Manchester,તા.21
ઓલ્ડ ટ્રેફોર્ડ ટેસ્ટ પહેલા જ ઈજાઓએ ટીમ ઈન્ડિયાની મુશ્કેલીઓ વધારી દીધી છે. લોર્ડ્સમાં કઠિન મેચ હાર્યા બાદ, ભારતીય ટીમ પાંચ મેચની શ્રેણીમાં 1-2 થી પાછળ છે. વિકેટકીપર-બેટ્સમેન ઋષભ પંત પછી, ઝડપી બોલર આકાશ દીપ, અર્શદીપ અને ઓલરાઉન્ડર નીતિશ કુમાર રેડ્ડીની ઈજાએ ભારતીય ટીમની શ્રેણી બરાબર કરવાની આશાઓ પર પાણી ફેરવી દીધું છે.
અર્શદીપ અને આકાશ 23 જુલાઈથી શરૂઆતની ટેસ્ટમાંથી લગભગ બહાર થઈ ગયો છે. આ બંનેના કવર તરીકે, હરિયાણાના ફાસ્ટ બોલર અંશુલ કંબોજને છેલ્લી બે મેચ માટે પહેલીવાર ભારતીય ટીમમાં સામેલ કરવામાં આવ્યો છે.
ગ્રોઈન ઈજાથી પીડાતા આકાશે બીજી અને ત્રીજી ટેસ્ટ રમી હતી. પંજાબનો ડાબોડી ઝડપી બોલર અર્શદીપ હજુ સુધી આ શ્રેણીમાં રમી શક્યો નથી. તેને પહેલીવાર ટેસ્ટ શ્રેણી માટે ટીમમાં સામેલ કરવામાં આવ્યો છે. ગુરુવારે બેકનહામમાં નેટ સેશન દરમિયાન સાઈ સુદર્શનનો શોટ બચાવતી વખતે અર્શદીપને ડાબા હાથમાં ઈજા થઈ હતી.
સૂત્રોના જણાવ્યા અનુસાર, રવિવારે જીમ સત્ર દરમિયાન નીતિશના જમણા ઘૂંટણમાં ઇજા થઈ હતી. તે બીજી અને ત્રીજી ટેસ્ટમાં પ્લેઇંગ ઇલેવનનો ભાગ હતો. નીતિશ, અર્શદીપ અને આકાશ એ ત્રણનું રમવું મુશ્કેલ છે. લોર્ડ્સમાં પંતને તેની તર્જની આંગળીમાં પણ ઈજા થઈ હતી.
આ પછી તેણે વિકેટકીપિંગ કર્યું ન હતું. તે હવે સંપૂર્ણપણે સ્વસ્થ થયો નથી. એવું માનવામાં આવે છે કે, જો તે સંપૂર્ણપણે સ્વસ્થ નહીં થાય તો જુરેલ વિકેટ પાછળની જવાબદારી સંભાળશે. પંત ટીમમાં બેટ્સમેન તરીકે જોડાશે. શ્રેણીમાં ટકી રહેવા માટે, ભારતીય ટીમે કોઈપણ ભોગે ચોથી ટેસ્ટ જીતવી પડશે. જોકે, આ સ્ટેડિયમમાં ભારતીય ટીમનો રેકોર્ડ પણ સારો નથી. ટીમ નવમાંથી એક પણ ટેસ્ટ જીતી શકી નથી.
સહાયક કોચ રાયન ટેન ડોઇશકોટે કહ્યું હતું કે, માન્ચેસ્ટર ટેસ્ટ નજીક આવતાની સાથે અમે ટીમ કોમ્બિનેશન અંગે નિર્ણય લઈશું, ખાસ કરીને અર્શદીપની સ્થિતિને ધ્યાનમાં રાખીને. તેને કટ છે પરંતુ તે કેટલો ઊંડો છે તે જોવાનું બાકી છે. મેડિકલ ટીમ તેને ડોક્ટર પાસે લઈ જવાયા છે જોવાનું રહ્યું કે ટાંકા આવશે કે નહીં. આકાશની ઈજાએ ટીમ મેનેજમેન્ટની માથાનો દુખાવો વધારી દીધો છે.
આકાશે 58 વર્ષમાં એજબેસ્ટનમાં ભારતની પહેલી જીતમાં અને શ્રેણી બરાબર કરવામાં મુખ્ય ભૂમિકા ભજવી હતી. તેણે મેચમાં દસ વિકેટ લીધી હતી. લોર્ડ્સમાં બીજી ઇનિંગમાં હેરી બુકની વિકેટ લીધા પછી આકાશની સમસ્યા શરૂ થઈ. ચોથા દિવસે બપોરે તે સારવાર માટે મેદાન છોડી ગયો. સિરાજ એકમાત્ર ભારતીય ફાસ્ટ બોલર છે જેણે ત્રણેય મેચ રમી છે.
અંશુલે રણજીમાં દસ વિકેટ લીધી
હરિયાણાના કરનાલના 24 વર્ષીય અંશુલ કંબોજે ગયા વર્ષે રણજી ટ્રોફી મેચમાં એક ઇનિંગમાં બધી દસ વિકેટ લઈને હેડલાઇન્સમાં સ્થાન મેળવ્યું હતું. તેણે રોહતકના હોમ ગ્રાઉન્ડ લાહલી ખાતે કેરળ સામે આ સિદ્ધિ મેળવી હતી.
તે બંગાળના પ્રેમાંશુ ચેટર્જી (1956-57) અને રાજસ્થાનના પ્રદીપ સોમસુંદરમ (1985-86) પછી આવું કરનાર ત્રીજો બોલર બન્યો હતો. તેણે છ રણજી મેચમાં કુલ 34 વિકેટ લીધી હતી.
આકાશે બેકનહામમાં પ્રેક્ટિસ કરી ન હતી
બેકનહામમાં ટીમના પ્રેક્ટિસ સેશન દરમિયાન આકાશે બોલિંગ કે બેટિંગ કરી ન હતી. તેણે ટ્રેનર એડ્રિયન લે રોક્સની દેખરેખ હેઠળ ફિટનેસ કસરતો કરી હતી. તેની ઈજા ગંભીર છે કે નહીં તે સોમવારે ભારત મીડિયા બ્રીફિંગ કરશે ત્યારે જ ખબર પડશે. જોકે, આકાશ અને અર્શદીપ બંને શનિવારે ટીમ સાથે લંડનથી માન્ચેસ્ટર પહોંચ્યા છે.
બુમરાહ રમશે કે નહીં તે અંગે પરિસ્થિતિ સ્પષ્ટ નથી
જસપ્રીત બુમરાહના રમવા અંગે હજુ પણ પરિસ્થિતિ સંપૂર્ણપણે સ્પષ્ટ નથી. વર્કલોડને કારણે તેને ફક્ત ત્રણ ટેસ્ટ રમવાની રહેશે તે નક્કી થઈ ગયું છે. તે પહેલાથી જ બે ટેસ્ટ રમી ચૂક્યો છે અને બે બાકી છે. જોકે દેશકોટે ચોથી ટેસ્ટમાં રમવાનો સંકેત આપ્યો હતો, પરંતુ તેણે એ પણ સ્પષ્ટ કર્યું કે અંતિમ નિર્ણય મેચની નજીક લેવામાં આવશે.
