Madhya Pradesh, તા.12
મધ્યપ્રદેશના જબલપુરમાં લૂંટારૂઓએ લુંટની મોટી ઘટનાને અંજામ આપ્યો છે. જબલપુરમાં એક સ્મોલ ફાઇનાન્સ બેંકની શાખામાંથી 14.8 કિલો સોનું અને 5 લાખ રૂપિયા રોકડા લૂંટાયા. માત્ર 18 મિનિટમાં જ આ લૂંટમાં લૂંટારૂઓને મળેલા સોનાની કિંમત 14 કરોડથી વધુ હોવાનું કહેવાય છે.
આરોપીઓ બે મોટરસાયકલ પર હેલ્મેટ પહેરીને આવ્યા હતા અને જબલપુરના ખિતૌલીમાં બેંકમાં ઘૂસી ગયા હતા અને માત્ર 18 મિનિટમાં લૂંટ ચલાવીને ભાગી ગયા હતા.
જબલપુર ગ્રામીણના એડિશનલ એસપી સૂર્યકાંત શર્માએ જણાવ્યું હતું કે, ‘ESAF સ્મોલ ફાઇનાન્સ બેંકની ગણતરી મુજબ, લૂંટારાઓએ 14.8 કિલો સોનું (લગભગ 14 કરોડ રૂપિયા) અને 5 લાખ રૂપિયા રોકડા લૂંટી લીધા હતા. આ મામલાની તપાસ ચાલી રહી છે.’
પોલીસ અધિકારીઓએ જણાવ્યું હતું કે, ‘બેંક શાખામાં કોઈ સુરક્ષા ગાર્ડ નહોતો. ઘટના સમયે ત્યાં છ કર્મચારીઓ હતા. લૂંટારુઓ સવારે 8.50 વાગ્યે બેંકમાં પ્રવેશ્યા હતા અને લગભગ 9.08 વાગ્યે બહાર આવ્યા હતા. તેઓ મોટરસાઇકલ પર ભાગી ગયા હતા. અમે સીસીટીવી કેમેરા તપાસ્યા છે.
તેમની પાસે હથિયારો નહોતા. એક લૂંટારૂ પાસે બેલ્ટ નીચે બંદૂક હતી.’ અધિકારીએ એમ પણ કહ્યું હતું કે કર્મચારીઓએ તેમના વરિષ્ઠ અધિકારીઓ સાથે ચર્ચા કર્યા પછી ઘટનાના 45 મિનિટ પછી પોલીસને જાણ કરી હતી.
તેમણે કહ્યું, “જો તેમણે અમને સમયસર જાણ કરી હોત, તો લૂંટારૂઓ પકડાઈ ગયા હોત. આરોપીઓને પકડવાના પ્રયાસો ચાલી રહ્યા છે.” સૂત્રોએ જણાવ્યું હતું કે બેંક ખુલવાનો સમય સામાન્ય રીતે સવારે 10:30 વાગ્યે હોય છે પરંતુ તહેવારને કારણે, શાખા સવારે 8 વાગ્યે ખોલવામાં આવી હતી.
