રાજનાથ સિંહે કોંગ્રેસ પર રાજકીય લાભ માટે ચૂંટણી પ્રક્રિયા અને સંસ્થાઓ સામે સવાલો ઉઠાવવાનો આરોપ પણ લગાવ્યો
New Delhi, તા.૧૬
રક્ષામંત્રી રાજનાથ સિંહે મતચોરીના આરોપોને લઈને કોંગ્રેસ નેતા રાહુલ ગાંધી પર આકરા પ્રહાર કર્યા છે. તેમણે Rahul Gandhiના મતચોરીના દાવાઓને ફગાવતાં કહ્યું કે રાહુલ ગાંધીએ જેને ‘હાઇડ્રોજન બોમ્બ’ ગણાવીને આખા દેશમાં ભારે દેકારો કર્યો હતો, તે આખરે દિવાળીના ફટાકડા જેવો પણ સાબિત થયો નથી. રાજનાથ સિંહે કોંગ્રેસ પર રાજકીય લાભ માટે ચૂંટણી પ્રક્રિયા અને સંસ્થાઓ સામે સવાલો ઉઠાવવાનો આરોપ પણ લગાવ્યો હતો.
રાજનાથ સિંહે દાવો કર્યો કે, રાહુલ ગાંધીએ મતદાર યાદીમાં ગેરરીતિના આરોપો લગાવીને ક્યારેક ૭૦ વર્ષની મહિલાનું નામ બે જગ્યાએ હોવાની વાત કરી હતી, તો ક્યારેક ૩૫ વર્ષની મહિલાને ૧૨૪ વર્ષની મતદાર બનાવી દીધી. તેમણે સામાન્ય નાગરિકોને ફેક મતદાર (નકલી મતદાર) ગણાવીને બદનામ કરવાનો પ્રયાસ કર્યો, પણ વોટ ચોરીનો આ મામલો રાજકીય નાટક નીકળ્યું.
તેમણે કહ્યું કે સત્તા પરિવર્તન, વિરોધ અને રસ્તા પરથી રસ્તો કાઢવા જેવા શબ્દપ્રયોગો પાછળ અરાજકતા ઊભી કરીને સત્તા મેળવવાનો પ્રયાસ દેખાય છે. રાજનાથ સિંહે એવો પણ આક્ષેપ કર્યો કે આવા પ્રયાસો દેશની અર્થવ્યવસ્થાને નુકસાન પહોંચાડી શકે છે અને યુવાનોને રાજકીય સંઘર્ષ તરફ ધકેલી શકે છે.
રાજનાથ સિંહે કહ્યું કે રાહુલ ગાંધી અને તેમના સાથીઓએ સમજવું જોઈએ કે કોઈને પણ દેશમાં અરાજકતા ફેલાવવાની છૂટ આપી શકાય નહીં. તેમણે રાહુલ ગાંધીને વિરોધ અને અવરોધની રાજનીતિ છોડીને સંવાદ દ્વારા પ્રશ્નો ઉકેલવા તથા રાષ્ટ્રનિર્માણમાં યોગદાન આપવા અપીલ કરી હતી. તેમણે સુપ્રીમ કોર્ટની ટિપ્પણીનો ઉલ્લેખ કરતાં પણ પોતાના આક્ષેપોને યોગ્ય ઠેરવવાનો પ્રયાસ કર્યો હતો.
કોંગ્રેસ પર નિશાન સાધતાં રાજનાથ સિંહે ભૂતકાળની ઘટનાઓનો પણ ઉલ્લેખ કર્યો હતો. તેમણે દેશમાં લાદવામાં આવેલી ઈમરજન્સી, ૧૯૮૪માં શીખ સમુદાય સામે થયેલી હિંસા અને કારસેવકો પર ગોળીબારની ઘટનાઓ યાદ અપાવી હતી. તેમણે આરોપ લગાવ્યો કે આજે પણ બંધારણીય સંસ્થાઓને નિશાન બનાવવામાં આવી રહી છે. રાહુલ ગાંધી પર કટાક્ષ કરતાં તેમણે કહ્યું કે, રાહુલ ગાંધી સંવિધાનને ખિસ્સામાં રાખીને અરાજકતા ફેલાવી રહ્યા છે.
ચૂંટણી પંચની કામગીરી અંગે પણ રાજનાથ સિંહે કોંગ્રેસ પર સવાલો ઉઠાવ્યા હતા. તેમણે દાવો કર્યો કે ૧૯૯૦માં રાતોરાત બે ચૂંટણી કમિશનરોની નિમણૂક કરવામાં આવી હતી. નવીન ચાવલાને મુખ્ય ચૂંટણી કમિશનર બનાવવામાં આવ્યા હતા અને જ્યારે તેમના પર ગંભીર આરોપ લાગ્યા, ત્યારે કોંગ્રેસે તેમનો બચાવ કર્યો હતો. તેમણે એમ.એસ. ગિલનો પણ ઉલ્લેખ કર્યો હતો, જેઓ મુખ્ય ચૂંટણી કમિશનર રહ્યા બાદ કેન્દ્ર સરકારમાં મંત્રી બન્યા હતા.
રાજનાથ સિંહે વધુમાં કહ્યું કે અગાઉ મતદાર ઓળખપત્ર વિના પણ ચૂંટણીઓ યોજાતી હતી. જ્યારથી મતદારોને ઓળખ પત્ર મળ્યા છે, ત્યારથી કોંગ્રેસ માટે બહુમતી મેળવવી મુશ્કેલ બની ગઈ છે અને તે ક્યારેય એકલા સત્તામાં આવી શકી નથી.
આ મુદ્દે કટાક્ષ કરતાં તેમણે સવાલ કર્યો હતો કે આ મતચોરી હતી કે પછી કામચોરી? તેમણે ભારપૂર્વક કહ્યું કે ભાજપે હંમેશાં બંધારણીય સંસ્થાઓનું સન્માન કર્યું છે.
રાજીવ ગાંધીની હત્યા બાદ ચૂંટણી સ્થગિત કરવાના નિર્ણયનો ઉલ્લેખ કરતાં રાજનાથ સિંહે સવાલ કર્યો હતો કે, એક ઉમેદવારના મૃત્યુથી આખી ચૂંટણી સ્થગિત થતી નથી, તો રાજીવ ગાંધીના મૃત્યુ બાદ ચૂંટણી પ્રક્રિયા શા માટે સ્થગિત કરવામાં આવી હતી? તેમણે કોંગ્રેસ પર હિંસા અને સત્તા પરિવર્તન જેવા મુદ્દાઓ દ્વારા રાજકીય હારનો બદલો લેવાનો પ્રયાસ કરવાનો આરોપ લગાવ્યો હતો. આ સાથે તેમણે બાંગ્લાદેશ જેવી પરિસ્થિતિ ઊભી કરવાનો પ્રયાસ થઈ રહ્યો હોવાનો દાવો પણ કર્યો હતો.
રાજનાથ સિંહે રાહુલ ગાંધીને અમેઠી લોકસભા બેઠકનો ઉલ્લેખ કરીને પણ સવાલ કર્યો હતો કે શું તેઓ સમાજવાદી પાર્ટીના સહયોગ વિના અમેઠી જીતી શકે? કોંગ્રેસ કાર્યાલયમાં થયેલી મારામારીનો ઉલ્લેખ કરતાં તેમણે કોંગ્રેસને પહેલાં પોતાની આંતરિક સ્થિતિ પર ધ્યાન આપવાની સલાહ આપી હતી.
સમગ્ર મુદ્દે રાજનાથ સિંહે ફરી દાવો કર્યો હતો કે રાહુલ ગાંધીના મતચોરીના આરોપો જનતા સમક્ષ ટકી શક્યા નથી અને તેમનો કહેવાતો ‘હાઇડ્રોજન બોમ્બ’ ફૂસ્સ થઈ ગયો છે.
