Mumbai,તા.૧૩
૩૪ વર્ષીય ટોમ બ્રુસે હવે ન્યુઝીલેન્ડ ક્રિકેટ ટીમ છોડીને સ્કોટલેન્ડ માટે રમવાનો નિર્ણય લીધો છે. તે ઓગસ્ટના અંતમાં સ્કોટલેન્ડ ટીમ માટે રમતા જોવા મળશે. સ્કોટલેન્ડની ક્રિકેટ ટીમ ૨૭ ઓગસ્ટથી શરૂ થનારા કેનેડિયન લેગમાં ક્રિકેટ વર્લ્ડ લીગ-૨ માં ભાગ લેશે. બ્રુસના પિતાનો જન્મ સ્કોટલેન્ડની રાજધાની એડિનબર્ગમાં થયો હતો. આ કારણોસર, બ્રુસ સ્કોટલેન્ડ માટે રમવા માટે ક્વોલિફાય થઈ શક્યો છે.
ટોમ બ્રુસે ૨૦૧૪ થી ન્યૂઝીલેન્ડ માટે સ્થાનિક ક્રિકેટમાં સેન્ટ્રલ ડિસ્ટ્રિક્ટ્સ ટીમ માટે રમવાનું શરૂ કર્યું હતું અને સારું પ્રદર્શન કર્યું હતું. આ પછી, ૨૦૧૭ માં, તેણે કિવી ટીમ માટે ટી ૨૦ આંતરરાષ્ટ્રીય ક્રિકેટમાં ડેબ્યૂ કર્યું હતું અને ૨૦૨૦ માં છેલ્લી મેચ રમી હતી. તેણે કિવી ટીમ માટે ૧૭ ટી ૨૦ મેચમાં કુલ ૨૭૯ રન બનાવ્યા હતા, જેમાં બે અડધી સદીનો સમાવેશ થાય છે. આ દરમિયાન, ૫૯ રન તેનો સર્વોચ્ચ સ્કોર હતો.
ટોમ બ્રુસે કહ્યું કે મારા પરિવારમાં સ્કોટિશ ટીમનો લાંબો ઇતિહાસ છે. હું જાણું છું કે તેને ગર્વ થશે કે હું સ્કોટલેન્ડ માટે રમીશ. પાંચ વર્ષ પહેલા મને ન્યુઝીલેન્ડ ટીમ માટે રમવાનો લહાવો મળ્યો હતો. હવે હું વિશ્વ મંચ પર સારું પ્રદર્શન કરવાનું ચાલુ રાખવા માંગુ છું અને સ્કોટલેન્ડ ટીમને મદદ કરવા માંગુ છું. હું ૨૦૧૬ માં થોડા સમય માટે આ ટીમ સાથે સંકળાયેલો હતો અને તે એક સારો અનુભવ હતો. હું ઘણા વર્તમાન સ્કોટલેન્ડ ખેલાડીઓ સાથે અને તેમની સામે રમ્યો છું.
ટોમ બ્રુસે ૨૦૧૫-૧૬ સુપર સ્મેશમાં સેન્ટ્રલ ડિસ્ટ્રિક્ટ્સ માટે ૧૪૦.૨૫ ના સ્ટ્રાઇક રેટથી ૨૨૩ રન બનાવીને બધાને પ્રભાવિત કર્યા. આ મજબૂત પ્રદર્શન પછી, તેને ન્યુઝીલેન્ડની રાષ્ટ્રીય ટીમમાં સ્થાન મળ્યું. તે તાજેતરમાં ગુયાનાના પ્રોવિડન્સમાં ગ્લોબલ સુપર લીગમાં સેન્ટ્રલ ડિસ્ટ્રિક્ટ્સ માટે રમ્યો હતો. સ્કોટલેન્ડની પુરુષ ટીમના મુખ્ય કોચ ડગ વોટસને કહ્યું કે ટોમ આ જૂથમાં જોડાઈ રહ્યો છે તે અંગે હું ખૂબ જ ઉત્સાહિત છું. તે માત્ર એક વિશ્વ કક્ષાનો ખેલાડી જ નથી, પરંતુ તેની પાસે અપાર અનુભવ પણ છે.
