આગામી એક-બે વર્ષમાં રિન્યુએબલ એનર્જીમાં રૂ. ૬,૦૦૦ કરોડનો પણ સમાવેશ થશે
જયપુર,તા.૯
વડાપ્રધાન નરેન્દ્ર મોદીએ સોમવારે જયપુરમાં રાઇઝિંગ રાજસ્થાન ગ્લોબલ ઇન્વેસ્ટમેન્ટ સમિટ ૨૦૨૪ અને રાજસ્થાન ગ્લોબલ બિઝનેસ એક્સપોનું ઉદ્ઘાટન કર્યું. આ પછી પીએમ મોદીએ કહ્યું કે વિશ્વના દરેક રોકાણકાર ભારતને લઈને ઉત્સાહિત છે. તેમણે કહ્યું કે, ભારતે સુધારા, પ્રદર્શન અને પરિવર્તનના મંત્ર દ્વારા જે વિકાસ સાધ્યો છે તે દરેક ક્ષેત્રમાં જોઈ શકાય છે. આ સદીને ’ટેક્નોલોજી અને ડેટા આધારિત’ ગણાવતા વડાપ્રધાને કહ્યું કે દેશ દુનિયાને લોકશાહી, વસ્તીવિષયક અને ડેટાની વાસ્તવિક શક્તિ બતાવી રહ્યો છે. રાજસ્થાનની પ્રગતિ પર પ્રકાશ પાડતા પીએમ મોદીએ કહ્યું કે, આઝાદી પછીની સરકારોની પ્રાથમિકતા ન તો વિકાસ હતી કે ન તો વિરાસત,આના કારણે રાજસ્થાનને મોટું નુકસાન થયું છે. પરંતુ આજે અમારી સરકાર ’વિકાસ પણ, વિરાસત પણ’ના મંત્ર પર કામ કરી રહી છે… રાજસ્થાન આગળ વધી રહ્યું છે.
આ પછી અદાણી જૂથે રાજસ્થાનમાં વિવિધ ક્ષેત્રોમાં રૂ. ૭.૫ લાખ કરોડના રોકાણની જાહેરાત કરી હતી. અદાણી પોર્ટ્સ એન્ડ સ્પેશિયલ ઈકોનોમિક ઝોન લિમિટેડના મેનેજિંગ ડિરેક્ટર કરણ અદાણીએ અહીં ’રાઈઝિંગ રાજસ્થાન સમિટ’માં જણાવ્યું હતું કે આગામી પાંચ વર્ષમાં કુલ રોકાણના ૫૦ ટકા રોકાણ કરવામાં આવશે. અદાણી જૂથ વિવિધ ક્ષેત્રોમાં રૂ. ૭.૫ લાખ કરોડથી વધુનું રોકાણ કરવાની યોજના બનાવી રહ્યું છે, એમ તેમણે જણાવ્યું હતું. કરણ અદાણીએ જણાવ્યું હતું કે, કંપની વિશ્વની સૌથી મોટી સંકલિત ઉર્જા ઇકોસિસ્ટમ બનાવવાની યોજના ધરાવે છે, જેમાં ૧૦૦ ય્ઉ રિન્યુએબલ એનર્જી, ૨ મિલિયન ટન હાઇડ્રોજન અને હાઇડ્રોપાવર પ્રોજેક્ટ્સમાંથી ૧.૮ ય્ઉ ઊર્જાનો સમાવેશ થશે. તેમણે કહ્યું કે આ રોકાણથી રાજસ્થાનમાં રોજગારીની હરિત તકો ઊભી થશે.
આદિત્ય બિરલા ગ્રુપ આગામી કેટલાક વર્ષોમાં રાજસ્થાનમાં તેના વિવિધ વ્યવસાયોમાં રૂ. ૫૦,૦૦૦ કરોડનું રોકાણ કરવાની યોજના બનાવી રહ્યું છે. આદિત્ય બિરલા ગ્રૂપના ચેરમેન કુમાર મંગલમ બિરલાએ જણાવ્યું હતું કે ગ્રૂપના રોકાણમાં આગામી એક-બે વર્ષમાં રિન્યુએબલ એનર્જીમાં રૂ. ૬,૦૦૦ કરોડનો પણ સમાવેશ થશે. તેમણે કહ્યું કે ગ્રૂપ ભારતમાં સિમેન્ટ, ટેલિકોમ, ફેશન રિટેલ વગેરે સહિત છ વ્યવસાયોમાં નોંધપાત્ર હાજરી ધરાવે છે. અમે અમારા તમામ વ્યવસાયોમાં રોકાણ વધારવા માટે પ્રતિબદ્ધ છીએ, બિરલાએ અહીં ’રાઇઝિંગ રાજસ્થાન ઇન્વેસ્ટમેન્ટ સમિટ’માં જણાવ્યું હતું. મને લાગે છે કે અમારું જૂથ આગામી કેટલાક વર્ષોમાં સિમેન્ટ, રિન્યુએબલ એનર્જી, ટેલિકોમ અને રિટેલમાં રૂ. ૫૦,૦૦૦ કરોડનું રોકાણ કરશે.
તેમણે કહ્યું કે કંપની રાજસ્થાનમાં સિમેન્ટ ઉત્પાદનમાં એક કરોડ ટનનો વધારો કરશે. હાલમાં જૂથની કંપની અલ્ટ્રા ટેક સિમેન્ટ રાજસ્થાનમાં ૨૦ મિલિયન ટનની ઉત્પાદન ક્ષમતા ધરાવે છે. બિરલાએ જણાવ્યું હતું કે ગ્રૂપનું જ્વેલરી બિઝનેસ યુનિટ રાજ્યમાં એક નાનું મેન્યુફેક્ચરિંગ યુનિટ સ્થાપવાની પણ યોજના બનાવી રહ્યું છે.
મહિન્દ્રા ગ્રૂપનું સોલાર ડિવિઝન રાજસ્થાનમાં રૂ. ૧૧,૦૦૦ કરોડનું રોકાણ કરવા પ્રતિબદ્ધ છે. મહિન્દ્રા ગ્રૂપના ચેરમેન આનંદ મહિન્દ્રાએ અહીં ’રાઇઝિંગ રાજસ્થાન ગ્લોબલ ઇન્વેસ્ટમેન્ટ સમિટ’માં જણાવ્યું હતું કે કંપનીએ રાજસ્થાનમાં ૧.૧ ગીગાવોટ સોલર ક્ષમતા સ્થાપિત કરી છે. તેમણે કહ્યું, અમારા સૌર વિભાગે રાજસ્થાનમાં ૧.૧ ગીગાવોટથી વધુ ક્ષમતા સ્થાપિત કરી છે. વધારાની ૨.૮ ગીગાવોટ ક્ષમતા હાંસલ કરવા માટે રૂ. ૧૧,૦૦૦ કરોડથી વધુનું રોકાણ કરવા પ્રતિબદ્ધ છે. મહિન્દ્રાએ જણાવ્યું હતું કે જૂથે રાજ્યમાં ૫,૦૦૦ સીધી નોકરીઓનું સર્જન કર્યું છે અને આગામી પાંચ વર્ષમાં તેમાં નોંધપાત્ર વધારો કરવાની યોજના ધરાવે છે.
