New York,તા.20
અમેરિકામાં ક્રેડિટ કાર્ડથી બે-પાંચ ડોલરથી લઈને હજારો ડોલરની કોઈપણ આઈટમ્સ ચપટી વગાડતા ખરીદી શકાય છે, પરંતુ ગમે ત્યાં ક્રેડિટ કાર્ડ યુઝ કરવાની આદત ધરાવતા અમેરિકન્સ હવે તેના દેવાના બોજ નીચે દબાઈ રહ્યા છે.
ફેડરલ રિઝર્વ બેંક, ન્યૂયોર્કના એક રિપોર્ટ અનુસાર અમેરિકન્સનું ક્રેડિટ કાર્ડનું દેવું 1.17 ટ્રિલિયન ડોલરના રેકોર્ડ સ્તરે પહોંચી ગયું છે. એક હજાર અબજ બરાબર એક ટ્રિલિયન થાય, અને જો 1.17 ટ્રિલિયન ડોલરને રૂપિયામાં કન્વર્ટ કરો તો કેટલા થાય તેની ગણતરી કરતાં કેલ્ક્યુલેટર અને માણસ બંને હાંફી જાય તેટલો મોટો આંકડો આવે.
છેલ્લા ત્રણ મહિનામાં 42 ટકા અમેરિકન્સનું દેવું જરાય ઓછું નથી થયું અને 28 ટકા અમેરિકન્સનું માનવું છે કે તેમનું દેવું વધ્યું છે. હાલ એવરેજ અમેરિકન ક્રેડિટ કાર્ડ હોલ્ડર પર 6.329 ડોલરનું દેવું છે.
અમેરિકન્સના માથે રહેલું દેવું વધવાનું કારણ ઓછો પગાર અને વધેલા ખર્ચા પણ છે, દેશમાં છેલ્લા બે વર્ષમાં મોંઘવારી વધીને રેકોર્ડ સ્તરે પહોંચી ગઈ છે પરંતુ તેની સરખામણીએ પગારમાં ખાસ વધારો ના થતાં ઓછી આવક ધરાવતા લોકો માટે ઘર ચલાવવું મુશ્કેલ બની ગયું છે.
ક્રેડિટ કાર્ડથી આમ તો લોકો મોજશોખની આઈટમ્સ ખરીદતા હોય છે, પરંતુ અમેરિકામાં ઘણા લોકો હવે ઘર ચલાવવા માટે પણ ક્રેડિટ કાર્ડ યુઝ કરવા મજબૂર છે.
અમેરિકામાં હાલ વ્યાજના દર પણ રેકોર્ડ સ્તરે હોવાના કારણે ક્રેડિટ કાર્ડ દ્વારા કરાયેલા ખર્ચા પણ લોકોને મોંઘા પડી રહ્યા છે. યુએસમાં એવરેજ ક્રેડિટ કાર્ડ યુઝર 5,525 ડોલરનું બેલેન્સ ધરાવે છે અને તેના દ્વારા કરાયેલા ખર્ચા પર એવરજ 20 ટકાથી પણ વધારે વ્યાજ ચૂકવે છે.
અમેરિકાની મધ્યસ્થ બેંકે હાલ વ્યાજના દરમાં સામાન્ય ઘટાડો કર્યો છે, પરંતુ તેનાથી ક્રેડિટ કાર્ડ યુઝ કરવાનું જરાય સસ્તું નથી થયું. અમેરિકામાં ક્રેડિટ કાર્ડથી પબ્લિકે કરેલા દેવાનો મુદ્દો એટલો સિરિયસ છે કે 2024ના ઈલેક્શનમાં ડોનાલ્ડ ટ્રમ્પે લોકોને વચન આપ્યું હતું કે જો પોતે પ્રેસિડેન્ટ બનશે તો ક્રેડિટ કાર્ડના ઈન્ટરેસ્ટ રેટ ઘટાડીને 10 ટકા કરી નાખશે.
ટ્રમ્પે ક્રેડિટ કાર્ડનું દેવું ભરવા સંઘર્ષ કરી રહેલા લાખો અમેરિકન્સને મોટી રાહત આપવાનું વચન આપતા જણાવ્યું હતું કે પોતે ક્રેડિટ કાર્ડ કંપનીઓને 25-30 ટકા જેટલું વ્યાજ વસૂલવા નહીં દે.
