Gir Somnath,તા.08
ગીર સોમનાથ ત્રિવેણી નજીક કારના કાચ તોડી અંદાજે ચાર લાખ ના સોનાના દાગીના અને રોકડ તેમજ જૂનાગઢ સક્કરબાગ ઝૂ પાસે પાર્ક કરેલી કારના કાચ તોડી રોકડ, સોનાના દાગીનાની ચોરી કરી નાશી છૂટેલી આણંદની એક જ પરિવારની ગેંગ દામનગર માં રંગેહાથ ઝડપાઈ છે.
જુનાગઢ અને ગીર સોમનાથમાં એક જ મોડસ ઓપરેન્ડીથી કારના કાચ તોડી નાશી છૂટેલ ગેંગને પકડવા ગીર સોમનાથ એલસીબી ઇન્ચાર્જ પીઆઇ એ બી જાડેજા અને ટીમે ટેકનિકલ સોર્સ ની મદદથી પગેરું દબાવ્યું હતું. દરમિયાન આ ગેંગને દામનગરથી ઉઠાવી લેવામાં આવી હતી.
અમરેલી જિલ્લા તરફ નીકળી જતા અમરેલી તાલુકા સહિતની ટીમને એલર્ટ કરતા લાઠી પોલીસે પીછો કરતા દામનગર ટાઉન પોલીસે કારમાં નીકળેલી ગેંગને પકડી પાડી હતી. જે બાદ ગીર સોમનાથ પોલીસે આ ગેંગના સભ્યોનો કબ્જો લઇ પૂછપરછ શરૂ કરી હતી.
મોરબીથી જુનાગઢ ઝુ સકરબાગ પ્રાણીસંગ્રહાલયમાં ફરવા આવેલા ગરાસીયા પરિવારની કારના કાચ તોડી સોનાના દાગીના અને રોકડ મળી 2.80 લાખની ચોરીને અંજામ આપવામાં આવ્યો હતો જયારે ગીર સોમનાથના ત્રિવેણી નજીક કારના કાચ તોડી અંદાજે ચારથી પાંચ તોલા સોનાના દાગીના અને રોકડ ની ચોરી કરી કારમાં નાસી છૂટેલી આણંદના એકજ પરિવારની ગેંગને દામનગર ટાઉન નજીક પીઆઇ આર વાય રાવલ અને દામનગર પોલીસ ટીમે નાકાબંધી કરી ઝડપી પાડી હતી. દામનગરથી ઝડપાયેલી આ ગેંગ મૂળ આણંદની છે. ગેંગમાં એક જ પરિવારના સભ્યો હોવાનું પોલીસ સૂત્રોએ જણાવ્યું છે. જે પૈકી ત્રણેક સભ્યોને દબોચી લેવામાં આવ્યા છે. હજુ આ શખ્સોની ઓળખ પરેડ બાકી હોવાથી પોલીસે આ મામલે હજુ સુધી કોઈ સત્તાવાર જાહેરાત કરી નથી.
