Moscow,તા.૨૬
કોંગ્રેસ નેતા શશી થરૂર બુધવારે મોસ્કોમાં એક કાર્યક્રમ દરમિયાન રશિયન વિદેશ મંત્રી સેર્ગેઈ લવરોવને મળ્યા હતા. થરૂર તેમના પુસ્તક “ઈન્ગ્લોરિયસ એમ્પાયર” પર આધારિત દસ્તાવેજી શ્રેણીના પ્રચાર માટે ખાનગી મુલાકાતે રશિયા ગયા છે. રશિયાની મુલાકાતે આવેલા થરૂરે સોશિયલ મીડિયા પ્લેટફોર્મ ઠ પર એક પોસ્ટમાં કહ્યું, “મોસ્કોમાં ’પ્રાઇમાકોવ રીડિંગ્સ’ દરમિયાન જૂના મિત્ર રશિયન વિદેશ પ્રધાન સેરગેઈ લવરોવને મળીને આનંદ થયો.” પ્રાઇમાકોવ રીડિંગ્સ એ આંતરરાષ્ટ્રીય સંબંધો અને વિશ્વ અર્થતંત્ર પર ધ્યાન કેન્દ્રિત કરતી વાર્ષિક આંતરરાષ્ટ્રીય બેઠક છે.
થરૂર રશિયાના રાજ્ય ટેલિવિઝન નેટવર્કના આમંત્રણ પર આવ્યા છે.આરટીએ તેમના ૨૦૧૭ ના પુસ્તક પર આધારિત ૧૦ ભાગની દસ્તાવેજી શ્રેણી બનાવી છે. આ દસ્તાવેજી શ્રેણી ૨૦૧૫ ના ઓક્સફોર્ડ યુનિયન ડિબેટમાં આપેલા થરૂરના ભાષણ પર આધારિત છે, જેનો વિષય હતો “શું બ્રિટન તેની ભૂતપૂર્વ વસાહતોને વળતર આપવા માંગે છે?”
શશી થરૂરે સંયુક્ત રાષ્ટ્રમાં ભૂતપૂર્વ રશિયન રાજદૂત આન્દ્રે ડેનિસોવને પણ મળ્યા, જે હવે રશિયન ફેડરેશન કાઉન્સિલની આંતરરાષ્ટ્રીય બાબતોની સમિતિના પ્રથમ ઉપાધ્યક્ષ છે. આ બાબતથી પરિચિત લોકોએ જણાવ્યું હતું કે થરૂરે રશિયન અધિકારીઓને ઓપરેશન સિંદૂર અને આતંકવાદ સામેની ભારતની લડાઈ વિશે માહિતી આપી હતી. થરૂરે ઈરાન-ઈઝરાયલ સંઘર્ષ, ગાઝાની પરિસ્થિતિ અને ભારત-રશિયા સંબંધો જેવા મુદ્દાઓ પર પણ ચર્ચા કરી હતી.
થરૂરે તાજેતરમાં જ સરકાર દ્વારા ૩૩ દેશોમાં મોકલવામાં આવેલા સાત સર્વપક્ષીય પ્રતિનિધિમંડળમાંથી એકનું નેતૃત્વ કરતી વખતે આવી જ ભૂમિકા ભજવી હતી. ૨૨ એપ્રિલના પહેલગામ આતંકવાદી હુમલા અને ત્યારબાદ થયેલી લશ્કરી કાર્યવાહી અંગે ભારતનું વલણ સમજાવવા માટે થરૂરે અમેરિકા અને અન્ય ચાર દેશોની મુલાકાત લીધી હતી.
આ દરમિયાન, અમે તમને એ પણ જણાવી દઈએ કે શશી થરૂરને લઈને કોંગ્રેસમાં હોબાળો ચાલી રહ્યો છે. કોંગ્રેસ પ્રમુખ મલ્લિકાર્જુન ખડગેએ થરૂરનો સીધો ઉલ્લેખ કર્યા વિના કહ્યું કે પાર્ટી માટે તે “દેશ પહેલા” છે પરંતુ કેટલાક વ્યક્તિઓ માટે તે “મોદી પહેલા” છે. થોડા સમય પછી, થરૂરે સોશિયલ મીડિયા પર એક પોસ્ટ દ્વારા ખડગેની ટિપ્પણીઓનો જવાબ આપ્યો, જેમાં કહ્યુંઃ “ઉડવાની પરવાનગી ન માગો. પાંખો તમારી છે. અને આકાશ કોઈનું નથી…”
