Leeds,તા.૧૮
ભારત અને ઈંગ્લેન્ડ વચ્ચે ૫ મેચની ટેસ્ટ શ્રેણીની પહેલી મેચ ૨૦ જૂનથી લીડ્સના હેડિંગ્લી મેદાન પર રમાશે. આ મહત્વપૂર્ણ ટેસ્ટ મેચ પહેલા ભારતીય ટીમ લીડ્સ પહોંચી ગઈ છે. ખાસ વાત એ હતી કે આ દરમિયાન ફાસ્ટ બોલર હર્ષિત રાણા પણ ટીમ સાથે જોવા મળ્યો હતો. આ પ્રવાસ માટે તેને ટીમ ઈન્ડિયામાં વૈકલ્પિક ખેલાડી તરીકે સામેલ કરવામાં આવ્યો છે. ટીમ ઈન્ડિયાના ખેલાડીઓ બસ કે વિમાન દ્વારા નહીં પણ ટ્રેન દ્વારા લીડ્સ પહોંચ્યા હતા. લંડનથી લીડ્સનું અંતર લગભગ ૩૪૦ કિમી છે. આવી સ્થિતિમાં, ટીમ ઈન્ડિયાના ખેલાડીઓએ ટ્રેન દ્વારા લીડ્સ જવાનું પસંદ કર્યું. ટીમ ઈન્ડિયાએ આ મુસાફરીમાં લગભગ ૨ કલાક ૩૦ મિનિટનો સમય લીધો.
હર્ષિત રાણા અગાઉ ઈન્ડિયા એ ટીમનો ભાગ હતા અને તાજેતરમાં કેન્ટરબરીમાં ઈંગ્લેન્ડ લાયન્સ સામે પ્રથમ બિનસત્તાવાર ટેસ્ટ રમ્યા હતા. ૨૩ વર્ષીય ફાસ્ટ બોલરે ગયા વર્ષે ઓસ્ટ્રેલિયા સામે આંતરરાષ્ટ્રીય ક્રિકેટમાં પ્રવેશ કર્યો હતો. જોકે, ઈંગ્લેન્ડ સામેની આ ટેસ્ટ શ્રેણી માટે જાહેર કરાયેલી ૧૮ સભ્યોની મુખ્ય ટીમમાં તેમનું નામ નહોતું. મ્ઝ્રઝ્રૈંના એક સૂત્રએ માહિતી આપી હતી કે હર્ષિત રાણાને અવેજી ખેલાડી તરીકે બોલાવવામાં આવ્યો છે અને તે સોમવારે જ ટીમ સાથે લીડ્સ પહોંચ્યો હતો. જ્યારે ટીમ લંડનથી લીડ્સ જવા રવાના થઈ ત્યારે તે બાકીના ખેલાડીઓ સાથે લીડ્સ રેલ્વે સ્ટેશન પર જોવા મળ્યો હતો.
ભારતીય ટીમે અત્યાર સુધી ઇંગ્લેન્ડમાં ફક્ત એક જ પ્રેક્ટિસ મેચ રમી છે, જે બેકનહામ ખાતે ઇન્ડિયા એ સામે ઇન્ટ્રા-સ્ક્વોડ મેચ હતી. આ ઉપરાંત, કેએલ રાહુલ, કરુણ નાયર, યશસ્વી જયસ્વાલ, શાર્દુલ ઠાકુર, ધ્રુવ જુરેલ અને નીતિશ રેડ્ડી જેવા ખેલાડીઓ પહેલાથી જ ઇંગ્લેન્ડમાં હાજર હતા અને ઇન્ડિયા એ માટે ઇંગ્લેન્ડ લાયન્સ સામે રમી ચૂક્યા છે. હવે બધાની નજર ૨૦ જૂનથી શરૂ થનારી પહેલી ટેસ્ટ પર છે, જ્યાં બંને ટીમો ફરી એકવાર હેડિંગ્લી પીચ પર સ્પર્ધા કરતી જોવા મળશે. આ શ્રેણીમાં, યુવા શુભમન ગિલ ભારતીય ટીમનું નેતૃત્વ કરતો જોવા મળશે જ્યારે ઋષભ પંત ઉપ-કેપ્ટનની ભૂમિકામાં હશે.
બંને ટીમોની ટીમ
ઇંગ્લેન્ડ પ્રવાસ માટે ભારતીય ટેસ્ટ ટીમઃ શુભમન ગિલ (કેપ્ટન), ઋષભ પંત (ઉપ-કેપ્ટન અને વિકેટકીપર), યશસ્વી જયસ્વાલ, કેએલ રાહુલ, સાઈ સુદર્શન, અભિમન્યુ ઈશ્વરન, કરુણ નાયર, નીતિશ રેડ્ડી, રવિન્દ્ર જાડેજા, ધ્રુવ જુરેલ (વિકેટકીપર), વોશિંગ્ટન સુંદર, શાર્દુલ ઠાકુર, જસપ્રીત બુમરાહ, મોહમ્મદ સિરાજ, પ્રખ્યાત કૃષ્ણ, આકાશ દીપ, અર્શદીપ સિંહ, કુલદીપ યાદવ, હર્ષિત રાણા.
ભારત સામેની પ્રથમ ટેસ્ટ માટે ઇંગ્લેન્ડ ટીમઃ બેન સ્ટોક્સ (કેપ્ટન), શોએબ બશીર, જેકબ બેથેલ, હેરી બ્રુક, બ્રાયડન કાર્સ, સેમ કૂક, જેક ક્રોલી, બેન ડકેટ, જેમી ઓવરટન, ઓલી પોપ, જો રૂટ, જેમી સ્મિથ, જોશ ટોંગ, ક્રિસ વોક્સ.
