Lucknow,તા.૨૪
આઇપીએલ ૨૦૨૫ માં, હાલમાં આરસીબી અને સનરાઇઝર્સ હૈદરાબાદ વચ્ચે મેચ રમાઈ રહી છે. આ મેચમાં જીતેશ શર્મા આરસીબીનું નેતૃત્વ કરી રહ્યા છે. તેઓએ ટોસ જીતીને પહેલા બોલિંગ કરવાનો નિર્ણય લીધો. નિયમિત કેપ્ટન રજત પાટીદારનો ઇમ્પેક્ટ પ્લેયર તરીકે સમાવેશ કરવામાં આવ્યો છે. મેચમાં, સનરાઇઝર્સ હૈદરાબાદના બેટ્સમેનોએ સારું પ્રદર્શન કર્યું અને માત્ર ૧૮ ઓવરમાં જ સ્કોર ૨૦૦ રનને પાર કરી ગયો.
સનરાઇઝર્સ હૈદરાબાદ તરફથી અભિષેક શર્મા ઓપનિંગ કરવા આવ્યો. તેણે ઇનિંગ્સની શરૂઆતથી જ વિસ્ફોટક બેટિંગ કરી અને આખા મેદાન પર સ્ટ્રોક માર્યા. આરસીબી તરફથી ભુવનેશ્વર કુમારે બીજી ઓવર ફેંકી. આ ઓવરના પાંચમા બોલ પર અભિષેકે શાનદાર સિક્સર ફટકારી. આ સિક્સર તેના બેટમાંથી નીકળીને સીધો સ્ટેડિયમમાં પાર્ક કરેલી ટાટા કર્વ કારના કાચ પર વાગ્યો, જેના કારણે તેમાં તિરાડો પડી ગઈ. ગાડીમાં ખાડો પણ હતો.
આઇપીએલ શરૂ થાય તે પહેલાં, ટાટા મોટર્સે જાહેરાત કરી હતી કે જો કોઈ બેટ્સમેન સીધો બોલ કાર પર મારે છે, તો તેઓ ગરીબ બાળકોને ૫ લાખ રૂપિયાની ક્રિકેટ કીટનું વિતરણ કરશે. હવે અભિષેકનો આ છ ટાટા મોટર્સની ખાસ પહેલનો ભાગ બની ગયો છે. તેણે મેચમાં ૧૭ બોલમાં ૩૪ રન બનાવ્યા, જેમાં ૩ ચોગ્ગા અને ૩ છગ્ગા ફટકાર્યા.
સનરાઇઝર્સ હૈદરાબાદની ટીમ ભલે આઇપીએલના પ્લેઓફમાં પહોંચી ન શકી, પરંતુ અભિષેક શર્માએ ટીમ માટે સારું પ્રદર્શન કર્યું. તેણે ટીમ માટે ૧૩ મેચમાં કુલ ૪૪૫ રન બનાવ્યા, જેમાં એક સદી અને બે અડધી સદીનો સમાવેશ થાય છે.
સનરાઇઝર્સ હૈદરાબાદ માટે બેટ્સમેનોએ સારું પ્રદર્શન કર્યું. ટીમ તરફથી ઈશાન કિશને ૯૪ રનની ઇનિંગ રમી. તેમના સિવાય અભિષેકે ૩૪ રનનું યોગદાન આપ્યું. અનિકેત વર્માએ ૨૬ રન બનાવ્યા. આ ખેલાડીઓના કારણે જ હૈદરાબાદની ટીમ ૨૩૧ રન બનાવી શકી. આરસીબી તરફથી રોમારિયો શેફર્ડે સૌથી વધુ બે વિકેટ લીધી.
