યુવતીને પ્રેમજાળમાં ફસાવી જીતેશ સોલંકી નામના શખ્સે દેહ ચૂંથ્યો
Rajkot તા.૧૩ઃ
ધોરાજીના સુપેડી ગામે રહેતી ૧૯ વર્ષીય યુવતીને પ્રેમજાળમાં ફસાવી જીતેશ સોલંકી નામના શખ્સે અનેકવાર દુષ્કર્મ આચરી લીધું હતું. હવસ સંતોષી નરાધમે યુવતીને તરછોડી દીધી હતી. જેથી આઘાતમાં સરી પડેલી યુવતીએ ઝેરી દવા પી આપઘાતનો પ્રયાસ કરતા સમગ્ર મામલાનો ભાંડો ફૂટ્યો હતો. સમગ્ર બનાવને પગલે ધોરાજી તાલુકા પોલીસે દુષ્કર્મ સહીતની કલમો હેઠળ ગુનો નોંધી આરોપીને સકંજામાં લીધો હતો.
સમગ્ર બનાવ અંગે પોલીસ સુત્રોમાંથી મળતી માહિતી અનુસાર જામનગરમાં રહેતી પીડિતાની બહેને દુષ્કર્મની ઘટના અંગે ફરિયાદ આપતાં જામનગર પોલીસે ઝીરો નંબરથી ફરિયાદ નોંધી ટ્રાન્સફર કરતા ધોરાજી તાલુકા પોલીસે દુષ્કર્મની કલમો હેઠળ ગુનો નોંધી આરોપીને જીતેશ ઉર્ફે પારસ બટુકભાઈ સોલંકી(ઉવ ૨૨ રહે. સુપેડી, ધોરાજી)ને સકંજામાં લીધો હતો.
પોલીસ સુત્રોના જણાવ્યા અનુસાર પીડિતાની બહેને ફરિયાદમાં વિગતો આપતાં જણાવ્યું હતું કે, તેણીની ૧૯ વર્ષીય નાની બહેન ધોરાજીના સુપેડી ગામે વાડી વિસ્તારમાં રહી મજૂરી કરે છે. દિવાળી પર્વની રજા દરમિયાન બહેન જામનગર મુકામે આવી હતી. ત્યારે તેણીએ ઝેરી દવા ગટગટાવી આપઘાતનો પ્રયાસ કરતા પરિજનોએ તાત્કાલિક યુવતીને સારવાર અર્થે ખસેડી હતી. તબીબી સારવાર સમયસર મળી જતાં યુવતીનો જીવ બચી ગયો હતો. બાદમાં બહેને આપઘાતનું પગલું ભરવા પાછળનું કારણ પૂછતાં તેણી રડવા લાગી હતી અને આપવીતી વર્ણવી હતી.
પીડિતાએ બહેનને હકીકત જણાવી હતી કે, તેણી સુપેડી ખાતે રહેતી હોય ત્યારે જીતેશ ઉર્ફે પારસ સોલંકી સાથે સંપર્ક થયો હતો. ધીમેધીમે બંને વચ્ચે પરિચય આગળ ધપતા જીતેશે લગ્નનો વાયદો આપી યુવતીને પ્રેમજાળમાં ફસાવી લીધી હતી. બાદમાં જીતેશે વાડી વિસ્તારમાં અવાર નવાર તેણી પર દુષ્કર્મ આચર્યું હતું. સમય જતાં યુવતીએ જીતેશને લગ્ન કરવા અંગે કહેતા તેણે લગ્ન કરવાનો ઇન્કાર કરી તેણીને તરછોડી દીધી હતી. જેથી આઘાતમાં સરી પડી યુવતીએ આપઘાતનો પ્રયાસ કર્યાનું જણાવ્યું હતું. જેથી બહેન સાથે બનેલી ઘટના મામલે મોટી બહેને ફરિયાદ આપતાં જામનગર પોલીસે ગુનો નોંધી ફરિયાદ ઝીરો નંબરથી ધોરાજી તાલુકા પોલીસ મથકે ટ્રાન્સફર કરી હતી.
