London,તા.૧૧
અમેરિકા અને ચીન વચ્ચે લાંબા સમયથી ચાલી રહેલો વેપાર વિવાદ હવે સમાધાનના માર્ગે છે. લંડનમાં બંને દેશો વચ્ચે વેપાર વાટાઘાટો પછી, એવા સંકેતો મળી રહ્યા છે કે બંને દેશો સમાધાન કરવા સંમત થયા છે. ચીની મીડિયાએ જણાવ્યું હતું કે અમેરિકા અને ચીન વેપાર વિવાદોના ઉકેલ માટે કરારને અમલમાં મૂકવા માટે એક માળખા પર સંમત થયા છે.
લંડનમાં બે દિવસની વાટાઘાટો પૂર્ણ થયા બાદ આ વાત બહાર આવી છે. ચીનની સરકારી સમાચાર એજન્સી અનુસાર, વાણિજ્ય નાયબ મંત્રી અને ચીનના આંતરરાષ્ટ્રીય વેપાર પ્રતિનિધિ લી ચેંગગેંગે જણાવ્યું હતું કે મે મહિનામાં જીનીવામાં યોજાયેલી વાટાઘાટોમાં બંને નેતાઓ વચ્ચે થયેલી સર્વસંમતિને અમલમાં મૂકવા માટે બંને પક્ષો એક માળખા પર સંમત થયા છે.
લી અને ચીનના વાણિજ્ય પ્રધાન વાંગ વેન્ટાઓ નાયબ વડા પ્રધાન હી લાઇફેંગના નેતૃત્વ હેઠળના પ્રતિનિધિમંડળનો ભાગ હતા. તેઓ બકિંગહામ પેલેસ નજીક ૨૦૦ વર્ષ જૂના હવેલી લેન્કેસ્ટર હાઉસ ખાતે યુએસ વાણિજ્ય સચિવ હોવર્ડ લુટનિક, ટ્રેઝરી સેક્રેટરી સ્કોટ બેસન્ટ અને વેપાર પ્રતિનિધિ જેમીસન ગ્રીરને મળ્યા હતા. મંગળવારે, લુટનિકે કહ્યું હતું કે વાટાઘાટો સારી રીતે ચાલી રહી છે અને તેમને આશા છે કે તે આખો દિવસ ચાલુ રહેશે.
રાષ્ટ્રપતિ ડોનાલ્ડ ટ્રમ્પે ગયા ગુરુવારે ચીનના નેતા શી જિનપિંગ સાથે લાંબી ફોન વાતચીત કરી હતી અને સંબંધોને પાટા પર લાવવાના પ્રયાસો શરૂ થયા હતા. ટ્રમ્પે બીજા દિવસે સોશિયલ મીડિયા પર કહ્યું કે સોમવારે લંડનમાં વેપાર વાટાઘાટો યોજાશે.
ટ્રમ્પના નિવેદન પછી ચીન અને અમેરિકા વચ્ચેનો વિવાદ વધ્યો. યુએસ પ્રમુખ ટ્રમ્પે ટ્રૂથ સોશિયલ પર લખ્યું કે ’ખરાબ સમાચાર એ છે કે ચીને અમારી સાથેના કરારનું સંપૂર્ણ ઉલ્લંઘન કર્યું છે, જે કેટલાક લોકો માટે આશ્ચર્યજનક નથી. હવે ’મિસ્ટર નાઇસ ગાય’ બનવાની જરૂર નથી. ટ્રમ્પે ઓવલ ઓફિસમાં કહ્યું કે તેઓ ચીનના રાષ્ટ્રપતિ શી જિનપિંગ સાથે વાત કરશે અને ઉકેલ શોધવાનો પ્રયાસ કરશે. આ પછી, ચીને ચીની વિદ્યાર્થીઓના વિઝા રદ કરવાના અને કમ્પ્યુટર ચિપ નિકાસ નિયંત્રણ સૂચનાઓ જારી કરવાના યુએસ પ્રમુખ ટ્રમ્પના નિર્ણય પર નારાજગી વ્યક્ત કરી.
નોંધનીય છે કે તાજેતરમાં જ જીનીવામાં યુએસ અને ચીન વચ્ચે બેઠક યોજાઈ હતી. આ પછી, બંનેએ એકબીજા પર લાદવામાં આવેલા ટેરિફને ૯૦ દિવસ માટે ઘટાડ્યા. યુએસે ચીની માલ પર ટેરિફ ૧૪૫ ટકાથી ઘટાડીને ૩૦ ટકા કર્યો. તે જ સમયે, ચીને પણ અમેરિકન માલ પરના કર ૧૨૫ ટકાથી ઘટાડીને ૧૦ ટકા કર્યા.
