Mumbai, તા.૨૨
‘બાહુબલી’ જેવી ભવ્ય ફિલ્મ દ્વારા અભિનેતા પ્રભાસે સમગ્ર ભારતમાં પોતાની આગવી ઓળખ બનાવી હતી. આ ફિલ્મના બંને ભાગોએ બોક્સ ઓફિસ પર અભૂતપૂર્વ સફળતા મેળવીને અનેક રેકોર્ડ તોડ્યા હતા. જોકે, આટલી મોટી સફળતા બાદ પ્રભાસ પોતાની લોકપ્રિયતા જાળવી રાખવામાં કેટલા સફળ રહ્યા છે, તે સવાલ પણ ચર્ચામાં રહ્યો છે. તેમની તાજેતરની ફિલ્મોના પ્રદર્શનને કારણે ચાહકો અને ફિલ્મજગતની નજર હવે તેમની આગામી ફિલ્મો પર છે.વર્ષ ૨૦૧૭માં રિલીઝ થયેલી ‘બાહુબલી ૨’એ ભારતીય સિનેમામાં ઇતિહાસ રચ્યો હતો. જોકે, આ ફિલ્મ બાદ પ્રભાસને એવી જબરદસ્ત સફળતા ફરીથી મેળવવામાં મુશ્કેલીનો સામનો કરવો પડ્યો હતો. ત્યાર બાદ આવેલી ‘સાહો’ને સરેરાશ સફળતા મળી હતી, જ્યારે દર્શકો આતુરતાથી રાહ જોઈ રહ્યા હતા તેવી ‘રાધે શ્યામ’ અને ‘આદિપુરુષ’ બોક્સ ઓફિસ પર નિષ્ફળ રહી હતી.સતત નિષ્ફળતાઓ બાદ પ્રભાસે ‘સલાર’ અને ‘કલ્કિ ૨૮૯૮ એડી’ જેવી ભવ્ય ફિલ્મો દ્વારા બોક્સ ઓફિસ પર જોરદાર વાપસી કરી હતી. જોકે, ત્યાર બાદ રિલીઝ થયેલી ‘ધ રાજા સાબ’ અપેક્ષા મુજબની સફળતા મેળવી શકી નહોતી અને સિનેમાઘરોમાં નિષ્ફળ રહી હતી.
આ આંચકા બાદ ફરી એક મોટી હિટ ફિલ્મની રાહ જોઈ રહેલા પ્રભાસ હાલમાં દિગ્દર્શક હનુ રાઘવપુડીની ફિલ્મ ‘ફૌજી’માં કામ કરી રહ્યા છે.હનુ રાઘવપુડીની આ ફિલ્મમાં પ્રભાસ સાથે મુખ્ય ભૂમિકામાં જોવા મળનારી પાકિસ્તાની અભિનેત્રી ઇમાનવી ઇસ્માઇલને તેના જન્મદિવસે અભિનેતાએ ખાસ સરપ્રાઇઝ આપી હતી. પ્રભાસે અભિનેત્રી માટે ખાસ ભોજનની વ્યવસ્થા કરી હતી. ઇમાનવીએ આ સરપ્રાઇઝની તસવીરો પોતાના સત્તાવાર ઇન્સ્ટાગ્રામ એકાઉન્ટ પર શેર કરી હતી. ત્યાર બાદ આ તસવીરો સોશિયલ મીડિયા પર ચર્ચાનો વિષય બની છે.પ્રભાસ તરફથી મળેલી આ સુંદર સરપ્રાઇઝ બદલ આભાર વ્યક્ત કરતાં ઇમાનવીએ લખ્યું, “મારું દિલ પણ ભરાઈ ગયું છે અને પેટ પણ.” અભિનેત્રીની આ હૃદયસ્પર્શી પોસ્ટ અને ખાસ ભોજનની તસવીરોને સોશિયલ મીડિયા પર લોકો પસંદ કરી રહ્યા છે. પ્રભાસની આ ખાસ ભેટની પ્રશંસા કરતી પોસ્ટ હાલ ઝડપથી વાયરલ થઈ રહી છે.
