Amravati,,તા.૧૯
વડા પ્રધાન નરેન્દ્ર મોદીએ આંધ્ર પ્રદેશના શ્રી સત્ય સાંઈ જિલ્લામાં આયોજિત એક કાર્યક્રમમાં સ્વર્ગસ્થ આધ્યાત્મિક ગુરુ શ્રી સત્ય સાંઈ બાબાને શ્રદ્ધાંજલિ આપી. સત્ય સાંઈ બાબાના જન્મ શતાબ્દી ઉજવણી પ્રસંગે પીએમ મોદીએ તેમની યાદમાં એક સિક્કો અને ટપાલ ટિકિટનો સેટ પણ બહાર પાડ્યો. પીએમ મોદીએ આધ્યાત્મિક ગુરુને યાદ કરતા કહ્યું કે તેમના ઉપદેશો અને સેવા હંમેશા વિશ્વભરના તેમના લાખો અનુયાયીઓને માર્ગદર્શન આપશે.
વડાપ્રધાન મોદીએ કહ્યું, “શ્રી સત્ય સાંઈ બાબાના શતાબ્દી સમારોહ ફક્ત એક ઉજવણી નથી, પરંતુ એક દૈવી આશીર્વાદ છે. ભલે સાંઈ બાબા હવે આપણી વચ્ચે ભૌતિક રીતે હાજર નથી, તેમનો પ્રેમ અને સેવાની ભાવના લાખો લોકો માટે માર્ગદર્શક શક્તિ બની રહી છે.” તેમણે એમ પણ કહ્યું કે ૧૪૦ દેશોમાં સત્ય સાંઈ બાબાના લાખો ભક્તો નવો પ્રકાશ અને દિશા શોધી રહ્યા છે. તેમના અનુયાયીઓ સતત આગળ વધી રહ્યા છે.
પીએમ મોદીએ કહ્યું કે શ્રી સત્ય સાંઈ બાબાએ માનવ જીવનના કેન્દ્રમાં સેવાને રાખ્યું હતું. આપણી વિવિધ આધ્યાત્મિક અને દાર્શનિક પરંપરાઓ એક જ વિચાર તરફ દોરી જાય છે, પછી ભલે કોઈ ભક્તિ, જ્ઞાન અથવા ક્રિયાના માર્ગને અનુસરે. ગરીબોના કલ્યાણ માટે તેમની સરકારની યોજનાઓનું વર્ણન કરતા, પીએમ મોદીએ કહ્યું કે હવે તેમની ચર્ચા આંતરરાષ્ટ્રીય પ્લેટફોર્મ પર થઈ રહી છે.
પીએમ મોદીએ “લોકલ ફોર વોકલ” નો પણ ઉલ્લેખ કર્યો. “લોકલ ફોર વોકલ” પર ભાર મૂકતા, પ્રધાનમંત્રી મોદીએ કહ્યું કે આનાથી દેશને “વિકસિત ભારત” બનવામાં મદદ મળશે. આંધ્રપ્રદેશના મુખ્યમંત્રી ચંદ્રબાબુ નાયડુ, નાયબ મુખ્યમંત્રી પવન કલ્યાણ, ભૂતપૂર્વ ક્રિકેટર સચિન તેંડુલકર, અભિનેત્રી ઐશ્વર્યા રાય બચ્ચન અને અન્ય ઘણી અગ્રણી હસ્તીઓ પણ આ કાર્યક્રમમાં હાજર રહી હતી.
