Washington,તા.૬
રાષ્ટ્રપતિ ડોનાલ્ડ ટ્રમ્પ નોબેલ પુરસ્કાર ન મળવાથી ખૂબ જ દુઃખી હતા, પરંતુ અમેરિકાએ તેમના દુઃખને શાંત કરવા માટે પોતાનો જ શાંતિ પુરસ્કાર બનાવી દીધો છે. આ નવો પુરસ્કાર શરૂ કર્યા બાદ, પ્રથમ પુરસ્કાર રાષ્ટ્રપતિ ટ્રમ્પને આપવામાં આવ્યો છે. અમેરિકાના ઇન્ટરનેશનલ ફેડરેશન ઓફ એસોસિએશન ફૂટબોલએ શાંતિ પુરસ્કારની સ્થાપના કરી છે અને રાષ્ટ્રપતિ ટ્રમ્પને પ્રથમ પુરસ્કાર આપ્યો છે.
વોશિંગ્ટન, ડીસીમાં કેનેડી સેન્ટર ખાતે આયોજિત ૨૦૨૬ ફિફા વર્લ્ડ કપ ડ્રો સમારોહ દરમિયાન આ પુરસ્કાર શરૂ કરવામાં આવ્યો હતો. જેમાં, રાષ્ટ્રપતિ ટ્રમ્પને પણ પ્રથમ પુરસ્કાર આપવામાં આવ્યો હતો. આ કાર્યક્રમ આંતરરાષ્ટ્રીય સ્તરે પ્રસારિત કરવામાં આવ્યો હતો, જેમાં રાષ્ટ્રપતિ ટ્રમ્પ વિશ્વ શાંતિ માટે કામ કરતા હોવાની ઘણા વીડિયો ક્લિપ્સ બતાવવામાં આવી હતી. આ પ્રસારણમાં ટ્રમ્પની રાજદ્વારી પ્રતિભા પર પ્રકાશ પાડવામાં આવ્યો હતો. આ પ્રસારણ ભારતના વડાપ્રધાન મોદી અને ઇઝરાયલી વડાપ્રધાન નેતન્યાહૂ સહિત સમગ્ર વિશ્વએ જોયું હતું.
જણાવી દઈએ કે,ફિફાએ વિશ્વ શાંતિ માટે કામ કરનારાઓનું સન્માન કરવા માટે આ એવોર્ડ શરૂ કર્યો હતો. તેમાં ગોલ્ડ ટ્રોફી અને મેડલનો સમાવેશ થાય છે. એવોર્ડ પ્રાપ્ત કર્યા પછી, રાષ્ટ્રપતિ ટ્રમ્પે કહ્યું કે, તેઓ આ એવોર્ડ પ્રાપ્ત કરીને ખૂબ જ ખુશ છે, પરંતુ એવોર્ડ કરતાં પણ વધુ મહત્વનું એ હતું કે, તેમના પ્રયત્નોએ લાખો લોકોના જીવ બચાવ્યા છે. તેમણે આઠ દેશોમાં યુદ્ધો અટકાવ્યા હતા અને તે ચાલુ રાખશે. વિશ્વમાં શાંતિ જાળવવી એ સૌથી મહત્વપૂર્ણ અને આવશ્યક બાબત છે.
ઉલ્લેખનીય છે કે, રાષ્ટ્રપતિ ટ્રમ્પ અને ફિફા પ્રમુખ ગિયાની ઇન્ફેન્ટિનો મિત્રો છે. તેમણે રાષ્ટ્રપતિ ટ્રમ્પને એવોર્ડ અર્પણ કર્યો અને જાહેરાત કરી કે, તેમણે રાષ્ટ્રપતિ ટ્રમ્પના પ્રયાસોના માનમાં યુએસ ઇન્સ્ટિટ્યૂટ ઓફ પીસનું નામ બદલીને ડોનાલ્ડ જે. ટ્રમ્પ યુએસ ઇન્સ્ટિટ્યૂટ ઓફ પીસ રાખ્યું છે. ફૂટબોલ જગતમાં અને વૈશ્વિક શાંતિના પ્રમોશનમાં રાષ્ટ્રપતિ ટ્રમ્પનું યોગદાન પ્રશંસનીય છે. ગાઝાને નરકના અસ્તિત્વમાંથી સમૃદ્ધ શહેરમાં રૂપાંતરિત કરવા બદલ તેઓ શાંતિ પુરસ્કારને પાત્ર છે.
