Birmingham,તા.3
એન્ડરસન-તેંડુલકર ટ્રોફીની બીજી ટેસ્ટનો પહેલો દિવસ ભારતીય ટીમના પક્ષમાં ગયો. ટીમ ઈન્ડિયાએ બુધવારના ઈંગ્લેન્ડ સામેના રમતના અંત સુધીમાં 5 વિકેટે 310 રન બનાવ્યા હતા.
કેપ્ટન શુભમન ગિલ 114 રન બનાવીને અણનમ રહ્યો અને રવિન્દ્ર જાડેજા 41 રન બનાવીને અણનમ રહ્યો. બંનેએ છઠ્ઠી વિકેટ માટે 99 રનની અણનમ ભાગીદારી કરી છે. ઓપનર યશસ્વી જયસ્વાલ 87 રન બનાવીને આઉટ થયો હતો. કરુણ નાયરે 31 રન અને રિષભ પંતે 25 રનનું યોગદાન આપ્યું હતું.
બર્મિંગહામના એજબેસ્ટન સ્ટેડિયમ ખાતે રમાઈ રહેલી આ મેચમાં ઇંગ્લેન્ડે ટોસ જીતીને બોલિંગ કરવાનો નિર્ણય લીધો હતો. પહેલા સત્રમાં 98 રનમાં 2 વિકેટ ગુમાવ્યા બાદ, ભારતીય ટીમે ચાના વિરામ સુધી સારી વાપસી કરી હતી.
અહીં ભારતીય ટીમનો સ્કોર 182/3 હતો. પરંતુ, ટીમે ત્રીજા સત્રની શરૂઆતમાં સતત બે ઓવરમાં ઋષભ પંત અને નીતિશ કુમાર રેડ્ડીની વિકેટ ગુમાવી દીધી હતી.
5 બેટ્સમેન 211 રન પર પેવેલિયન પરત ફર્યા હતા. આવી સ્થિતિમાં, કેપ્ટન શુભમન ગિલ અને રવિન્દ્ર જાડેજાએ છઠ્ઠી વિકેટ માટે અણનમ 99 રનની ભાગીદારી કરી. ઇંગ્લેન્ડ તરફથી ક્રિસ વોક્સે 2 વિકેટ લીધી. બ્રાઇડન કાર્સ, શોએબ બશીર અને બેન સ્ટોક્સને એક-એક વિકેટ મળી.
ગિલે સતત બે ચોગ્ગા સાથે સદી ફટકારી
ભારતીય કેપ્ટન શુભમન ગિલે 80મી ઓવરમાં પોતાની સદી પૂર્ણ કરી. તેણે જો રૂટની ઓવરના છેલ્લા બે બોલ પર બે ચોગ્ગા ફટકારીને પોતાની સદી પૂર્ણ કરી. ત્યારબાદ ભારતીય કેપ્ટને પોતાની શૈલીમાં સદીની ઉજવણી કરી.
વોક્સે કેએલ રાહુલને બોલ્ડ કર્યો
ભારતીય ટીમે 9મી ઓવરમાં પોતાની પહેલી વિકેટ ગુમાવી દીધી. અહીં ઓપનર કેએલ રાહુલ 2 રન બનાવીને આઉટ થયો. તેને ક્રિસ વોક્સે બોલ્ડ કર્યો.
બંને ટીમોના ખેલાડીઓ કાળી પટ્ટી પહેરીને બહાર આવ્યા હતા
ઇંગ્લેન્ડના ભૂતપૂર્વ ક્રિકેટર વેઇન લાર્કિન્સનું 71 વર્ષની વયે નિધન થયું તો તેમને શ્રદ્ધાંજલિ આપવા માટે, બંને ટીમોના ખેલાડીઓ હાથમાં કાળી પટ્ટી બાંધીને બહાર આવ્યા હતા.
