Mumbai,તા.૫
અભિનેતા એજાઝ ખાનની મુશ્કેલીઓ વધી રહી છે. આ પહેલા એજાઝ ખાન વિરુદ્ધ ’હાઉસ અરેસ્ટ’ નામના શો માટે એફઆઇઆર દાખલ કરવામાં આવી હતી. અભિનેતા પર શો દ્વારા અશ્લીલતા ફેલાવવાનો આરોપ છે. આ શો પરનો વિવાદ હજુ ખતમ થયો નથી અને હવે એજાઝ ખાન વિરુદ્ધ વધુ એક ફરિયાદ દાખલ કરવામાં આવી છે. એજાઝ ખાન વિરુદ્ધ મુંબઈના ચારકોપ પોલીસ સ્ટેશનમાં દુષ્કર્મનો કેસ નોંધવામાં આવ્યો છે. એક અભિનેત્રીની ફરિયાદ પર, ચારકોપ પોલીસે એજાઝ વિરુદ્ધ દુષ્કર્મનો કેસ નોંધ્યો છે.
પીડિત અભિનેત્રીના જણાવ્યા અનુસાર, એજાઝ ખાને તેને તેના હાઉસ અરેસ્ટ શોમાં હોસ્ટની ભૂમિકા આપવા માટે ફોન કર્યો હતો. શૂટિંગ ચાલી રહ્યું હતું ત્યારે એજાઝ ખાને પહેલા પીડિતાને પ્રપોઝ કર્યું અને બાદમાં તેનો ધર્મ સ્વીકારીને તેની સાથે લગ્ન કરવાનું વચન આપ્યું. આ પછી અભિનેતાએ તેની ઇચ્છા વિરુદ્ધ જઈને તેના પર બળાત્કાર કર્યો. જે બાદ પીડિત અભિનેત્રીએ ગઈકાલે સાંજે ચારકોપ પોલીસ સ્ટેશનમાં કેસ નોંધાવ્યો હતો.
એજાઝ ખાન વિરુદ્ધ દુષ્કર્મ સંબંધિત ભારતીય દંડ સંહિતાની કલમો હેઠળ કેસ નોંધવામાં આવ્યો છે. તેની સામે ચારકોપ પોલીસ સ્ટેશનમાં બીએનએસની કલમ ૬૪, ૬૪, ૬૯, ૭૪ હેઠળ દુષ્કર્મનો કેસ નોંધવામાં આવ્યો હતો. હાલમાં આ બાબત તપાસ હેઠળ છે.
એજાઝ ખાન લાંબા સમયથી વિવાદો સાથે સંકળાયેલા છે અને આ દિવસોમાં તે તેના શો ’હાઉસ અરેસ્ટ’ માટે સમાચારમાં છે. ઉલ્લુ એપના શો હાઉસ એરેસ્ટને અભદ્ર ગણાવતા, ઘણા રાજકીય સંગઠનોએ તેની સામે અવાજ ઉઠાવ્યો અને સરકાર પાસેથી કાર્યવાહીની માંગ કરી. આ સંદર્ભમાં, એજાઝ ખાન અને ઉલ્લુ એપના સીઈઓ વિરુદ્ધ પણ એફઆઈઆર દાખલ કરવામાં આવી છે. આ હ્લૈંઇ પછી, ઉલ્લુ એપમાંથી હાઉસ એરેસ્ટના તમામ એપિસોડ દૂર કરવામાં આવ્યા છે.
આ વેબ શોના કેટલાક વિડીયો ક્લિપ્સ સોશિયલ મીડિયા પર સામે આવ્યા બાદ વિવાદ ઉભો થયો હતો. આ ક્લિપ્સમાં, શોના હોસ્ટ એજાઝ ખાન મહિલા સ્પર્ધકોને તેમના કપડાં ઉતારવા અને પુરુષ સ્પર્ધકો સાથે ઘનિષ્ઠ પોઝ આપવા કહેતા જોવા મળ્યા. આ બધું કેમેરાની સામે થઈ રહ્યું હતું, ત્યારબાદ શોને લઈને વિવાદ ઉભો થયો. વાયરલ ક્લિપ્સ અંગે, રાષ્ટ્રીય મહિલા આયોગે એજાઝ ખાન અને ઉલ્લુ એપના સીઈઓ વિભુ અગ્રવાલને સમન્સ મોકલ્યા છે અને તેમને ૯ મેના રોજ કમિશન સમક્ષ હાજર થવા જણાવ્યું છે.
