London, તા.૧૬
કૌભાંડી લલિત મોદી ભારત છોડીને વિદેશ ગયાને ૧૬ વર્ષ વીતી ગયા છે. સરકાર હજુસુધી તેને પરત ભારત લાવવાની વાતો કરી રહી છે એવામાં લલીત મોદીએ બ્રિટનની નાગરિકતા મેળવી લીધી છે. ૧૫મી સપ્ટેમ્બરના રોજ તેને બ્રિટનની નાગરિકતા મળી હતી જેની જાહેરાત લલિત મોદીએ તાજેતરમાં એક કાર્યક્રમમાં કરી હતી. મની લોન્ડરિંગ સહિતના આરોપોનો સામનો કરી રહેલ લલિત મોદીને હવે ભારત લાવવાની પ્રક્રિયા વધુ જટીલ બની શકે છે.કૌભાંડી અને ભાગેડુ જાહેર કરાયેલા લલિત મોદીએ શનિવારે જાહેર કર્યું કે તેણે ૧૫મી સપ્ટેમ્બર ૨૦૨૬ના દિવસે સત્તાવાર રીતે બ્રિટિશ નાગરિકત્વ મળ્યું છે. મારા માટે આ જીવનની ગર્વોન્નત ક્ષણ હતી.૧૪મી નવેમ્બરે ઓક્સફર્ડ યુનિયનમાં બોલતી વખતે તેણે આ માહિતી આપી હતી. અને કહ્યું કે બ્રિટિશ નાગરિકત્વ મળતાં મેં મારાં કુટુમ્બીજનો અને મિત્રો સાથે ઉજવણી કરી હતી. લલિત મોદીએ વધુમાં કહ્યું કે બ્રિટન વર્ષોથી મારું ઘર રહ્યું છે.કૌભાંડી અને આઇપીએલના સ્થાપક તેમજ પૂર્વ ચેરમેન લલિત મોદીએ કહ્યું હતું કે બ્રિટનના લોકો, સંસ્થાઓ અને પરંપરાઓને હું સન્માનથી જોઉં છું. બ્રિટિશ નાગરિક બનવું તે માત્ર વિશેષાધિકાર જ નથી પરંતુ એક જવાબદારી પણ છે. અને મેં ગર્વ કૃતજ્ઞાતા અને પોતાપણાની ગહન ભાવના સાથે બ્રિટિશ નાગરિકત્વ સ્વીકાર્યું છે. તેણે સોશિયલ મીડિયા પર વધુમાં લખ્યું હતું કે મારા માટે ગૌરવની ક્ષણ છે, એક નવો અધ્યાય શરૂ થયો છે. લલીત મોદીને આઇપીએલના ચેરમેન પદેથી હટાવ્યા બાદ તે ૨૦૧૦માં ભારત છોડીને વિદેશ ભાગી ગયેલ, મની લોન્ડરિંગ, ફેમા કાયદાના ભંગ સહિતના તેના પર આરોપો છે.ઇડી તેની સામે તપાસ કરી રહી છે જ્યારે તેના પ્રત્યાર્પણ માટે પણ પ્રયાસો થઇ રહ્યા છે. જોકે લલીત મોદી તમામ આરોપો નકારતો આવ્યો છે.

