New Delhi, તા. 28
દવા અને હેલ્થકેર ક્ષેત્રની દિગ્ગજ કંપની જોનસન એન્ડ જોનસન (J&J) એ તેના બેબી પાવડર અને અન્ય ટાલ્ક આધારિત પ્રોડક્ટ્સથી ઓવેરિયન કેન્સર થવાના આક્ષેપ કરતાં આશરે 76,000 કેસોને ઉકેલવા માટે 5.5 અબજ ડોલર ચૂકવવાની સંમતિ દર્શાવી છે.
કોર્પોરેટ ઈતિહાસનાં સૌથી મોટા પ્રોડક્ટ લાયબિલિટી વિવાદોમાંના એક એવા આ કેસને પૂરો કરવા માટે આ એક મોટું પગલું છે, પરંતુ આ કરાર ત્યારે જ અમલી બનશે જ્યારે ઓછામાં ઓછા 95 ટકા દાવાકર્તાઓ (ક્લેમર્સ) તેને સ્વીકારશે.
કંપનીએ હંમેશાં પોતાનાં પાવડર આધારિત ઉત્પાદનો સંપૂર્ણપણે સુરક્ષિત હોવાનો અને તેમાં એબેસ્ટોસ કે કેન્સરકારક તત્વો ન હોવાનો દાવો કર્યો છે. જો કેન્સરના દાવાઓમાં દમ ન હોવા છતાં, વર્ષોથી ચાલી આવતી ખર્ચાળ અને અનિશ્ચિત કાનૂની લડાઈ પાછળનો સમય અને શક્તિ બચાવવા માટે કંપની આ સમાધાન તરફ આગળ વધી રહી છે. કંપની 2027 માં આશરે 3 અબજ ડોલર ચૂકવશે અને બાકીની રકમ 2028 માં ચૂકવવાનું આયોજન છે, જે પાત્ર અરજદારોની સંખ્યાના આધારે 7 અબજ ડોલર સુધી પણ પહોંચી શકે છે.
આ વિવાદની શરૂઆત ત્યારે થઈ હતી જ્યારે અનેક મહિલાઓએ દાવો કર્યો હતો કે વર્ષો સુધી જોનસન એન્ડ જોનસનના પાવડરના ઉપયોગથી તેમને ઓવેરિયન કેન્સર થયું છે અને આ પાવડરમાં હાનિકારક તત્વો હાજર હતાં. આ ગંભીર સમસ્યાઓને ધ્યાનમાં રાખીને કંપનીએ 2020 માં જ યુએસમાં ટાલ્ક-આધારિત બેબી પાવડરનું વેચાણ સત્તાવાર રીતે બંધ કરી દીધું હતું અને તેના બદલે મકાઈના લોટ (કોર્નસ્ટાર્ચ) આધારિત સુરક્ષિત વિકલ્પ રજૂ કર્યો હતો.
આ લાંબી કાનૂની લડાઈ દરમિયાન કંપની દ્વારા અગાઉ નાદારી (બેન્કરપ્સી) ની વિવાદાસ્પદ ‘ટેક્સાસ ટુ-સ્ટેપ’ સ્ટ્રેટેજી પણ અપનાવવામાં આવી હતી જે અગાઉ નિષ્ફળ રહી હતી. આ નવા સમજૂતી કરારમાં વર્તમાન કેસો પર ધ્યાન કેન્દ્રિત કરવામાં આવ્યું છે અને ભવિષ્યનાં નવા દાવાઓને બાકાત રાખવામાં આવ્યા છે જેથી વળતર ઝડપથી મળી શકે. જો 95 ટકા ક્લેમર્સ આ શરતો સ્વીકારી લે છે, તો આ દશકા જૂનો ઐતિહાસિક કોર્પોરેટ વિવાદ કાયમ માટે સમાપ્ત થઈ જશે.
