Morbi, તા.7
વાંકાનેરના કેરાળા ગામના બોર્ડ પાસેથી યુવાન બાઈક ઉપર પોતાની દીકરીને બાઈકમાં બેસાડીને પસાર થઈ રહ્યો હતો ત્યારે ટ્રેક્ટર ચાલકે પોતાની ટ્રેક્ટરમાં લોખંડની એંગલો ભરી હતી.
જે લોખંડની એંગલ સાથે યુવાનનું બાઈક અથડાતા યુવાનને ઇજાઓ થઈ હતી અને તેની 11 વર્ષની દીકરીને માથામાં ગંભીર ઈજા થઈ હોવાના કારણે તેનું મોત નીપજ્યું હતું અને ટ્રેક્ટર ચાલાક ટ્રેક્ટર મૂકીને નાસી ગયેલ હોય હાલમાં યુવાને નોંધાવેલ ફરિયાદ આધારે પોલીસે ટ્રેક્ટર ચાલક સામે ગુનો નોંધી આરોપીને પકડવા માટે તજવીજ શરૂ કરેલ છે.
જાણવા મળતી માહિતી મુજબ રાજકોટ આજીડેમ ચોકડી પાસે ભીમરાવનગર શેરી નં- 20 માં રહેતા મનુભાઈ આંબાભાઈ ચાવડા (33)એ ટ્રેક્ટર નંબર જીજે 3 ઇએ 153 ના ચાલક સામે વાંકાનેર સિટી પોલીસ સ્ટેશન ખાતે ફરિયાદ નોંધાવેલ છે .
જેમાં જણાવ્યુ છે કે, તેઓ પોતાની દીકરી દર્શિતા (11) ને પોતાના બાઈક નંબર જીજે 3 ડીએમ 9463 ઉપર બેસાડીને પોતાના ગામ તરફ નેશનલ હાઈવે રોડ ઉપરથી લઈને જઈ રહ્યા હતા દરમિયાન વાંકાનેર નજીક આવેલ કેરાળા ગામના પાટીયા પાસેથી તેઓ પસાર થઈ રહ્યા હતા.
ત્યારે ટ્રેક્ટર ચાલાક પોતાના ટ્રેક્ટરની ટ્રોલીમાં લોખંડની એંગલોને બહાર નીકળે તે રીતે ભરી હતી અને તે એંગલો લઈને જઈ રહ્યો હતો ત્યારે ટ્રેક્ટર ચાલકે અચાનક વળાંક લેતા ફરિયાદીના બાઈક સાથે ટ્રોલીમાં બહાર નીકળેલી એંગલો અથડાઈ હતી અને જેથી અકસ્માત થયો હતો.
આ બનાવમાં ફરિયાદી યુવાનને શરીરે ઇજાઓ થઈ હતી જો કે, તેની દીકરીને માથાના ભાગે ગંભીર ઇજા થયેલ હોવાના કારણે તેનું મોત નીપજ્યું હતું. પોલીસે ગુનો નોંધી આરોપીને પકડવા માટે તજવીજ શરૂ કરેલ છે.
મોરબીના લીલાપર રોડ ઉપર હોથીપીરની દરગાહ પાછળના ભાગમાંથી પોલીસે 1100 રૂપિયાની કિંમતની દારૂની બોટલ સાથે કિશનભાઇ રાજેશભાઈ વારૈયા (20) રહે સ્મશાન પાસે લીલાપર રોડની ધરપકડ કરી હતી ને તેની સામે એ ડિવિઝન પોલીસ સ્ટેશન ખાતે ગુનો નોંધાયો છે.
