Mumbai,તા.22
કપિલ શર્મા શો પર આરોપ લગાવવામાં આવ્યો છે કે ફિલ્મ `હેરા ફેરી’ના લોકપ્રિય પાત્ર બાબુરાવને પરવાનગી વગર બતાવવામાં આવ્યો, આ માત્ર કાયદાનું ઉલ્લંઘન જ નથી, પરંતુ વ્યવસાયિક રીતે કરવામાં આવતી ચોરી પણ છે.અને આ માટે ફિલ્મના નિમાર્તા ફીરોજ નડીયાદવાલાએ નેટ ફલીકસ અને કપિલ શર્માના શોના નિર્માતા પર રૂ।.25 કરોડનો દાવો અને માફી માટે નોટીસ મોકલી છે.
કપિલ શર્મા શો કાનૂની ગડબડીમાં ફસાઈ ગયો છે. પ્રોડ્યુસર ફિરોઝ નડિયાદવાલાએ નેટફ્લિક્સને લીગલ નોટિસ મોકલી છે. ફિરોઝ વતી પ્રખ્યાત સેલિબ્રિટી વકીલ સના રઈસે આ નોટિસ મોકલી છે. નડિયાદવાલાએ તેની હિટ ફિલ્મ `હેરા ફેરી’ ફ્રેન્ચાઇઝીના પાત્ર બાબુરાવ ગણપતરાવ આપ્ટેને લઈને નેટફ્લિક્સને આ કાનૂની નોટિસ મોકલી છે.
આખો કિસ્સો બાબુરાવ સાથે સંબંધિત છે
ખરેખર, `ધ ગ્રેટ ઈન્ડિયન કપિલ શર્મા શો’ પર આરોપ છે કે તેણે તેની ફિલ્મ `હેરા ફેરી’ના લોકપ્રિય પાત્ર બાબુરાવને તેની પરવાનગી વિના બતાવ્યો હતો. આ માત્ર કાયદાનું ઉલ્લંઘન જ નથી, પરંતુ વ્યવસાયિક રીતે કરવામાં આવતી ચોરી પણ છે.
સના રઈસે નોટિસમાં લખ્યું છે કે, ‘બૌદ્ધિક સંપત્તિ કોઈ મામૂલી વસ્તુ નથી. આ સર્જનાત્મકતાનું જીવન છે. મારા ક્લાયન્ટની ફિલ્મનાં આઇકોનિક પાત્રનો ઉપયોગ પરવાનગી વિના કરવામાં આવ્યો હતો. કાયદો આવા અધિકારોને નબળાં પાડવાનું સહન કરશે નહીં, જે કાયદેસર રીતે પ્રાપ્ત કરવામાં આવ્યાં છે અને જેનું કાળજીપૂર્વક રક્ષણ કરવામાં આવ્યું છે.
દેખાવની સંપૂર્ણ નકલ કરવામાં આવી હતી
વાસ્તવમાં, તાજેતરમાં જ નેટફ્લિક્સે ‘ધ ગ્રેટ ઈન્ડિયન કપિલ શર્મા શો’નો પ્રોમો રિલીઝ કર્યો હતો. આ પ્રોમોમાં બતાવવામાં આવ્યું હતું કે અક્ષય કુમાર પોતાની ફિલ્મ ‘જોલી એલએલબી 3’ના પ્રમોશન માટે પહોંચ્યો છે. આ શોમાં કોમેડિયન કિકુ શારદા ‘બાબુરાવ’ના પાત્રના લુકમાં જોવા મળી રહ્યો છે.
આટલું જ નહીં, કિકુએ માત્ર `બાબુરાવ’નો વેશ જ ધારણ કર્યો ન હતો, પરંતુ તેમનો પ્રખ્યાત ડાયલોગ “યે બાબુરાવ કા સ્ટાઈલ હૈ” પણ બોલ્યો હતો અને તેથી આ શો પર લિગલ નોટિસ ફટકારવામાં આવી છે.
