Rajkot તા.24
ટ્રાફીક કાયદા ભંગમાં અસરકારક કામગીરી ન હોવાના મુદ્દે હાઈકોર્ટની ફટકાર તથા વધતા જીવલેણ અકસ્માતોને ધ્યાને રાખીને રાજકોટમાં તહેવારો પૂર્ણ થયા બાદ મોટાપાયે હેલ્મેટ સહીતની ટ્રાફીક ડ્રાઈવ યોજવામાં આવશે.
રાજકોટમાં ચાલુ વર્ષનાં છ માસમાં 20 જીવલેણ અકસ્માતોમાં 20 લોકોએ જીવ ગુમાવ્યા છે. 9 ગંભીર અકસ્માતોમાં 9 ને ગંભીર ઈજા થઈ છે.ત્યારે શહેર માર્ગ સલામતી સમિતીની બેઠકમાં પોલીસ કમિશનરે ટ્રાફીક સહિતના મામલે ખાસ ડ્રાઈવ શરૂ કરવાની સુચના આપી હતી.
દ્વિચક્રી વાહન ચાલકોમાં અકસ્માત જીવલેણ ન બને તે માટે સરકાર દ્વારા કરવામાં આવેલા આદેશ મુજબ શહેરમાં હેલ્મેટ ફરજીયાત હોવાનું જણાવી આગામી દિવસોમાં હેલ્મેટ ચેકીંગ ડ્રાઈવ પુન: શરૂ કરવા પોલીસ કમિશનરે ખાસ સૂચના આપી હતી. આગામી દિવસોમાં તહેવાર પૂર્ણ થયા બાદ તા. 8 સપ્ટેમ્બરથી શહેરમાં હેલ્મેટ અંગેની મેગા ડ્રાઈવ શરુ કરવામાં આવશે તેમ બ્રજેશકુમારે નિર્દેશ આપ્યો હતો.
બેઠકમાં બ્રજેશકુમારે હાઈ-વે પર અકસ્માતના કારણોમાં લોકો દ્વારા ગેરકાયદે તોડવામાં આવતા મીડિયન ગેપ બુરી દેવા અને તેનો વિરોધ કરે તેમના વિરુધ્ધ સખત કાર્યવાહી કરવા ખાસ સૂચના આપી હતી. તેમજ રોંગ સાઈડમાં આવતા વાહન ચાલકો વિરુધ્ધ કામગીરી કરવા પોલીસ વિભાગ તેમજ આર.ટી.ઓ.ને સૂચનાઓ આપી હતી.
રાજકોટ શહેર ટ્રાફિક પોલીસ ડી.સી.પી પૂજા યાદવે શહેરમાં ટ્રાફિક પોલીસ, આર.ટી.ઓ. તેમજ આર.એમ.સી. દ્વારા ટ્રાફિક બસના ડ્રાઈવરના ચેકિંગ અંગે કરેલ કામગીરીની વિગતો રજુ કરી હતી. તેમજ હેલ્મેટ, સીટ બેલ્ટ, ડ્રાંઇવિંગ લાઇસન્સ સહીત ચેકીંગ અંગે કરવામાં આવેલ ડ્રાઈવ, ગેરકાયદે ચાલતા છકડા વિરુદ્ધ કરવામાં આવેલ કામગીરીની વિગતવાર માહિતી રજુ કરી હતી.
આર.ટી.ઓ. અધિકારી કેતન ખપેડે ટ્રાફિક ડ્રાઈવ અને માર્ગ સલામતી માસની ઉજવણી અંતર્ગત કરેલ કામગીરીની માહિતી પુરી પાડી હતી રાજ્ય સરકાર દ્વારા માર્ગ અકસ્માતમાં ઘાયલને રૂ. 1.50 લાખ સુધી કેશલેસ સારવાર મળવાપાત્ર હોવાનો ઉલ્લેખ કરી હોસ્પિટલ દ્વારા તેમાં સહકાર મળે તે માટે ખાસ ભાર મુક્યો હતો. તેમજ હિટ એન્ડ રન કેસમાં પણ ઘાયલને વળતર મળવાપાત્ર હોવાનું પોલીસ કમિશનર શ્રીએ જણાવ્યું હતું.
