New Delhi,તા.૧૮
એક દેશ એક ચૂંટણી બિલ પર વિગતવાર ચર્ચા માટે જેપીસીની રચના કરવામાં આવી રહી છે. કોંગ્રેસ આ જેપીસીમાં પ્રિયંકા ગાંધીના નામનો પ્રસ્તાવ મૂકી શકે છે. આ સમિતિમાં પ્રિયંકા ગાંધી ઉપરાંત મનીષ તિવારી, સુખદેવ ભગત રણદીપ સુરજેવાલાના નામની પણ ચર્ચા છે. ઉલ્લેખનીય છે કે કેન્દ્રીય કાયદા મંત્રી અર્જુન રામ મેઘવાલે મંગળવારે લોકસભામાં વન નેશન વન ઈલેક્શન બિલ રજૂ કર્યું હતું.
સંમતિ બાદ આ બિલને વિસ્તૃત ચર્ચા માટે સંસદની સંયુક્ત સમિતિને મોકલવામાં આવ્યું છે. હવે જેપીસીની રચનાની તૈયારીઓ શરૂ થઈ ગઈ છે. રિપોર્ટ્સ અનુસાર, જેપીસીમાં ૩૧ સાંસદો સામેલ થઈ શકે છે, જે બિલની સમીક્ષા કરશે. ૩૧ સભ્યોમાંથી ૨૧ સભ્યો લોકસભાના અને ૧૦ સાંસદ રાજ્યસભાના હશે. સમિતિએ તેની રચના પછી ૯૦ દિવસની અંદર તેનો અહેવાલ સુપરત કરવાનો રહેશે. જો કે, સમયમર્યાદા પણ લંબાવી શકાય છે.ટીએમસીએ કલ્યાણ બેનર્જી અને સાકેત ગોખલેને જેપીસી માં સામેલ કરવાનો પ્રસ્તાવ મૂક્યો છે. ઉલ્લેખનીય છે કે કોંગ્રેસ,ટીએમસી એસપી એઆઇએમઆઇએમ,ડીએમકેની સાથે એક દેશ એક ચૂંટણી બિલનો વિરોધ કર્યો હતો. જ્યારે એનડીએ, ટીડીપી અને જેડીયુમાં ભાજપના સહયોગી પક્ષોએ બિલને સમર્થન આપ્યું છે.
રાજકીય પક્ષોને જેપીસી માટે તેમના સાંસદોના નામ આપવા માટે કહેવામાં આવ્યું છે. કયા પક્ષના કેટલા સાંસદો હશે તે હજુ નક્કી નથી, પરંતુ લોકસભામાં સૌથી મોટી પાર્ટી હોવાના કારણે જેપીસીના અધ્યક્ષ હશે અને સૌથી વધુ સાંસદો ભાજપ પાસે હશે. નોંધનીય છે કે દેશમાં લોકસભા અને તમામ વિધાનસભાની ચૂંટણીઓ એકસાથે કરાવવા માટે સરકારે બંધારણ (૧૨૯મો) સુધારો બિલ લોકસભામાં રજૂ કર્યું છે. તેને એક દેશ એક ચૂંટણી બિલ કહેવામાં આવી રહ્યું છે.
સંસદ દ્વારા બિલ પસાર થયા પછી, રાષ્ટ્રપતિ ૨૦૨૯ માં લોકસભા ચૂંટણી પછી લોકસભાની પ્રથમ બેઠકની તારીખ નક્કી કરતી સૂચના જારી કરશે. જ્યારે ૨૦૨૯માં ચૂંટાયેલી લોકસભાનો કાર્યકાળ પૂર્ણ થશે, ત્યારે તમામ વિધાનસભાઓનો કાર્યકાળ પણ પૂર્ણ માનવામાં આવશે. જે બાદ ૨૦૩૪માં સમગ્ર દેશમાં એક સાથે ચૂંટણી યોજાઈ શકે છે.
