New Delhiતા.5
સોના-ચાંદીમાં કેટલાંક વખતથી વારાફરતી તેજી-મંદી થવા સાથે અનિશ્ચિત માહોલ રહ્યો છે ત્યારે આજે ભાવમાં જબરી તેજી થઈ હતી. ભારતમાં તહેવારોની સીઝન શરૂ થવા લાગતા જ ભાવ સુધરતા ગ્રાહકોથી માંડીને ઈન્વેસ્ટરો આવતા દિવસોના ટ્રેન્ડ પર નજર તાકવા લાગ્યા છે.
રાજકોટમાં આજે દસ ગ્રામ સોનાનો હાજર ભાવ ફરી 1.50 લાખના સ્તરે આવી ગયો હતો તેમાં 2500 રૂપિયાનો ઉછાળો હતો. કોમોડીટી વાયદામાં 1900નો ઉછાળો હતો અને ભાવ 146200 થયો હતો. વર્લ્ડ માર્કેટમાં સોનુ 4163 ડોલર હતું.
સોનાની જેમ ચાંદીના ભાવમાં પણ ઉછાળો હતો. હાજર ચાંદી 6300ના ઉછાળાથી 232400 હતી. વાયદામાં 4750ના ઉછાળાથી 226375 હતી. જયારે વિશ્વબજારમાં ભાવ 61.56 ડોલરે પહોંચ્યો હતો.
વેપારીઓના કહેવા પ્રમાણે સોના-ચાંદીની તેજી વૈશ્વિક ઘટનાક્રમો આધારિત છે. મધ્યપુર્વમાં યુદ્ધ સમજુતી થવાના તથા વૈશ્વિક વ્યાપાર નોર્મલ બની જવાના આશાવાદની અસર હતી.
આ સ્થિતિમાં તહેવારો ટાણે જ લોકમાનસ બદલાઈ શકે અને ફેસ્ટીવલ સિઝનમાં સારી ઘરાકી નિકળવાનો આશાવાદ ઉભો થયો છે. તહેવારોની સીઝન ટાણે જ તેજીનો કરંટ સૂચક છે. જો કે, વૈશ્વિક સ્થિતિ હજુ અસ્થિર છે. ચિત્ર સ્પષ્ટ નથી એટલે આવતા દિવસોમાં કેવો ટ્રેન્ડ રહે છે તેના પર નજર રહેશે.
રીટેઈલ માર્કેટમાં હાલ સોના-ચાંદીની ખરીદી ધીમી જ છે પરંતુ આગામી ફેસ્ટીવલ સિઝનમાં વધવાનો આશાવાદ છે. સીઝન ટાણે જ ભાવનો ટ્રેન્ડ મહત્વનો બનશે. એક વર્ગ તેજીની આશા રાખી જ રહ્યો છે જયારે બીજો વર્ગ વર્તમાન સ્તરે ભાવો અટવાતા રહેવાનો મત દર્શાવે છે.
