મોંઘવારીને મોળી પાડી તહેવારની મોજ, એક જ દિવસમાં કરોડોનો વેપારનો અંદાજ !
(મિલાપ રૂપારેલ દ્વારા)
Amreli
નવરાત્રિની નવ દિવસની ભક્તિમય ઉજવણી બાદ અમરેલીમાં આજે દશેરાના પર્વની પણ ઉત્સાહભેર ઉજવણી પૂર્ણ થઈ હતી. દશેરાના પર્વને લઈને શહેરમાં મીઠાઈ અને ફરસાણના વેપારીઓને ત્યાં સવારથી જ ખરીદી માટે લોકોની ભારે ભીડ જોવા મળી હતી. ખાસ કરીને ફાફડા, જલેબી, મીઠાઈ અને ગાંઠિયાની ખરીદીમાં જબરદસ્ત ઉત્સાહ જોવા મળતાં મીઠાઈ અને ફરસાણના વેપારીઓને તહેવાર દરમિયાન સારો વેપાર થયો હતો. પ્રાથમિક અંદાજ મુજબ, આજે દશેરાના દિવસે એક જ દિવસમાં અમરેલીમાં મીઠાઈ અને ફરસાણના વ્યવસાયમાં કરોડો રૂપિયાનું ટર્નઓવર થયું હોવાની સંભાવના છે.
Amreli સહીત દેશભરમાં દશેરાના પર્વે ફાફડા જલેબી મીઠાઈ ખાવાની પરંપરા વર્ષોથી ચાલી આવે છે. આ પરંપરાને જાળવી રાખતાં અમરેલીવાસીઓએ મોંઘવારીની વચ્ચે પણ મન મૂકીને ખરીદી કરી હતી. શહેરના મુખ્ય બજારો, માર્ગો અને રહેણાક વિસ્તારોમાં મીઠાઈ-ફરસાણના વેપારીઓ દ્વારા મંડપ ઊભા કરવામાં આવ્યા હતા. સવારથી જ દુકાનો પર ગ્રાહકોની અવર જવર શરૂ થઈ હતી, જે દિવસ દરમિયાન સતત વધતી રહી હતી.
છેલ્લાં ત્રણ વર્ષમાં મીઠાઈના ભાવમાં અંદાજે ૧૫ ટકાનો વધારો થયો હોવાનું મીઠાઈ ફરસણના વેપારી વેપારી ભાવેશભાઈ સોમૈયાએ જણાવ્યું હતું. આ વખતે ફાફડા જલેબી અને મીઠાઈના ભાવમાં વધારો થયો હોવા છતાં ગ્રાહકોના ઉત્સાહમાં ઘટાડો જોવા મળ્યો નહોતો. સરેરાશ ફાફડાના ભાવ રૂ.૫૦૦થી રૂ. ૬૦૦ પ્રતિ કિલો સુધી રહ્યા હતા, જ્યારે શુદ્ધ ઘીની જલેબીના ભાવ રૂ. ૭૦૦ પ્રતિ કિલો સુધી પહોંચ્યા હતા. ગાંઠિયાના ભાવ પણ ૫૦૦ રૂપિયા કિલો રહ્યા હતા.
ભાવવધારાની અસરને કારણે ગ્રાહકો પોતાના બજેટ મુજબ ખરીદી કરતા જોવા મળ્યા હતા. કેટલાક ગ્રાહકોએ પરિવાર માટે મર્યાદિત જથ્થામાં ખરીદી કરી હતી, તો કેટલાકે તહેવારની પરંપરા જાળવવા માટે ભાવની ચિંતા કર્યા વિના મનપસંદ મીઠાઈ-ફરસાણ ખરીદ્યાં હતાં.
દશેરાના તહેવારને ધ્યાનમાં રાખીને વેપારીઓએ અગાઉથી જ મીઠાઈ અને ફરસાણનો પૂરતો જથ્થો તૈયાર કરવાની વ્યવસ્થા ગોઠવી હતી. શહેરમાં નાના-મોટા મીઠાઈના વેપારીઓ ઉપરાંત ફરસાણની દુકાનો અને હંગામી વેચાણ કેન્દ્રો પર પણ ધમધમાટ જોવા મળ્યો હતો.અને અંદાજે ૭૦થી ૮૦ જેટલાં વેચાણ કેન્દ્રો કાર્યરત હોવાનો ઉલ્લેખ કરવામાં આવ્યો હતો.
દશેરાના દિવસે ફાફડા અને જલેબીની સૌથી વધુ માંગ રહેતી હોવાથી વેપારીઓએ વહેલી સવારથી જ વેચાણ શરૂ કરી દીધું હતું. અનેક સ્થળોએ ગ્રાહકોને લાંબી કતારોમાં ઊભા રહીને ખરીદી કરવી પડી હતી. તહેવારની માંગને પહોંચી વળવા વેપારીઓ અને કર્મચારીઓ દિવસભર કાર્યરત રહ્યા હતા.
પરંપરા અને સ્વાદે બજારમાં તેજી લાવી
દશેરા માત્ર ધાર્મિક પર્વ જ નહીં, પરંતુ મીઠાઈ અને ફરસાણના વેપાર માટે પણ મહત્ત્વનો દિવસ બની રહ્યો હતો. નવરાત્રિ દરમિયાન ગરબા અને આરાધનામાં મશગૂલ રહેલા લોકો દશેરાના દિવસે પરિવાર સાથે ફાફડા-જલેબીનો સ્વાદ માણવા ઉમટી પડ્યા હતા. મોંઘવારી છતાં પરંપરાગત વાનગીઓ પ્રત્યેનો લગાવ યથાવત્? રહેતાં વેપારીઓના ધંધામાં નોંધપાત્ર તેજી જોવા મળી હતી.
આમ, અમરેલીમાં દશેરાની ઉજવણી પૂર્ણ થતાં જ તહેવારની ખરીદીનો માહોલ પણ શાંત થયો છે, પરંતુ એક દિવસના ધમધમતા વેપારે મીઠાઈ અને ફરસાણના બજારમાં કરોડો રૂપિયાની હેરફેરની સંભાવના ઊભી કરી છે.
