Melbourne,તા.27
વિરાટ કોહલીને ટાર્ગેટ બનાવવો એ ઓસ્ટ્રેલિયન મીડિયાની જૂની આદત છે, પરંતુ આ વખતે તેણે તમામ હદ વટાવી દીધી છે. ઓસ્ટ્રેલિયન મીડિયાનું આ તીર 26મી ડિસેમ્બરનાં રોજ મેલબોર્નમાં બનેલી ઘટના બાદ કોહલી પર સાધ્યું છે.
બોક્સિંગ ડે ટેસ્ટના પહેલાં દિવસે ડેબ્યૂ કરનાર સેમ કોન્સ્ટાસ અને કોહલી વચ્ચે બોલાચાલી થઈ હતી. કોહલીએ કોન્સ્ટાસને ખભાથી ધક્કો માર્યો હતો, જે બાદ આઇસીસીએ તેને સજા કરી હતી.
કિંગ કોહલીએ તેની મેચ ફીના 20 ટકા દંડ ફટકાર્યો છે. તેને એક ડિમેરિટ પોઈન્ટ પણ મળ્યો હતો, પરંતુ ઓસ્ટ્રેલિયા તેને આ સજા આપ્યાં પછી સંતુષ્ટ નહોતું અને તેઓએ આઇસીસી પર પક્ષપાતનો આરોપ લગાવ્યો હતો.
બોક્સિંગ ડે ટેસ્ટના બીજા દિવસે ઓસ્ટ્રેલિયન અખબારોમાં આ મુદ્દો સંપૂર્ણપણે આવરી લેવામાં આવ્યો હતો. અખબારોમાં કોહલીની ભારે ટીકા થઈ હતી. હદ તો ત્યારે થઈ જ્યારે ઓસ્ટ્રેલિયન મીડિયાએ કોહલી માટે જોકર શબ્દનો ઉપયોગ કર્યો હતો.
વાસ્તવમાં વિરાટ કોહલીને ઓસ્ટ્રેલિયન મીડિયાએ જોકર કહ્યો છે. શુક્રવારે ધ વેસ્ટ ઓસ્ટ્રેલિયન અખબારે તેનાં પાછલાં પૃષ્ઠ પર કોહલીને જોકર તરીકે દર્શાવ્યો હતો. અન્ય એક અખબારે આઇસીસી પર પક્ષપાતનો આરોપ લગાવ્યો હતો.
તે કહે છે કે, કોહલીને ઓછી સજા આપવામાં આવી હતી. આ પછી ઓસ્ટ્રેલિયન મીડિયાએ તેની ખૂબ ટીકા કરી હતી. કોહલીના અપમાન બાદ ભુતપૂર્વ ભારતીય દિગ્ગજ ખેલાડીઓ ગુસ્સે થયાં હતાં અને આ સિરિઝ જીતવાની વ્યુહરચના ગણાવી તેની ટીકા કરી હતી.
રવિ શાસ્ત્રીનુ કોહલીને સમર્થન
શાસ્ત્રીએ કહ્યું કે, ઓસ્ટ્રેલિયાને મેલબોર્નમાં જીતવું છે. તેથી, આ બધી બાબતો સામે આવે છે. તેમણે કહ્યું કે, હું ઘણી વખત ઓસ્ટ્રેલિયા ગયો છું. એવું લાગે છે કે આખો દેશ ટીમની પાછળ ઉભો છે, માત્ર ભીડ જ નહીં, મીડિયા પણ. મને આશ્ચર્ય નથી કારણ કે હું ઓસ્ટ્રેલિયાને હતાશા જોઈ શકું છું. જો ઓસ્ટ્રેલિયા પહેલાથી જ 3-0 અથવા 2-0થી આગળ હોત, તો હેડલાઇન્સ પણ અલગ હોત.
રવિ શાસ્ત્રીએ વિરાટ કોહલીને કડક સજા ન મળવાની ફરિયાદ કરનારાઓની પણ ટીકા કરી હતી. તેમણે કહ્યું કે, આઇસીસીએ ભારતીય બેટ્સમેન માટે સજા નક્કી કરતાં પહેલાં યોગ્ય પ્રોટોકોલનું પાલન કરવું જોઈતું હતું.
વિરાટ કોહલીના અપમાન પર ઇરફાન પઠાણ ગુસ્સે
કોમેન્ટ્રી કરતી વખતે ભારતીય ટીમનાં પૂર્વ ક્રિકેટર ઈરફાન પઠાણે ઓસ્ટ્રેલિયાનાં મીડિયા દ્વારા કોહલીની મજાક ઉડાવવા પર નિરાશા વ્યક્ત કરી હતી. ઈરફાને કહ્યું કે, વિરાટને લાગે છે કે તમે અપમાનજનક હેડલાઈન્સ આપી રહ્યાં છો.
ઈરફાને વધુમાં કહ્યું કે, વિરાટ કોહલી જેવાં દિગ્ગજ ક્રિકેટરને જોકર કહેવું યોગ્ય નથી. રેફરીએ જે સજા આપવાની હતી તે આપી, પણ તમે કોહલીને જોકર કહો છો, અમે આ સ્વીકારીશું નહીં. અમે કોહલીનું આ અપમાન બિલકુલ સહન નહીં કરીએ.
