પતિએ સગીર સંતાનો સહીત પત્નીને દુઃખ ત્રાસ આપી ત્યાગ કરતા જીવન નિર્વાહ ચલાવવા માટે અદાલતમાં દાદ માંગી તી
Rajkot તા.૨૧ઃ
ગીર સોમનાથ જિલ્લાના વેરાવળ ખાતે રહેતા પતિ અને સાસરીયા દ્વારા ત્રાસ આપી પરિણીતાને બે સગીર સંતાનો સાથે કાઢી મૂકવા સબબ દાખલ થયેલા ઘરેલુ હિંસાના કેસમાં ક્લાસીસ સંચાલકને વચગાળામાં ભરણ પોષણ અને ઘરભાડા પેટે દર માસે રૂપિયા ૧૧૦૦૦ ચૂકવવાનો હુકમ કર્યો છે.હાલ રાજકોટ રહેતા જાગૃતિબેન પ્રફુલભાઈ રૂપારેલે વેરાવળ ખાતે રહેતા પતિ પ્રફુલભાઈ પ્રભુભાઈ રૂપારેલ વિરુધ્ધ ઘરેલુ હિંસાની કલમ હેઠળ પોતાનું તથા બે સગીર સંતાનો માટે ભરણપોષણ મેળવવા કોર્ટમાં અરજી કરી હતી.
લગ્ન તા.૦૮/ ૦૨/ ૨૦૦૩ના રોજ ઉના મુકામે થયેલ અને સહલગ્નજીવન વિતાવવાની શરૂઆત વેરાવળ મુકામે કરેલી, લગ્નજીવન દરમ્યાન થ્રીશા તથા આયુષ નામના સંતાનનો જન્મ થયેલ હતો. ત્યારબાદ લગ્નજીવનના અમુક વર્ષો બાદ સામાવાળાઓ દ્વારા અરજદારને ત્રાસ આપવા લાગેલા તેમજ અનેકવાર બંનેના કુટુંબીજનો દ્વારા સમાધાન પણ કરવામાં આવેલ હોવા છતા સામાવાળાઓના વાણી, વર્તન, વ્યવહારમાં કોઈ પણ જાતનો ફેરફાર પડેલ ન હોય તેથી અરજદારને પીયરે આવવાની નોબત આવેલ હતી.
આ સમયગાળા દરમ્યાન વેરાવળમાં કોમ્પ્યુટર ક્લાસ ચલાવતા પતિ દ્વારા પત્નીની ભરણપોષણની જવાબદારી નીભાવી ન હોઈ તેથી અરજદારે કોર્ટ સમક્ષ સદરહું કાયદા અન્વયે અરજી કરી હતી. ત્યારબાદ કોર્ટે દ્વારા નોટીસ ઇશ્યુ કરી કોર્ટ સમક્ષ હાજર કરાતાં સામાવાળાએ અરજદારની અરજી સામે જવાબવાંધા રજુ કરેલ હતા. ત્યારબાદ સદર કામ વચગાળાના ભરણપોષણની દલીલો પર પહોંચેલ જેમાં અરજદારના એડવોકેટ પરેશ મૃગે દલીલમાં જણાવેલ કે સામાવાળાએ ચાલુ લગ્નજીવન દરમિયાન અરજદારને વિના કારણે ઘરમાંથી કાઢી મુકેલ છે, તેમજ સામાવાળાઓ અને સાસરીયા પક્ષે અરજદાર તથા સગીર સંતાનોને માનસીક દુઃખ ત્રાસ આપેલ હતો, તેથી અરજદાર ભરણપોષણ મેળવવા કાયદેસર હકકદાર બને છે, તેથી કાયદાકીય જોગવાઈઓ મુજબ અરજદાર સામાવાળાની સમકક્ષ જીવન જીવી શકે તે માટે યોગ્ય ભરણપોષણની રકમ મંજુર કરવા દલીલો કરી હતી,
આમ અરજદારના એડવોકેટની દલીલો ગ્રાહય રાખી એડિશનલ ચીફ જ્યુડિશિયલ મેજિસ્ટ્રેટ દ્વારા અરજદારની અરજી મંજુર કરી ભરણપોષણ પેટે મુળ અરજી દાખલ તારીખથી અરજદાર પત્નીને તથા સગીર પુત્રી થ્રીશાને માસીક રૂ. ૬૦૦૦/- તથા મકાન ભાડાના માસીક રૂા.૫૦૦૦ નિયમીત સામાવાળાએ ચુકવવા તેવો વચગાળાનો હુકમ કર્યો છે. આ કેસમાં અરજદાર વતી વકીલ તરીકે લીગલ એડના પેનલ એડવોકેટ પરેશ બી. મૃગ રોકાયા હતા.
