પોલીસે ઘટનાસ્થળેથી અલગ-અલગ બ્રાન્ડના બોમ્બ, રોકેટ, કોઠી, ચક્કર અને કલર સ્પાર્કલર્સ સહિતના અસંખ્ય ફટાકડાના બોક્સનો જથ્થો જપ્ત કર્યો
Ahmedabad, તા.૨૧
રામોલની ફટાકડા ફેક્ટરીમાં થયેલા બ્લાસ્ટ બાદ શહેર પોલીસ સફાળે જાગી છે. સરદારનગર પોલીસે સુરક્ષાના નિયમોનો સરેઆમ ભંગ કરીને, કોઈ પણ પ્રકારના લાઈસન્સ કે ફાયર સેફ્ટીના સાધનો રાખ્યા વિના ગેરકાયદે રીતે ફટાકડા (દારૂખાનું) વેચતી એક દુકાન પર પોલીસે દરોડો પાડ્યો છે. આ મામલે પોલીસે એક ૧૯ વર્ષીય યુવક સામે ગુનો નોંધી કાયદેસરની કાર્યવાહી હાથ ધરી છે.શહેર પોલીસ શાખાના પોલીસ કર્મચારી (કોન્સ્ટેબલ)ને મળેલી ચોક્કસ વિગતોના આધારે સરદારનગરના કુબેરનગર વિસ્તારમાં આવેલી ‘સાબરમતી બજાર’ ખાતે તપાસ હાથ ધરવામાં આવી હતી. તપાસ દરમિયાન બજારની દુકાન નં. ૬૩માં ગેરકાયદે રીતે ફટાકડાનો મોટો જથ્થો રાખીને વેપાર કરવામાં આવી રહ્યો હોવાનું બહાર આવ્યું હતું. પોલીસ દરોડા દરમિયાન દુકાન પરથી હિમેશકુમાર રમણભાઇ સોલંકી (ઉં.વ. ૧૯) મળી આવ્યો હતો. પોલીસે જ્યારે તેની પાસે ફટાકડાના વેપાર માટેનું અધિકૃત લાઈસન્સ, પરવાનગી પત્ર અથવા દુકાનમાં આગ ઓલવવા માટેના ફાયર સેફ્ટીના સાધનો અંગે પૂછપરછ કરી, ત્યારે તેની પાસે કોઈ પણ પ્રકારના કાયદેસરના દસ્તાવેજો કે સુરક્ષા વ્યવસ્થા મળી આવી ન હતી. પોલીસે ઘટનાસ્થળેથી અલગ-અલગ બ્રાન્ડના બોમ્બ, રોકેટ, કોઠી, ચક્કર અને કલર સ્પાર્કલર્સ સહિતના અસંખ્ય ફટાકડાના બોક્સનો જથ્થો જપ્ત કર્યો છે. ગીચ બજાર વિસ્તારમાં કોઈપણ સુરક્ષા સાધનો વિના આટલા મોટા પ્રમાણમાં જ્વલનશીલ ફટાકડાનો જથ્થો રાખવો એ સ્થાનિક લોકો અને ખરીદદારો માટે અત્યંત જોખમી સાબિત થઈ શકે તેમ હતું. આ બેદરકારી બદલ પોલીસે આરોપી હિમેશકુમાર સોલંકી વિરુદ્ધ ગુનો નોંધી આગળની તપાસ શરૂ કરી છે.
