(નયના દવે દ્વારા)
Jamnagar તા.૨૪ઃ
જામનગર પીજીવીસીએલ વર્તુળ કચેરી દ્વારા જામનગર અને દેવભૂમિ દ્વારકા જિલ્લામાં વીજચોરી સામેની ઝુંબેશ વધુ તેજ બનાવવામાં આવી છે. સતત ત્રીજા દિવસે આજે પણ શહેર તથા ગ્રામ્ય વિસ્તારોમાં વીજચોરીની તપાસ માટે વીજચેકિંગની કામગીરી હાથ ધરવામાં આવી હતી.
જામનગર શહેરના વિવિધ વિસ્તારો ઉપરાંત ગ્રામ્ય વિસ્તારોમાં વીજચેકિંગ હાથ ધરવામાં આવી રહ્યું છે. ખંભાળિયા સબ ડિવિઝન હેઠળના ગ્રામ્ય વિસ્તારોમાં પણ અલગ-અલગ વીજચેકિંગ ટીમોને ઉતારીને તપાસ કરવામાં આવી રહી છે. વિવિધ વિસ્તારોમાં ટીમો દ્વારા વીજજોડાણો અને વીજવપરાશની તપાસ કરવામાં આવતાં વીજચોરોમાં ફફડાટ ફેલાયો છે.આ સપ્તાહના પ્રથમ બે દિવસ દરમિયાન, એટલે કે સોમવાર અને મંગળવારે, જામનગર શહેરના કેટલાક સ્લ્મ વિસ્તારો ઉપરાંત જામનગર ગ્રામ્ય, લાલપુર અને ધ્રોલ પંથકમાં સઘન વીજચેકિંગ કરવામાં આવ્યું હતું. આ દરમિયાન કુલ ૧૪૩ થી વધુ સ્થળોએ વીજચોરી થતી હોવાનું બહાર આવ્યું હતું.
વીજચોરીના કેસોમાં કાર્યવાહી આગળ ધપાવી જામનગરના વીજચોરી પોલીસ મથકમાં બે દિવસ દરમિયાન કુલ ૧૪૩ પોલીસ ફરિયાદો નોંધાવવામાં આવી છે. નોંધાયેલી ફરિયાદોમાંથી ૬૦ ફરિયાદો એક લાખ રૂપિયાથી વધુની વીજચોરીની હોવાનું જાણવા મળ્યું છે.
આ કાર્યવાહીમાં મોટી રકમની વીજચોરીના કેસો પણ સામે આવ્યા છે. એક કેસમાં રૂ.૧૦ લાખથી વધુની વીજચોરીનો પુરાવો મળ્યો હોવાનું જાણવા મળ્યું છે, જ્યારે અન્ય એક કેસમાં રૂ.૫ લાખની વીજચોરીનો પુરાવો મળ્યો છે.દરમિયાન, આજે પણ જામનગર શહેર, ગ્રામ્ય તેમજ ખંભાળિયા સબ ડિવિઝન હેઠળના વિવિધ વિસ્તારોમાં વીજચેકિંગની કાર્યવાહી ચાલુ રાખવામાં આવી છે. ચેકિંગ પૂર્ણ થયા બાદ વીજચોરીના વધુ કેસો અને પોલીસ ફરિયાદો સામે આવે તેવી શક્યતા છે.પીજીવીસીએલ દ્વારા વીજચોરી સામે હાથ ધરવામાં આવેલી આ સતત કાર્યવાહીથી વીજચોરી કરતા તત્વોમાં ફફડાટ ફેલાયો છે, અને આગામી દિવસોમાં પણ ચેકિંગની કાર્યવાહી વધુ વિસ્તરવાની શક્યતા છે.
