Bihar,
બિહાર વિધાનસભા ચૂંટણી 2025ના પરિણામોએ સ્પષ્ટ કરી દીધું છે કે રાજ્યમાં NDAની જંગી બહુમતી સાથે સરકાર બની રહી છે. ભાજપ, જેડીયુ અને લોકજનશક્તિ-રામવિલાસ (LJP-RV)ના શાનદાર પ્રદર્શનથી NDA ગઠબંધન 202 બેઠકો જીતવામાં સફળ રહ્યું.
બીજી તરફ, આરજેડી, કોંગ્રેસ અને ડાબેરી પક્ષોના મહાગઠબંધનને કારમી હારનો સામનો કરવો પડ્યો અને તે માત્ર 35 બેઠકો પર જ સમેટાઈ ગયું. તેજસ્વી યાદવની રાષ્ટ્રીય જનતા દળ (RJD) પણ માત્ર 25 બેઠકો જ જીતી શકી. જોકે, આટલી મોટી હાર છતાં, બે આંકડાકીય મામલાઓમાં RJD બિહારની નંબર વન પાર્ટી બની છે, જે તેના મજબૂત જનાધાર તરફ ઈશારો કરે છે.
ચૂંટણીમાં મળેલા કુલ મતોની ટકાવારી (વોટ શેર)ની દ્રષ્ટિએ, RJD આ ચૂંટણીમાં સૌથી આગળ રહી છે. RJDને કુલ 23 ટકા વોટ મળ્યા છે, જે કોઈપણ પક્ષ કરતાં સૌથી વધુ છે. તેની સરખામણીમાં, ભાજપ લગભગ 3 ટકા પાછળ રહી, જેને 20.08 ટકા વોટ મળ્યા. નીતીશ કુમારની પાર્ટી જેડીયુ 19.25 ટકા વોટ શેર સાથે ત્રીજા સ્થાને રહી, જ્યારે કોંગ્રેસને માત્ર 8.71 ટકા મતદારોએ જ પસંદ કરી.
કુલ મળેલા મતોની સંખ્યામાં પણ RJD સૌથી આગળ છે. ચૂંટણીમાં 1 કરોડ 15 લાખ 46 હજાર 55 મતદારોએ RJDના ચૂંટણી ચિહ્ન `લાલટેન’નું બટન દબાવ્યું. આ આંકડો કોઈ એક પક્ષને મળેલા મતોમાં સૌથી વધુ છે.
બીજી તરફ, ભાજપને RJD કરતાં લગભગ 15 લાખ ઓછા, એટલે કે 1 કરોડ 81 હજાર 143 મત મળ્યા. જોકે, આટલા ઓછા મત મળવા છતાં, ભાજપ 89 બેઠકો જીતવામાં સફળ રહ્યું, જ્યારે RJD માત્ર 25 બેઠકો પર જ જીતી શકી.
જેડીયુને 96 લાખ 67 હજાર 118 મત મળ્યા, જેનાથી તે 85 બેઠકો જીતી શકી. આ આંકડા દર્શાવે છે કે ભલે ગઉઅએ બેઠકોની સુનામી સર્જી હોય, પરંતુ જમીની સ્તરે RJDનો વોટબેંક હજુ પણ બિહારમાં સૌથી મોટો છે.
