ભારત સામે કારમી હારનો સામનો કર્યા બાદ,Pakistanને પોતાની ટીમ જાહેર કરી છે

Karachi,તા.૩૦

એશિયા કપ ૨૦૨૫ની ફાઇનલમાં પાકિસ્તાન ક્રિકેટ ટીમને ભારત સામે કારમી હારનો સામનો કરવો પડ્યો. ટુર્નામેન્ટમાં ભારત અને પાકિસ્તાન વચ્ચે કુલ ત્રણ મેચ રમાઈ હતી, અને પાકિસ્તાની ટીમ ત્રણેયમાં હારી ગઈ હતી. ટુર્નામેન્ટમાં કારમી હાર બાદ, પાકિસ્તાન ક્રિકેટ ટીમ હવે ઘરઆંગણે મજબૂત દક્ષિણ આફ્રિકાની ટીમનો સામનો કરવા માટે તૈયાર છે. બંને ટીમો વચ્ચેની ટેસ્ટ શ્રેણી ૧૨ ઓક્ટોબરથી શરૂ થશે, જેના માટે પાકિસ્તાને તેની ટીમની જાહેરાત કરી છે.

પાકિસ્તાન ક્રિકેટ બોર્ડે દક્ષિણ આફ્રિકા સામેની બે મેચની ટેસ્ટ શ્રેણી માટે ૧૮ સભ્યોની ટીમની જાહેરાત કરી છે. આ શ્રેણી આઇસીસી વર્લ્ડ ટેસ્ટ ચેમ્પિયનશિપ ૨૦૨૫-૨૭નો ભાગ હશે અને ૧૨ ઓક્ટોબરથી લાહોરના ગદ્દાફી સ્ટેડિયમ ખાતે શરૂ થશે. પ્રથમ ટેસ્ટ પહેલા ટીમમાં વધુ ઘટાડો કરવામાં આવશે. શાન મસૂદને કેપ્ટન તરીકે જાળવી રાખવામાં આવ્યો છે. ટીમમાં ત્રણ અનકેપ્ડ ખેલાડીઓનો સમાવેશ કરવામાં આવ્યો છેઃ આસિફ આફ્રિદી, ફૈઝલ અકબર અને રોહેલ નઝીર.

આઇસીસી  વર્લ્ડ ટેસ્ટ ચેમ્પિયનશિપ ૨૦૨૩-૨૫ ના વિજેતા દક્ષિણ આફ્રિકા અને પાકિસ્તાન વચ્ચેનો પહેલો ટેસ્ટ ૧૨ થી ૧૬ ઓક્ટોબર દરમિયાન લાહોરના ગદ્દાફી સ્ટેડિયમ ખાતે રમાશે, જ્યારે બીજી ટેસ્ટ ૨૦ થી ૨૪ ઓક્ટોબર દરમિયાન રાવલપિંડી ક્રિકેટ સ્ટેડિયમ ખાતે યોજાશે.

ટેસ્ટ શ્રેણી પછી, બંને ટીમો ૨૮ ઓક્ટોબરથી ૮ નવેમ્બર સુધી ત્રણ ટી૨૦ અને ત્રણ વનડે રમશે. આ સફેદ બોલ મેચો માટે એક અલગ પાકિસ્તાન ટીમની જાહેરાત પછી કરવામાં આવશે. રેડ-બોલ કોચ અઝહર મહમૂદ અને એનસીએ કોચની દેખરેખ હેઠળ શ્રેણી પહેલા ખેલાડીઓ માટે તાલીમ શિબિર યોજાશે. આ શિબિર ૩૦ સપ્ટેમ્બરથી શરૂ થશે અને ૮ ઓક્ટોબર સુધી ચાલુ રહેશે. તાજેતરમાં એશિયા કપમાં રમનારા ખેલાડીઓ ૪ ઓક્ટોબરે ટીમમાં જોડાશે.

પાકિસ્તાન ટીમઃ શાન મસૂદ (કેપ્ટન), આમિર જમાલ, અબ્દુલ્લા શફીક, અબરાર અહેમદ, આસિફ આફ્રિદી, બાબર આઝમ, ફૈઝલ અકબર, હસન અલી, ઇમામ-ઉલ-હક, કામરાન ગુલામ, ખુર્રમ શહઝાદ, મોહમ્મદ રિઝવાન (વિકેટકીપર), નોમાન અલી, રોહેલ નઝીર (વિકેટકીપર), સાજિદ ખાન, સલમાન અલી આગા, સઈદ શકીલ અને શાહીન શાહ આફ્રિદી.

દક્ષિણ આફ્રિકાનો પાકિસ્તાન પ્રવાસ શેડ્યૂલ

ટેસ્ટ શ્રેણી

૧૨-૧૬ ઓક્ટોબર – પ્રથમ ટેસ્ટ, ગદ્દાફી સ્ટેડિયમ, લાહોર

૨૦-૨૪ ઓક્ટોબર – બીજી ટેસ્ટ, રાવલપિંડી ક્રિકેટ સ્ટેડિયમ, રાવલપિંડી

ટી ૨૦ શ્રેણી

૨૮ ઓક્ટોબર – પ્રથમ ટી ૨૦, રાવલપિંડી ક્રિકેટ સ્ટેડિયમ

૩૧ ઓક્ટોબર – બીજી ટી ૨૦, ગદ્દાફી સ્ટેડિયમ, લાહોર

૧ નવેમ્બર – ત્રીજી ટી ૨૦, ગદ્દાફી સ્ટેડિયમ, લાહોર

વનડે શ્રેણી

૪ નવેમ્બર – પ્રથમ વનડે, ઇકબાલ સ્ટેડિયમ, ફૈસલાબાદ

૬ નવેમ્બર – બીજી વનડે, ઇકબાલ સ્ટેડિયમ, ફૈસલાબાદ

૮ નવેમ્બર – ત્રીજી વનડે, ઇકબાલ સ્ટેડિયમ, ફૈસલાબાદ