બહેનપણીના જન્મદિવસે ખોટું નામ ધારણ કરી પરિચય કેળવ્યો, પુખ્ત થયા બાદ પણ લગ્ન ન કરતા ફરિયાદ નોંધાવી
Rajkot
જામનગર મુકામે રહેતી બહેનપણીના જન્મદિવસે સગીરા સાથે પરિચય કેળવી લગ્નની લાલચ આપી પુખ્ત બન્યા પછી વારંવાર દુષ્કર્મ આચરવાના ગુનામાં પકડાયેલ જામનગરના શાહરૂખ બસીરભાઈ જામ નામના શખસની ચાર્જશીટ પછીની જામીન અરજી અદાલત દ્વારા ફગાવી દેવામાં આવી છે.
વધુ વિગત મુજબ ગાંધીગ્રામ પોલીસ સ્ટેશન હેઠળના વિસ્તારમાં રહેતી મહિલા જ્યારે સગીર હતી ત્યારે જામનગર ખાતે રહેતી બહેનપણીના જન્મદિવસે ગઈ હતી ત્યાં શાહરૂખ બસીરભાઈ જામ (રહે ગુલાબનગર જામનગર)એ ખોટું નામ ધારણ કરી મિત્રતા કેળવેલ અને બાદ પીડિતા રાજકોટ આવી ગયા બાદ શાહરૂખ જામે રાજકોટ ખાતે આવી સગીરાને હોટેલમાં લઈ જઈ લગ્નની લાલચ આપી તેણીની સાથે દુષ્કર્મ આચરેલ હોય તેમજ સગીરા પુખ્ત વયની થયા બાદ પણ લગ્ન કરેલ નહીં, તેથી પીડિતાએ આરોપી શાહરૂખ બસીરભાઇ જામ વિરુદ્ધ ગત તારીખ ૧૭-૭-૨૦૨૬ નારોજ ગાંધીગ્રામ પોલીસ સ્ટેશનમાં ફરિયાદ નોંધાવી હતી.
પોલીસે શાહરૂખ બસીરભાઈ જામની ધરપકડ કરી જેલ હવાલે કર્યો હતો. પોલીસ દ્વારા કોર્ટમાં ચાર્જશીટ દાખલ કર્યા પછી આરોપી શાહરૂખે જેલમાંથી જામીન ઉપર છુટવા સેશન્સ કોર્ટમાં જામીન અરજી કરી હતી. તેમાં સરકાર તરફે સરકારી વકીલે હાજર રહી જામીન અરજીનો વિરોધ કરતા રજૂઆત કરતા જણાવેલ કે, આરોપી વિરુદ્ધ સમાજ વિરોધી ગંભીર ગુનો છે, આવા ગંભીર ગુનામાં આરોપીને જામીન આપવા જોઈએ નહીં. જો તેને જામીન આપવામાં આવશે તો તેને કાયદાનો કોઈ ડર રહેશે નહીં અને ફરી પાછા આવા ગુના આચરશે, તેથી જામીન અરજી રદ કરવા રજૂઆત કરેલ તે રજૂઆતને ધ્યાને લઈ સેશન્સ જજ આઈ. બી. પઠાણે આરોપી શાહરૂખ બસીરભાઈ જામની ચાર્જશીટ પછીની જામીન અરજી રદ કરી છે. આ કામમાં સરકાર તરફે સરકારી વકીલ મુકેશભાઈ પીપળીયા રોકાયા હતા.
