જયરાજ પ્લોટના ટાઈટલ વિવાદમાં કોર્પોરેશનની દાદાગીરી ન ચાલી: રજી. દસ્તાવેજથી ખરીદેલી મિલ્કતમાં ત્રાહિતની અરજી પર પરવાનગી રોકતા હાઈકોર્ટે હુકમ રદ કર્યો
Rajkot,તા.31
રાજકોટ મ્યુનિસિપલ કોર્પોરેશનની ટાઉન પ્લાનિંગ શાખા સિવિલ કોર્ટ નથી, તેને મિલકતનો ટાઈટલ નક્કી કરવાની કોઈ સત્તા નથી, તેમ છતાં જયરાજ પ્લોટની કાયદેસર ખરીદેલી મિલકતના બાંધકામમાં ત્રાહિત વ્યક્તિની ફરિયાદ પર પરવાનગી સ્થગિત કરી દેતા હાઈકોર્ટ લાલઘૂમ થઈ છે. જસ્ટિસ નિખીલ કરેલે કોર્પોરેશનને આકરા સવાલો પૂછી 50 હજારનો દંડ ફટકારી બાંધકામ પરવાનગી રદ કરવાનો હુકમ રદ કર્યો છે, જેનાથી કોર્પોરેશનમાં હાહાકાર મચી ગયો છે.
શહેરમાં જયરાજ પ્લોટ શેરી નં.૪/૧૧માં આવેલ સીટી સર્વે વોર્ડ નં.૪ તથા સીટી સર્વે નં.૧૧૪૨ની મિલ્કત રજી.વેચાણ દસ્તાવેજથી કલ્પેશ નરેન્દ્રભાઈ ગઢીયા અને ભરતભાઈ નરેન્દ્રભાઈ ગઢીયા દ્વારા ખરીદ કરી સક્ષમ ઓથોરીટી પાસે નિયમ અનુસાર બાંધકામ પરવાનગી મેળવેલ અને તે અન્વયે નિયમ અનુસારની થતી રકમની ચુકવણી કોર્પોરેશનની ટાઉન પ્લાનીંગ શાખામાં કરી હતી. બાંધકામ શરુ કર્યું પરંતુ, સદરહુ બાંધકામમાં દિગવિજયસિંહ ચૌહાણ દ્વારા એવી કોર્પોરેશન સમક્ષ રજુઆત કરવામાં આવી કે આ મિલ્કતમાં તેઓનો હક્ક છે અને તે સબંધેની ફરીયાદ પોલીસ સ્ટેશનમાં કરી છે.ચેપ્ટર કેસ કરવામાં આવ્યો છે.
કોર્પોરેશન પાસે ફરીયાદ આવતાં બાંધકામ પરવાનગી મેળવનાર કલ્પેશ ગઢીયા અને ભરતભાઈ ગઢીયાને નોટીસ કરતાં તેઓએ નોટીસના જવાબમાં જણાવેલ કે, આ મિલ્કત તેઓએ રજી.વેચાણ દસ્તાવેજના આધારે ખરીદ કરી છે. તેઓ મિલ્કતના માલીક છે અને ફરીયાદ કરનાર પાસે કોઈ લોકસ ન હોય કે ટાઈટલ ન હોય કે તેઓએ કહેવાતી મિલ્કત ત્રાહિત વ્યકિતને વેચાણ કર્યા બાદ આવી ફરીયાદ કરવાનો તેઓને કોઈ હકક ન હોય. માત્ર માલાફાઈડ ઈન્ટેન્શનથી જ હાલની ફરીયાદ કરી છે જે ફરીયાદનો નિકાલ કરવાની સત્તા કોર્પોરેશનને ન હોય જેથી ફરીયાદ દફતરે કરવા વિનંતી કરી છે.પરંતુ, કોર્પોરેશન દ્વારા તેમના પેનલના એડવોકેટ દ્વારા અભિપ્રાય લેવામાં આવેલ અને અભિપ્રાયના અંતે તેઓ દ્વારા બાંધકામ પરવાનગી આપવામાં આવેલ તે બાંધકામ પરવાનગીમાં ટાઈટલ ડીમ્પ્યુટ છે તેમ જણાવી બાંધકામ પરવાનગી સ્થગિત કરી હતી.
રેકર્ડ પરનાં માલીક દ્વારા કોર્પોરેશને જે બાંધકામ પરવાનગી સ્થગિત કરવાનો જે હુકમ કરેલ તેની સામે હાઈકોર્ટ સમક્ષ સ્પે.સીવીલ ચેલેન્જ કર્યો હતો.જેમાં હાઈકોર્ટના જસ્ટીસ નિખીલ કરેલ દ્વારા કોર્પોરેશનને ટાઈટલ નકકી કરવાની સત્તા છે કે કેમ? ગુજરાત મ્યુનિસીપલ કોર્પોરેશન એકટમાં રાજકોટ ટાઉન પ્લાનીંગ શાખાને મિલ્કતના ટાઈટલમાં હસ્તક્ષેપ કરવાની સત્તા છે કે કેમ? રાજકોટ કોર્પોરેશન સીવીલ કોર્ટની સત્તા વાપરી શકે કે કેમ? કોઈ લીગલ ઓપીનીયનના આધારે કોઈના બંધારણીય હકક છીનવી શકાય કે કેમ? તેવા વૈઘક સવાલો પુછવામાં આવેલ. પરંતુ, હાઈકોર્ટ સમક્ષ આવા કોઈ પ્રશ્નનો ઉત્તર કાયદાની દૃષ્ટિએ તથા હકીકતની દૃષ્ટિએ રાજકોટ કોર્પોરેશન દ્વારા આપવામાં આવેલ નહીં. હાઈકોર્ટ દ્વારા રાજકોટ કોર્પોરેશનની ટાઉન પ્લાનીંગ શાખાની વર્તુણુંક ઘ્યાને લઈ તેઓ દ્વારા બાંધકામ પરવાનગી સ્થગિત કરવાનો જે હુકમ કરવામાં આવેલ તે હુકમ ‘રદ’ કરી અરજદારોની અરજી ‘મંજુર’ કરી અને રાજકોટ કોર્પોરેશન દ્વારા અરજદારોને રૂા. ૫૦,૦૦૦રકમ ચુકવવાનો આદેશ કર્યો છે .
અરજદારો કલ્પેશ નરેન્દુભાઈ ગઢીયા અને ભરતભાઈ નરેન્દ્રભાઈ ગઢીયા તરફે સીનીયર કાઉન્સીલ મેહુલભાઈ શાહ, ખીલન ચાંદરાણી, આદિત્ય પંડયા, રાજકોટના એડવોકેટ દિલીપ ચાવડા, હાર્દિક જાદવ તેમજ આસીસ્ટન્ટ તરીકે અનિરૂધ્ધ સોલંકી, પ્રતિક પંડયા, દર્શિત ટોળીયા, પાર્થ બારાવ્યા, પાર્થ ઈશીયાણી રોકાયેલ હતા.
