New Delhi તા, 1
દુનિયાનાં મહાન ફૂટબોલરોમાં ગણાતાં લિયોનેલ મેસીએ 20 વર્ષથી પણ વધુ સમય સુધી આર્જેન્ટિનાનું પ્રતિનિધિત્વ કર્યું. જોકે, સફળતાના આ શિખર સુધી પહોંચવાનો રસ્તો તેમના માટે ક્યારેય સરળ નહોતો.
કરિયરની છેલ્લી મેચ એટલે કે ફિફા વર્લ્ડ કપ 2026 ની ફાઇનલમાં સ્પેન સામે આર્જેન્ટિનાને હારનો સામનો કરવો પડ્યો હતો. આ હાર બાદ મેસીએ ભારે હૈયે આંતરરાષ્ટ્રીય ફૂટબોલને અલવિદા કહી દીધું છે.
મેસીના આંતરરાષ્ટ્રીય કરિયરની શરૂઆત ખૂબ જ કડવી રહી હતી. 17 ઓગસ્ટ 2005 ના રોજ હંગેરી સામેના ડેબ્યૂ મેચમાં મેદાન પર આવ્યાના માત્ર 47 સેકન્ડમાં જ તેમને રેડ કાર્ડ બતાવીને બહાર કરી દેવાયા હતા.
પરંતુ આ મુશ્કેલ શરૂઆત બાદ તેમણે પાછું વળીને જોયું નથી. 2010 ના વર્લ્ડ કપમાં આર્જેન્ટિનાના કોચ બનેલાં મહાન ફૂટબોલર ડિએગો મારાડોના સાથેની તેમની ભાગીદારીએ મેસીના કરિયરને એક નવો વળાંક આપ્યો હતો.
આર્જેન્ટિના માટે ટ્રોફી જીતવાનું મેસીનું સ્વપ્ન 2021માં પૂરું થયું, જ્યારે કોપા અમેરિકાની ફાઇનલમાં બ્રાઝિલને 1-0થી હરાવીને તેમણે દેશનો 28 વર્ષનો દુષ્કાળ ખતમ કર્યો.
આ પછી, 18 ડિસેમ્બર 2022ના રોજ લુસેલ સ્ટેડિયમમાં મેસીના કરિયરની સૌથી મોટી ક્ષણ આવી, જ્યારે તેમણે ફ્રાન્સને પેનલ્ટી શૂટઆઉટમાં હરાવીને આર્જેન્ટિનાને વર્લ્ડ ચેમ્પિયન બનાવ્યું અને પોતે ટુર્નામેન્ટના શ્રેષ્ઠ ખેલાડી બન્યાં.
પોતાનાં કરિયરના અંતિમ પડાવમાં મેસીને ફરી એકવાર નિરાશાનો સામનો કરવો પડ્યો હતો. ન્યૂ જર્સીના મેટલાઇફ સ્ટેડિયમમાં રમાયેલી 2026 વર્લ્ડ કપની ફાઇનલમાં સ્પેન સામે આર્જેન્ટિનાની 0-1થી હાર થઈ હતી.
2014 પછી વર્લ્ડ કપ ફાઇનલમાં આ તેમની બીજી હાર હતી. આ હાર સાથે જ મેસીની જાદુઈ આંતરરાષ્ટ્રીય સફરનો અંત આવ્યો, પરંતુ ફૂટબોલના ઇતિહાસમાં તેમનું નામ હંમેશાં અમર રહેશે
