Nagpur,તા.07
ટીમ ઈન્ડિયાના કેપ્ટન રોહિત શર્માએ કહ્યું છે કે, ટીમ ચેમ્પિયન્સ ટ્રોફી પહેલાં કંઈપણ વિશેષ પ્રાપ્ત કરવાનો પ્રયાસ કરવા માંગતી નથી. પરંતુ શક્ય તેટલી બધી વસ્તુઓ સુધારવા માંગે છે.
ગુરુવારે પ્રથમ મેચમાં વિજય પછી, રોહિતે કહ્યું કે, એક ટીમ તરીકે, હું ઇચ્છું છું કે અમે ખાતરી કરીએ કે અમે શક્ય તેટલી યોગ્ય વસ્તુઓ કરવાનું ચાલું રાખીએ. તેમણે કહ્યું કે અમે બોલિંગ, બેટિંગની દ્રષ્ટિએ શક્ય તેટલું બધું સારું કરવા માંગીએ છીએ. તેમણે કહ્યું કે ટીમ ઈંગ્લેન્ડ સામે આમ કરવામાં ખૂબ જ સફળ રહી છે.
ટીમનાં પ્રદર્શનથી સંતુષ્ટ
ભારતીય કેપ્ટને કહ્યું કે, તે ભારતનાં પ્રદર્શનથી સંતુષ્ટ છે કારણ કે ટીમ લગભગ છ મહિના પછી વનડે રમી રહી હતી. તેમણે કહ્યું કે દરેક ખેલાડીને ખબર હતી કે આપણે લાંબા સમય પછી આ ફોર્મેટમાં રમી રહ્યાં છીએ.
તેથી ટીમ માટે ફરીથી એક થવું અને શું કરવું તે સમજવું મહત્વપૂર્ણ હતું. વિજય માટેની ક્રેડિટ બધાં બોલરોને જાય છે, બધાએ આ પ્રદર્શનમાં ફાળો આપ્યો છે.
કોહલીની ઘૂંટણની ઈજાએ ચિંતા વધારી
વિરાટ કોહલી જમણાં ઘૂંટણની પીડાને કારણે ઇંગ્લેન્ડ સામેની પ્રથમ વનડેમાં રમી શક્યો નહીં. તેની પીડાએ ભવિષ્યની ચિંતામાં વધારો કર્યો છે. વર્તમાન શ્રેણી સાથે, ભારત ચેમ્પિયન્સ ટ્રોફી માટેની તૈયારીઓના અંતિમ તબક્કા પર પહોંચી ગયું છે. કેપ્ટન રોહિતે ટોસ સમયે આ કહીને બધાને આશ્ચર્યચકિત કર્યા અને કહ્યું કે કમનસીબે કોહલી રમી રહ્યો નથી, તેને રાતથી જમણાં ઘૂંટણની મુશ્કેલી આવી રહી છે.
પાછળથી બીસીસીઆઈએ પણ આની પુષ્ટિ કરી. એવું માનવામાં આવે છે કે કોહલી બુધવારે નેટ સત્ર દરમિયાન લાંબા સમય સુધી બેટિંગ કરી શકયો ન હતો.
