New Delhi તા, 1
બીસીસીઆઈ સેન્ટર ઓફ એક્સેલન્સ ખાતે ટ્રેનિંગ દરમ્યાન પગમાં અસ્વસ્થતા અને નવી ઈજાના લક્ષણો દેખાતાં હાર્દિક પંડ્યાની આંતરરાષ્ટ્રીય ક્રિકેટમાં વાપસી વધુ વિલંબિત થઈ છે.
ટીમ સિલેક્શન માટે આ અઠવાડિયે પસંદગીકારોની બેઠક યોજાવાની છે, પરંતુ હાલનાં તબીબી રિપોર્ટ દર્શાવે છે કે 13 સપ્ટેમ્બરથી શરૂ થનારી અફઘાનિસ્તાન સામેની ત્રણ T20 મેચોની શ્રેણી સુધી પંડ્યા સંપૂર્ણ ફિટનેસ મેળવી શકે તેમ નથી. તે બેટિંગ અને સામાન્ય મુવમેન્ટમાં બરાબર કામ કરી રહ્યો છે, પરંતુ મેડિકલ ટીમે તેને બોલિંગ અટકાવીને આરામ કરવાની સલાહ આપી છે.
મે 24ના રોજ આઈપીએલમાં મુંબઈ ઈન્ડિયન્સ તરફથી રમ્યાં બાદ 32 વર્ષીય પંડ્યા એક પણ સ્પર્ધાત્મક મેચ રમ્યો નથી. માર્ચમાં T20 વર્લ્ડ કપ ફાઇનલ પછી તે સતત ટીમમાંથી બહાર રહ્યો છે.
આ અગાઉ ક્વોડ્રિસેપ્સ સ્પ્રેનને કારણે પણ તે વ્હાઇટ-બોલ સિરીઝ ગુમાવી ચૂક્યો છે. બીજી તરફ, નીતિશ કુમાર રેડ્ડી અને વોશિંગ્ટન સુંદર ઝડપથી સાજા થઈ રહ્યાં હોવાનાં અહેવાલ છે, જ્યારે ફાસ્ટ બોલર જસપ્રીત બુમરાહના સિલેક્શન અંગે હજુ પણ અનિશ્ચિતતા બનેલી છે.
