Maharashtra,તા.૨૫
શિવસેના (યુબીટી)ના ધારાસભ્ય આદિત્ય ઠાકરેએ મહારાષ્ટ્રના મુખ્ય પ્રધાન દેવેન્દ્ર ફડણવીસને પત્ર લખીને મુંબઈમાં રાજકીય પક્ષો અને નેતાઓના પોસ્ટર, બેનરો અને હોર્ડિંગ્સ લગાવવા પર પ્રતિબંધ મૂકવાની માગણી કરી છે. આદિત્ય ઠાકરેએ સીએમને લખેલા પત્રમાં કહ્યું છે કે આવા પોસ્ટરોને કારણે શહેરની સુંદરતા બગડે છે અને તે જોઈને દુઃખ થાય છે. તેમણે એમ પણ કહ્યું કે બીએમસી વિપક્ષી પાર્ટીઓના પોસ્ટરો હટાવી રહી છે, પરંતુ શાસક પક્ષના પોસ્ટર હજુ પણ છે. ઠાકરેએ કહ્યું કે રાજકીય પક્ષોના આવા પોસ્ટરો વિશ્વના અન્ય કોઈ દેશમાં પ્રદર્શિત થતા નથી.
સીએમ ફડણવીસને લખેલા પત્રમાં આદિત્ય ઠાકરેએ કહ્યું કે, ’અમે નવા વર્ષમાં પગ મુકવા જઈ રહ્યા છીએ. આવી સ્થિતિમાં, અમે રાજકીય પક્ષોના કાયદેસર અને ગેરકાયદેસર પોસ્ટરો પર સંપૂર્ણ પ્રતિબંધ મૂકીને નાગરિકોને રાહત આપી શકીએ છીએ. રાજકીય કારણોસર છેલ્લા બે વર્ષથી મહારાષ્ટ્રના લગભગ દરેક શહેરમાં પાર્ટીઓ અને નેતાઓના હજારો પોસ્ટર લગાવવામાં આવ્યા છે. આ પોસ્ટરો શહેરની સુંદરતા બગાડે છે જે જોઈને દુઃખ થાય છે. બીએમસી વિરોધ પક્ષોના પોસ્ટરો હટાવી રહી છે પરંતુ શાસક પક્ષના પોસ્ટરો હટાવતી નથી. આવા રાજકીય પોસ્ટર આખી દુનિયાના અન્ય કોઈ દેશમાં જોવા મળતા નથી.
ઠાકરેએ પોતાના પત્રમાં લખ્યું છે કે, ’દરેક પક્ષે શહેરને સુંદર બનાવવા માટે રાજકીય પોસ્ટર ન લગાવવાનો નિર્ણય લેવો જોઈએ. તમે આ બાબતે પહેલ કરો, અમે તમને સમર્થન આપીશું.’ તમને જણાવી દઈએ કે તાજેતરમાં યોજાયેલી વિધાનસભાની ચૂંટણીમાં ભારતીય જનતા પાર્ટીની આગેવાની હેઠળની મહાયુતિએ જંગી જીત નોંધાવી હતી, જ્યારે વિપક્ષ મહા વિકાસ આઘાડીનો સફાયો થઈ ગયો હતો. મુખ્ય ઘટક પક્ષોની વાત કરીએ તો, મહાયુતિના ઘટક પક્ષોમાં ભાજપે ૧૩૨ બેઠકો, શિવસેનાએ ૫૭ બેઠકો અને એનસીપીએ ૪૧ બેઠકો જીતી હતી. તે જ સમયે, મહાવિકાસ અઘાડીમાં સમાવિષ્ટ શિવસેના (યુબીટી)ને ૨૦, કોંગ્રેસને ૧૬ અને એનસીપી (એસપી)ને ૧૦ બેઠકો મળી હતી.
