી ક્રિકેટ અને 1954માં વેસ્ટ ઈન્ડિઝ માટે ટેસ્ટ પદાર્પણ કર્યું હતું.
એક ઓવરમાં છ છગ્ગા
સોબર્સ 1968માં પ્રથમ શ્રેણી ક્રિકેટની એક ઓવરમાં છ છગ્ગા ફટકારનારા વિશ્વનાં પ્રથમ બેટ્સમેન બન્યાં હતાં. તેમણે પ્રથમ શ્રેણી કરિયરમાં 28,314 રન બનાવ્યાં અને 11,043 વિકેટ ઝડપી હતી.
