New Delhi ,તા.28
ભારતીયોએ આ વર્ષે વિદેશમાં અભ્યાસ કરવા માટે એક અબજ ડોલર ખર્ચ કર્યા છે. 2017 પછી એપ્રિલથી ઓગસ્ટ વચ્ચેનો આ સૌથી ઓછો ખર્ચ છે. આરબીઆઈના રિપોર્ટમાં આ વાત સામે આવી છે.
આંકડા મુજબ ભારતીયો અભ્યાસ માટે વિદેશમાં ઓછા પૈસા મોકલી રહ્યાં છે. ટ્યુશન, રહેવાનો ખર્ચ અને પ્રવેશ ફી સહિતની વ્યક્તિગત કેટેગરીઝ એપ્રિલ અને ઓગસ્ટ 2025 ની વચ્ચે 1 અબજ ડોલર હતી, જે ગયા વર્ષના સમાન સમયગાળા કરતા 22 ટકા ઓછી છે.
શિક્ષણ માટે બહાર જતાં નાણાં સતત ઘટી રહ્યાં છે
ભારતમાં વિદેશમાં અભ્યાસ કરવા માટે મોકલવામાં આવતા પૈસા સતત ઘટી રહ્યાં છે. 2021 માં, રોગચાળા પછી વિશ્વભરમાં સંસ્થાઓ ફરીથી ખુલી ત્યારે 2.37 અબજ મોકલવામાં આવ્યાં હતાં. આરબીઆઈના અહેવાલ મુજબ, 2022 માં 1.48 અબજ ડોલર, 2024 માં 1.28 અબજ ડોલર અને હવે 2025 માં 1 અબજ ડોલર વિદેશમાં મોકલવામાં આવ્યાં હતાં.
યુરોપ પર વિદ્યાર્થીઓની નજર
આ ઘટાડાનો એક ભાગ યુ.એસ. જતાં ભારતીય વિદ્યાર્થીઓની સંખ્યામાં ઘટાડો દર્શાવે છે. હવે વધુ વિદ્યાર્થીઓ યુરોપ તરફ જોઈ રહ્યાં છે, જ્યાં ઓછી ટ્યુશન ફી પર સારી સુવિધાઓ ઉપલબ્ધ છે.
ઘણાં દેશોએ નિયમો કડક બનાવ્યા
ઘણાં દેશો આંતરરાષ્ટ્રીય વિદ્યાર્થીઓ માટેનાં નિયમો કડક બનાવી રહ્યાં છે. ભારતમાંથી વિદ્યાર્થીઓ જર્મની, ફ્રાન્સ, આયર્લેન્ડ, ઇટાલી, ફિનલેન્ડ, જાપાન, દક્ષિણ કોરિયા, રશિયા અને યુએઈમાં જઈ રહ્યાં છે.
વધતાં જતા ખર્ચ પણ જવાબદાર
ભારતથી અમેરિકા જતાં વિદ્યાર્થીઓની સંખ્યા રોગચાળા પછી સૌથી નીચી સપાટીએ પહોંચી ગઈ છે. જે ગયા વર્ષની તુલનામાં 45 ટકા ઓછી છે. આના કારણોમાં વિઝાની સમસ્યાઓ અને વધતા ખર્ચનો સમાવેશ થાય છે. કેનેડાએ 2025 માં લગભગ 80 ટકા ભારતીય સ્ટડી પરમિટને નકારી કાઢી હતી.
જ્યારે યુકે અને ઓસ્ટ્રેલિયાએ ગે્રજ્યુએટ રૂટ અને ઇન્ટરનેશનલ એનરોલમેન્ટ કંટ્રોલ હેઠળ પોસ્ટ-સ્ટડી વિઝા માટેના નિયમોને કડક બનાવ્યાં છે. યુએસ, યુકે, કેનેડા અને ઓસ્ટ્રેલિયા જેવા પરંપરાગત અભ્યાસ સ્થળો તરફની આ પાળી વિશ્વભરમાં વિદ્યાર્થીઓની મુસાફરીની રીતને બદલી રહી છે.
