Riyadh, તા.૬
રિયાધમાં યોજાયેલી ઉચ્ચ સ્તરીય કટોકટી બેઠક બાદ પાકિસ્તાન, સાઉદી અરેબિયા અને તૂર્કિયેએ હૂતી હુમલાઓના સખત જવાબમાં મક્કા રક્ષા કરાર હેઠળ સામૂહિક રક્ષા જવાબદારી તાત્કાલિક લાગુ કરવા પર સહમતિ દર્શાવી છે. આ મહત્વપૂર્ણ નિર્ણય બાદ નક્કી કરાયેલા લશ્કરી દળોની સાઉદી અરેબિયામાં વ્યાપક તૈનાતી, સહિયારી સુરક્ષા વ્યવસ્થા અને ઉભરતા જોખમો સામે નિવારક તૈયારીઓ પર વિશેષ ભાર મૂકવામાં આવશે. ત્રણેય દેશોએ સુરક્ષાને લઈને આક્રમક વલણ અપનાવ્યું છે.પાકિસ્તાન, સાઉદી અરેબિયા અને તૂર્કિયેએ ગત ઓગસ્ટ મહિનામાં જ મક્કા જોઈન્ટ ડિફેન્સ એગ્રીમેન્ટ પર ઐતિહાસિક હસ્તાક્ષર કર્યા હતા. આ કરારની શરતો મુજબ ત્રણેય દેશોમાંથી કોઈપણ એક દેશ પર સશસ્ત્ર હુમલો થવાની સ્થિતિને તમામ ત્રણેય દેશો પર થયેલો હુમલો ગણવામાં આવશે. હવે હૂતી જૂથના હુમલાઓ વચ્ચે આ કરારને સક્રિય કરવાથી ત્રણેય દેશો વચ્ચે લશ્કરી સહયોગ અને વ્યૂહાત્મક ભાગીદારીનું સ્તર અભૂતપૂર્વ રીતે વધવાની વાત સામે આવી છે.
સાઉદી રક્ષા મંત્રી ખાલિદ બિન સલમાને સોશિયલ મીડિયા પર સત્તાવાર પોસ્ટ શેર કરતા જણાવ્યું કે ગઠબંધનની રૂપરેખા હેઠળ સામૂહિક નિવારક પગલાં (કલેક્ટિવ ડિટરન્સ મેજર્સ) તાત્કાલિક સક્રિય કરવામાં આવ્યા છે. આ મોટો નિર્ણય યમનના ઈરાન સમર્થિત હૂતી જૂથ દ્વારા કરવામાં આવેલા હુમલાઓ અને તેના માટે જવાબદાર તત્વોના સંદર્ભમાં લેવામાં આવ્યો છે. કરાર હેઠળ મંજૂર વ્યવસ્થા મુજબ સાઉદી અરેબિયામાં લશ્કરી દળો અને સુરક્ષા ક્ષમતાઓ તૈનાત કરવાની ત્વરિત તૈયારીઓ હાથ ધરવામાં આવશે.આ ત્રણેય રાષ્ટ્રોએ સ્પષ્ટ કર્યું છે કે આ ડગલાથી તેમની સૈન્ય તૈયારીઓ વધુ મજબૂત બનશે. આનાથી ત્રણેય દેશો વચ્ચે પરસ્પર સૈન્ય તાલમેલ વધશે અને ભવિષ્યમાં ઉભરનારા કોઈપણ સુરક્ષા જોખમો સામે સામૂહિક રીતે આક્રમક જવાબ આપવાની ક્ષમતામાં મોટો વધારો થશે. વૈશ્વિક રાજકારણમાં આ સંયુક્ત પગલાંને અત્યંત પ્રભાવશાળી માનવામાં આવી રહ્યું છે.
