Ahmedabad, તા.30
અમદાવાદ ગ્રામ્યના વિરમગામના ધારાસભ્ય હાર્દિક પટેલના કાર્યાલયમાં ઘૂસેલા ટોળાં સામે પોલીસે ફરિયાદ નોંધાઈ છે. ધારાસભ્ય હાર્દિક પટેલ ગાંધીનગર ખાતે મીટિંગમાં ગયા હતા ત્યારે મહિલા અને પુરુષનું ટોળું આવ્યું હતું.
આ તમામ લોકોએ ગટરના ગંદા પાણીના પ્રશ્ન બાબતે નારા લગાવ્યા હતા. એક મહિલાએ ગટરનું ગંદુ પાણી ધારાસભ્ય હાર્દિક પટેલની ઓફિસમાં ઢોળીને ધમકીઓ આપી હતી. જેથી આ મામલે વિરમગામ પોલીસને જાણ કરાતા પોલીસે ગુનો નોંધી તપાસ હાથ ધરી છે.
વિરમગામમાં આવેલા આંબેડકર બ્રિજ પાસે અવધ પ્લાઝા કોમ્પલેક્ષમાં ધારાસભ્ય હાર્દિક પટેલનું કાર્યાલય આવેલું છે. ધારાસભ્ય હાર્દિક પટેલના કાર્યાલયમાં ભાવેશભાઈ પટેલ કામ કરે છે. શનિવારે ધારાસભ્ય હાર્દિક પટેલ ગાંધીનગર ખાતે મીટિંગ હોવાથી ત્યાં ગયા હતા.
આ દિવસે સવારે ભાવેશભાઈ અને તેમની સાથેના લોકો કાર્યાલય પર હાજર હતા ત્યારે બપોરે એક પુરુષ અને દસેક જેટલી મહિલાએ આવીને ધારાસભ્ય હાર્દિક પટેલ તથા નગરપાલિકા વિરુદ્ધમાં નારાઓ લગાવ્યા હતા.
જેથી ભાવેશભાઈએ તેમની રજૂઆત બાબતે પૂછતા મહિલાઓને ગોળપીઠા વિસ્તારમાં ગટરના પાણીનો પ્રશ્ન હોવાની જાણ કરી હતી. ત્યારે ભાવેશભાઈએ નગરપાલિકા જઈને રજૂઆત કરવાની સલાહ આપી હતી.
જેથી ઉશ્કેરાયેલા લોકોએ બોલાચાલી કરી હતી. પ્લાસ્ટિકના કેરબામાં ગંદુ પાણી લાવેલી મહિલાએ કાર્યાલયમાં ઘૂસીને ટેબલ અને દીવાલ પર ઢોળ્યું હતું. જ્યાં સુધી પ્રશ્નનો નિકાલ ન થાય ત્યાં સુધી તમને નુકસાન કરવાની ધમકી આપી હતી.
