Pakistan,તા.૨
જીનીવામાં સંયુક્ત રાષ્ટ્ર માનવ અધિકાર પરિષદ (ેંદ્ગૐઇઝ્ર) ના ૬૦મા સત્રમાં ભારતે માનવ અધિકારોના મુદ્દાઓ પર પાકિસ્તાનના દંભનો પર્દાફાશ કર્યો. ભારતે પાકિસ્તાનની આકરી ટીકા કરી, પાકિસ્તાનમાં લઘુમતીઓ પરના અત્યાચારને ઉજાગર કર્યો. ભારતનું પ્રતિનિધિત્વ કરતા રાજદ્વારી મોહમ્મદ હુસૈને કહ્યું, “એ વિડંબના છે કે માનવ અધિકારોમાં સૌથી ખરાબ રેકોર્ડ ધરાવતો દેશ અન્ય દેશોને ઉપદેશ આપવાનો પ્રયાસ કરી રહ્યો છે.”
માનવ અધિકાર પરિષદના ૩૪મા સત્રને સંબોધતા, ભારતીય રાજદ્વારી મોહમ્મદ હુસૈને કહ્યું, “તેઓ (પાકિસ્તાન) ભારત વિરુદ્ધ બનાવટી આરોપો લગાવીને આ પ્લેટફોર્મનો દુરુપયોગ કરે છે, જે ફક્ત તેમના દંભને ઉજાગર કરે છે. પ્રચારનો આશરો લેવાને બદલે, પાકિસ્તાને પોતાના દેશમાં ધાર્મિક અને વંશીય લઘુમતીઓ સામે રાજ્ય પ્રાયોજિત જુલમ અને વ્યવસ્થિત ભેદભાવ પર ધ્યાન આપવું જોઈએ.”
નોંધનીય છે કે માનવ અધિકાર પરિષદનું આ સત્ર એવા સમયે યોજાઈ રહ્યું છે જ્યારે પાકિસ્તાન કબજા હેઠળના કાશ્મીરમાં અશાંતિ ચાલી રહી છે, જ્યાં છેલ્લા ઘણા દિવસોથી વિરોધ પ્રદર્શન અને હિંસા થઈ રહી છે, જેના પરિણામે અનેક લોકો માર્યા ગયા છે. યુએનએચઆરસીને સંબોધતા, યુનાઇટેડ કાશ્મીર પીપલ્સ નેશનલ પાર્ટી (યુકેપીએનપી) ના પ્રવક્તા નાસિર અઝીઝ ખાને પીઓકેમાં પાકિસ્તાનના વધતા દમન સામે આંતરરાષ્ટ્રીય હસ્તક્ષેપની હાકલ કરી. ખાને ૨૯ સપ્ટેમ્બરના રોજ યુનાઇટેડ આવામી એક્શન કમિટીના નેતૃત્વમાં પીઓકેમાં થયેલા તાજેતરના વિરોધ પ્રદર્શનો વિશે વાત કરી હતી. તેમણે ઇસ્લામાબાદ પર સૈન્ય તૈનાત કરવાનો, ઇન્ટરનેટ સેવાઓ બંધ કરવાનો અને અસંમતિને દબાવવા માટે સંદેશાવ્યવહારમાં વિક્ષેપ પાડવાનો આરોપ લગાવ્યો હતો. ખાને કહ્યું, “પીઓકેમાં ૩૦ લાખથી વધુ કાશ્મીરીઓ ઘેરાયેલા છે, જ્યારે વિદેશમાં ૨૦ લાખ લોકો તેમના પરિવારોથી કપાયેલા છે.”
પીઓકેમાં ઘણા દિવસોથી વીજળીના દરમાં ઘટાડો, સબસિડીવાળા ઘઉંનો લોટ અને સારી આરોગ્યસંભાળની માંગણી સાથે વિરોધ પ્રદર્શનો ચાલી રહ્યા છે. શાંતિપૂર્ણ હડતાળ તરીકે શરૂ થયેલી ઘટના હિંસક બની ગઈ છે, જેમાં ઓછામાં ઓછા ત્રણ લોકો માર્યા ગયા છે અને ૨૨ થી વધુ ઘાયલ થયા છે. વિરોધીઓ પાકિસ્તાનમાં સ્થાયી થયેલા શરણાર્થીઓ માટે અનામત ૧૨ વિધાનસભા બેઠકોને દૂર કરવાની પણ માંગ કરી રહ્યા છે. અગાઉ, જીનીવામાં ચાલી રહેલા સત્ર દરમિયાન આયોજિત એક સેમિનારમાં પાકિસ્તાન અને બાંગ્લાદેશમાં કથળતી માનવ અધિકારોની સ્થિતિ પર પ્રકાશ પાડવામાં આવ્યો હતો.
