New Delhi,તા.૧૦
દિલ્હીની મતદાર યાદીમાં છેડછાડનો આરોપ લગાવીને આમ આદમી પાર્ટીએ ફરી એકવાર ભારતીય જનતા પાર્ટી પર મોટો હુમલો કર્યો છે.આપના રાજ્યસભા સાંસદ સંજય સિંહે આરોપ લગાવ્યો છે કે ભાજપ ચૂંટણી પંચનો ઉપયોગ કરીને દિલ્હીમાં ચૂંટણી પ્રક્રિયાને પ્રભાવિત કરવાનો પ્રયાસ કરી રહી છે. આપ નેતા સંજય સિંહે આરોપ લગાવ્યો છે કે હરિયાણા અને મહારાષ્ટ્રમાં બીજેપીની જેમ દિલ્હીમાં પણ ચૂંટણી કૌભાંડનું ષડયંત્ર રચવામાં આવી રહ્યું છે.
સાંસદ સંજય સિંહે કહ્યું કે અમારા રાષ્ટ્રીય સંયોજક અરવિંદ કેજરીવાલે આ વિશે પહેલાથી જ બધાને વિગતવાર જણાવ્યું છે. કેજરીવાલે દિલ્હીના તમામ લોકોને કહ્યું છે કે કેવી રીતે રાજધાનીમાં મોટા પાયે વોટ કપાઈ રહ્યા છે. લોકોને પહેલાથી જ વોટિંગમાં ભાગ લેવાથી રોકવામાં આવી રહ્યા છે.
રાજ્યસભાના સાંસદ સંજય સિંહે કહ્યું કે મે મહિનામાં લોકસભાની ચૂંટણી યોજાઈ હતી. જે બાદ ૨૮મી ઓકટોબરે મતદાર યાદીની સમરી રીવીઝન કરવામાં આવી ત્યારે નવેમ્બરમાં મત કાઢી નાખવાની અરજીની માહિતી સામે આવી ત્યારે ઘણા ચોંકી ઉઠ્યા હતા. સંજય સિંહના જણાવ્યા અનુસાર, આરકે પુરમના ધારાસભ્યએ જોયું કે અહીં ૩૮૦૦ વોટ કપાવવા માટે અરજી દાખલ કરવામાં આવી છે. માહિતી આશ્ચર્યજનક છે. જ્યારે ૧૮૦૦ લોકોની તપાસ કરવામાં આવી તો જાણવા મળ્યું કે તેમને મત કપાયા અંગે કોઈ જાણકારી નથી.
આપ સાંસદ સંજય સિંહે પણ આ મામલે ચૂંટણી પંચ પર નિશાન સાધ્યું છે. તેમણે દાવો કર્યો કે દિલ્હીમાં ચૂંટણી પંચને પ્રાથમિકતા આપીને ચૂંટણી કૌભાંડ આચરવામાં આવી રહ્યું છે.આપ સાંસદે કહ્યું કે ધીરજ ટોકસ ધારાસભ્યના પતિ છે અને પોતે કાઉન્સિલર પણ છે. તે પોતાની સાથે કેટલાક લોકોને અહીં લાવ્યા છે જેમના વોટ કાપવાની કોશિશ કરવામાં આવી છે. આ મતદારો તે બૂથના છે જ્યાંથી આમ આદમી પાર્ટી ચૂંટણી જીતે છે.
આ સાથે સાંસદ સંજય સિંહે ભાજપ પર પ્રહારો કર્યા હતા. તેમણે કહ્યું કે ભાજપ મહારાષ્ટ્ર અને હરિયાણાનો પ્રયોગ દિલ્હીમાં પણ કરવા માંગે છે, અમે આ રમત ચાલુ નહીં થવા દઈએ. સંજય સિંહે કહ્યું કે તેઓ ચૂંટણી પંચને પણ ખુલ્લા પાડશે. મુખ્ય ચૂંટણી કમિશનરે આ લોકો સમક્ષ પોતાનો ખુલાસો રજૂ કરવો જોઈએ.
આ પહેલા આમ આદમી પાર્ટીના રાષ્ટ્રીય સંયોજક અરવિંદ કેજરીવાલે પણ ભારતીય જનતા પાર્ટી પર આમ આદમી પાર્ટીના મતદારોના નામ મતદાર યાદીમાંથી હટાવવાના ષડયંત્રનો આરોપ લગાવ્યો હતો. તેમણે કહ્યું છે કે આપ કાર્યકર્તાઓની ટીમ સમગ્ર દિલ્હીમાં મત ગણતરીના મામલાની તપાસ કરી રહી છે. જવાબદારોએ કાયદાકીય જવાબ આપવો પડશે.
